ەلوردادا ەر بالالارعا ارنالعان «جارقىن سمارت» مەكتەبى اشىلدى.
سالتاناتتى راسىمگە پارلامەنت سەناتىنىڭ دەپۋتاتى ەدىل مامىتبەكوۆ, ەلىمىزگە ەڭبەگى سىڭگەن گەنەرال نۇرجان راحمەتحانۇلى, №84 مەكتەپ ديرەكتورى زاۋرە عيناياتقىزى جانە بىرقاتار بەلدى تۇلعالار مەن جەكە كاسىپكەرلەر قاتىسىپ, ءبىلىم ورداسىنا كىتاپتار سىيلادى. سونداي-اق بەلگىلى ايتىسكەر اقىن ەركەبۇلان قاينازار ولەڭ وقىپ, ۇستازدار مەن وقۋشىلارعا ىزگى تىلەگىن جولدادى.
«جارقىن سمارت» – ۇل بالالارعا ارنالعان, ۇلتتىق تاربيە بەرەتىن جەكە مەنشىك مەكتەپ. ءبىلىم ورداسى وقۋشىلاردى 5 سىنىپتان باستاپ قابىلدايدى. مەكتەپتە تۇسكە دەيىن ستاندارتقا ساي ساباقتار وقىتىلىپ, تۇستەن كەيىن وقۋشىلار مۇعالىممەن بىرگە ءۇي تاپسىرماسىن ورىنداپ, ءوزى قالاعان ۇيىرمەگە قاتىسادى.
سالتاناتتى راسىمگە قوناق بولعان بەلگىلى ابايتانۋشى ومار جالەل, عالىم قايرات جولدىبايۇلى, ونەر قايراتكەرى قىدىرالى بولمان, اقىن ولجاس وتار مەن بىرقاتار كاسىپكەرلەر مەكتەپ ءىشىن ارالاپ, ەرەك ءبىلىم ورداسىنىڭ بولاشاعىنان زور ءۇمىت كۇتەتىنىن جەتكىزدى.
