تاريحتى تۇزۋگە ادامزاتتىڭ ءبارى اتسالىسادى, بىراق تاريحتى جازۋ اركىمگە بۇيىرا بەرمەيدى. الەمگە ءماشھۇر قالامگەر وسكار ۋايلدتىڭ وسى مازمۇندا ايتقان ءسوزى ەسكە ءتۇسىپ وتىر. ءدال بۇگىن شيرەك عاسىرلىق مەجەنى باعىندىرىپ وتىرعان «استانا اقشامى» باسىلىمىنىڭ ۇجىمى وسىنداي مارتەبەلى ميسسيانى ابىرويمەن ورىنداپ, ۇلت تاريحىن شەجىرە بەتتەرىنە ءتۇسىرىپ كەلەدى.
ال «استانا اقشامىنىڭ» جاۋاپكەرشىلىك جۇگى تىم اۋىر. سەبەبى ەل تاريحىنا ىقپال ەتەتىن كەلەلى كەڭەستەر, ايتۋلى وقيعالاردىڭ باسىم كوپشىلىگى ەلوردادا وتەدى. ەلدىڭ بولاشاققا باعىت-باعدارىن ايقىندايتىن شەشىمدەر وسىندا قابىلدانادى. دەمەك, ەلوردانىڭ تاۋلىك بويى تولاس تاپپايتىن تىنىس-تىرشىلىگىن, رۋحاني-مادەني ءومىرىن تاسقا باسىپ قالدىرۋ – ەل تاريحىن ەكشەۋمەن ساباقتاسادى دەسەك, ارتىق ايتقاندىق ەمەس. بۇل – «استانا اقشامىنىڭ» ەڭ باستى ماقساتى.
بۇگىنگى تاڭدا مەرزىمدى باسىلىمدارعا قويىلاتىن باستى تالاپتاردىڭ ءبىرى – زاماناۋي اقپارات تاراتۋ تاسىلدەرىن, ءبىرىنشى كەزەكتە عالامتوردى كەڭىنەن پايدالانۋ. بۇل ورايدا, قالالىق باسىلىمنىڭ عالامتورداعى نۇسقاسى اشىلعان جانە ول ساپالى كونتەنتتەرمەن مولىنان قامتىلعان. وندا تەك تولنۇسقا, ياعني, جۋرناليستەردىڭ نەمەسە اۆتورلاردىڭ وزدەرى ازىرلەگەن, باسقا ەشبىر جەردە جاريالانباعان ماتەريالدارى جارىق كورەدى.
ەلوردانىڭ باس گازەتى رەتىندە, باسىلىمدا جاريالاناتىن ماتەريالدار قالانىڭ الەۋمەتتىك,
ەكونوميكالىق, مادەني جانە ساياسي تىنىس-تىرشىلىگىن ۇزدىكسىز ناسيحاتتايدى. باسىلىم جارناماسى كوپ جالعان «قاھارماندارعا» ەمەس, شىن مانىسىندە ۇلگى تۇتۋعا لايىقتى تۇلعالارعا گازەت بەتىنەن ورىن بەرەدى.
«استانا اقشامى» قازىر ءوز بەت-بەينەسى قالىپتاسقان, وقىرمانعا ايتارى مول ايتۋلى باسىلىمعا اينالعانىن ەشكىم جوققا شىعارا المايدى. بۇنداي باسىلىم ءبىر كۇندە عانا پايدا بولعان جوق. گازەت شىققان العاشقى جىلداردان باستاپ كۇنى بۇگىنگە دەيىن ءداستۇر ساباقتاستىعى ساقتالىپ كەلگەنى دە جۇرەككە جىلىلىق ۇيالاتادى. بۇگىنگى مەرەكە ۇستىندە ۇجىمدى ءار جىلدارى باسقارعان باس رەداكتورلار كەنجە جۇماعۇلوۆ, جۇماگۇل ساۋحات, ماعجان سادىحانۇلى, نۇرتورە ءجۇسىپ, امانتاي ءشارىپ, ەربولات قامەن, زەيىن الىپبەك جانە قازىرگى باسشى ەركىن قىدىر سەكىلدى ارىپتەستەرىمنىڭ باسىلىمدى وقىرماننىڭ التىنعا ايىرباستاماس رۋحاني ولجاسىنا اينالدىرۋداعى شىعارماشىلىق ىزدەنىستەرى مەن ەرەن ەڭبەكتەرىن اتاپ وتكىم كەلەدى.
استانالىق مارتەبەگە ساي بولۋ ءۇشىن باسىلىم بەتىندە جاريالاناتىن ماتەريالداردىڭ تاقىرىپ اياسى كەڭ, مازمۇنى باي بولۋعا ءتيىس. ءبىزدىڭ شىعارماشىلىق ۇجىم مۇشەلەرى جانرلىق جان-جاقتىلىقتى جاقسى مەڭگەرگەن. كەز كەلگەن قۇبىلىستى, كەز كەلگەن وقيعانى وقىرمانعا جەدەل جانە قاراپايىم تىلمەن جەتكىزەدى. دەسەك تە, وسى تۇرعىدا قارابايىرلىققا جول بەرمەي, شىتىرما پروبلەمادان قاشقاقتامايتىن قايراتتى جاستاعى «استانا اقشامىنىڭ» الار اسۋى ءالى دە الدا دەپ بىلەمىن.
اياعان ساندىباي,
«استانا اقشامى» گازەتىنىڭ
باس رەداكتورى
(2015-2016
جىلدار)
