اتا-انالار تىعىز بايلانىستا بولعانى ءجون

– ساباق قانداي تەمپەراتۋرادا توقتاتىلادى؟

– وقۋشىلاردىڭ قاۋىپسىزدىگىن ويلاپ, دەنساۋلىعىن ساقتاۋ ماقساتىندا اۋا-رايىنىڭ قولايسىز كەزىندە, ناقتىراق ايتقاندا,  قاتتى بوراندار مەن ايازداردا جالپى ءبىلىم بەرەتىن مەكتەپتەر مەن كوللەدجدەردىڭ 1-2 كۋرس وقۋشىلارى ءۇشىن ساباق توقتاتىلادى. ال ەگەر تالداپ ايتاتىن بولساق, اۋانىڭ تەمپەراتۋراسى -25 گرادۋس (اتموسفەرالىق اۋانىڭ تەمپەراتۋراسى جەلدىڭ جىلدامدىعىنا سايكەس) جانە ودان دا  تومەندەگەندە 1-4 سىنىپتاردا; اۋانىڭ تەمپەراتۋراسى -30 گرادۋستان تومەندەگەندە 1-9 سىنىپتاردا; ال, – 35 گرادۋستان تومەن بولعاندا 1-11(12) سىنىپتاردا, كوللەدجدەردە 1-2 كۋرس وقۋشىلارى ءۇشىن ساباق توقتاتىلادى.

– ساباقتى توقتاتۋ تۋرالى اقپارات قالاي جەتكىزىلەدى؟

– «31 ارنا», «ستۆ» تەلەديدار ارناسىنىڭ جۇگىرتپە جولىندا ساعات 6.30-دان 7.00-گە دەيىن ء(بىرىنشى اۋىسىم ءۇشىن) جانە 12.15-تەن 12.45-كە دەيىن (ەكىنشى اۋىسىم ءۇشىن), سونىمەن قاتار «حابار», «قازاقستان-1», «ورت قازاقستان» تەلەارنالارىندا «داۋىستى حابارلاما» بەرىلەدى. سونداي-اق, ساباقتى توقتاتۋ تۋرالى اقپاراتتى «051 قىزمەت كورسەتۋ مەكەمەسىنە», 109 ءنومىرىن تەرىپ (ۇيالى تەلەفونمەن دە حابارلاسۋعا بولادى), 118-01 (9.00- دەن 18.00-گە دەيىنگى ارالىقتا), 169 (اقىلى) قىزمەتتەرىنە تەلەفون شالۋ ارقىلى دا  الۋعا بولادى.

بۇعان قوسا, اتا-انالار بالالارى وقيتىن مەكتەپكە, سىنىپ جەتەكشىسىنە, مەكتەپ اكىمشىلىگىنە قوڭىراۋ شالىپ, انىقتاي الادى.

ساباق توقتاتۋ پارامەترلەرى تۋرالى ءبىلىم باسقارماسىنىڭ bilim.astana.kz  سايتىنان وقۋعا بولادى.

– اقپاراتتىڭ دەر كەزىندە  جەتپەي قالاتىنى تۋرالى نە ايتاسىز؟

اقپاراتتى دەر كەزىندە الۋ ءۇشىن تەلەديدار ارقىلى جۇگىرتپە جولدان حابارلاما بەرۋگە جاعداي جاساپ ەدىك, ونداي مۇمكىندىكتىڭ ءبىر كەدەرگىسى مىنادا, جوعارىدا اتالعان «31 ارنا», «ستۆ» كانالدارى تەك قانا «الماتۆ» كابەلدىك جۇيەسى قوسىلعان تەلەديداردان كورسەتىلەدى. ال, «سەكاتەل», «SكS تەلەكوم» تاعى دا باسقا كابەلدىك جۇيەلەرىنە قوسىلعان تەلەديدار ارنالارىنداعى «31 تەلەارنادان» ونداي جۇگىرتپە جولدار بەرىلمەيدى. اتا-انالار ءۇشىن تاعى دا ەسكەرتىپ ايتارىم, تەلەديدارىڭىز «الما تۆ» كابەلدىك جۇيەسىنە قوسىلماعان جاعدايدا, «حابار», «قازاقستان-1», «ورت قازاقستان» ارنالارىنان «داۋىستى حابارلامانى» تىڭداۋدى سۇرايمىز.

جالپى, سارىارقانىڭ قىسى وتە سۋىق ءارى توسىن مىنەز تانىتاتىن جاعدايلارى وتە ءجيى كەزدەسەدى. سوندىقتان, اتا-انالارعا ايتار تىلەگىمىز – ەڭ باستىسى, بالالاردى مەكتەپكە جىبەرەر كەزدە قالىڭ كيىندىرىپ, اۋا-رايىنىڭ قۇبىلمالى كەزدەرىن ەسكەرىپ وتىرۋ كەرەك. سونىمەن قاتار, جوعارىدا اتالعان حابارلاما بەرىلەتىن مەكەمەلەرگە حابارلاسىپ, تەلەفون شالىپ وتىرۋلارىن, اۋا-رايى كۇرت سۋىتقان كەزدە مەكتەپپەن, سىنىپ جەتەكشىسىمەن تىعىز بايلانىستا بولۋلارىن سۇرايمىز.