ەلىمىزدىڭ ەڭ ۇزدىك پەداگوگتارى انىقتالدى. مۇعالىمدەردىڭ كاسىبي مەرەكەسى قارساڭىندا «ۇزدىك پەداگوگ – 2021» رەسپۋبليكالىق بايقاۋى قورىتىندىلانىپ, رەسپۋبليكا بويىنشا 64 مۇعالىم وسى اتاققا لايىق دەپ تانىلدى. ۇستازدىق قىزمەتتىڭ وزاتتارى قاتارىنان استانالىق 5 مۇعالىم كورىندى. ولار قوماقتى قارجىلاي سىيلىقپەن قاتار ارنايى توسبەلگىگە يە بولدى.
– ۇلى پەداگوگتىڭ يدەيالارى 180 جىل وتسە دە وتە ماڭىزدى. قازىرگى ۋاقىتتا بولىپ جاتقان بارلىق وزگەرىستەرگە جاۋاپ بەرىپ وتىرعان يدەيالارىندا پەداگوگيكالىق پرينتسيپتەرى بار. سوندىقتان العا جىلجيمىز دەسەك, وسى ۇلى پەداگوگتەرىمىزدىڭ ا.بايتۇرسىنۇلى, ى.التىنسارين سەكىلدى پەرزەنتتەرىمىزدىڭ
مۇراسىن زەرتتەۋىمىز كەرەك. پەداگوگتىڭ مارتەبەسى تەك جالاقىمەن عانا ەسەپتەلمەيدى. ارينە, ول پەداگوگتىڭ شەبەرلىگىمەن, پەداگوگتى باسقا وزىنە ءتان ەمەس جۇمىستان قورعاۋ, ت.ب. ماسەلەلەرگە بايلانىستى ەكەنى ءسوزسىز, – دەدى قر ءبىلىم جانە عىلىم ءمينيسترى اسحات ايماعامبەتوۆ.
بيىل ونىنشى رەت وتكەن مەرەيتويلىق ءراسىم ەل تاۋەلسىزدىگىنىڭ 30 جىلدىعى قارساڭىندا ۇيىمداستىرىلىپ, اسا كورنەكتى اعارتۋشى, پەداگوگ ىبىراي ءالتىنساريننىڭ 180 جىلدىعىمەن تۇسپا-تۇس كەلگەندىكتەن, ۇلى اعارتۋشىنىڭ تۋعان جەرىندە وتكىزىلدى.
«بۇگىن ەلىمىزدىڭ تۇكپىر-تۇكپىرىنەن كەلگەن 64 مۇعالىم «ۇزدىك پەداگوگ-2021» اتاعىنا يە بولدى. پەداگوگتەردىڭ ارقايسىسى 1000 اەك كولەمىندە سەرتيفيكاتپەن جانە «ۇزدىك پەداگوگ» توسبەلگىسىمەن ماراپاتتالدى. سونىمەن قاتار اقشالاي سىياقىلار جەرگىلىكتى اتقارۋشى ورگاندار تاراپىنان دا بەكىتىلدى. بۇل كۇنى 10 پەداگوگ «ەڭبەك ارداگەرى» مەدالىمەن جانە «ى.التىنسارين», «ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىلەرىمەن ماراپاتتالدى. پەداگوگيكا سالاسىنىڭ ەڭبەك ارداگەرلەرىنە دە قۇرمەت كورسەتىلدى. بارلىق جەڭىمپازدى لايىقتى ماراپاتتارىمەن قۇتتىقتايمىن! قاجىرلى ەڭبەكتەرىڭىز بەن ماماندىققا دەگەن ادالدىقتارىڭىز ءۇشىن العىس ايتامىن» دەدى قر ءبىلىم جانە عىلىم ءمينيسترى.
ەلوردانىڭ اتىنان قاتىسقان ءماشھۇر ءجۇسىپ اتىنداعى №57 ورتا مەكتەبىنىڭ گەوگرافيا ءپانى مۇعالىمى سارۆار كۋلمەتوۆ, №28 «جۇلدىز» بالاباقشاسىنىڭ قازاق ءتىلى مەن ادەبيەتى ءپانى مۇعالىمى گۇلشات تۇتكيشەۆا, كولىك جانە كوممۋنيكاتسيا جوعارى كوللەدجىنىڭ ارنايى پاندەر وقىتۋشىسى شولپان باباەۆا, كاسىپتىك-تەحنيكالىق كوللەدجىنىڭ وندىرىستىك وقىتۋ شەبەرى بەيبىت بيبوسىنوۆ, №1 بالالار مۋزىكا مەكتەبىنىڭ حورەوگرافيا مۇعالىمى باعدينا سەكەربەك بايقاۋدا جەڭىمپاز اتانىپ, «ۇزدىك پەداگوگ – 2021» اتاعىن الدى.
