جاۋگەرشىلىك زاماندا قازاقتىڭ قارىس جەرىن دۇشپانعا بەرمەيمىز دەپ اتقا قونعان باتىرلارىمىز از بولماعان. ەسىمدەرى كومەسكىلەنىپ, تاريح تاساسىندا قالعاندارى قانشاما دەسەڭىزدەرشى. ولاردىڭ ەرلىگى جىرعا, انگە, كۇيگە اينالدى. ەلوردانىڭ مەملەكەتتىك اكادەميالىق فيلارمونياسى وتان قورعاۋشىلار كۇنى قارساڭىندا «رۋحاني جاڭعىرۋ» جانە «ۇلى دالانىڭ جەتى قىرى» باعدارلامالارى اياسىندا قازىر ەسىمدەرى كوپ ايتىلا بەرمەيتىن باتىرلاردى دارىپتەپ, «ءباھادۇر بابالار» اتتى مۋزىكالىق تەاترلاندىرىلعان قويىلىمىن وتكىزدى.
قالادا وسكەن قازىرگى جاستاردىڭ يدەالدارى وزگەرگەن. ولارعا قابانباي باتىردان گورى ارالاس جەكپە-جەك شەبەرى كونور ماكگرەگور جاقىن. مۇنى اۋىلداعى اتاسىنا (مادەنيەت سالاسىنىڭ ۇزدىگى نۇراي تاناباەۆ) قىدىرىپ كەلگەن نەمەرەنىڭ سوزىنەن اڭعارامىز. ءتىپتى, نەمەرەنىڭ ءبىرى ءباھادۇر دەگەن ءوزىنىڭ تاپ-تاماشا اتىن جاتىرقاپ, باحا بولىپ اتانۋىن قۇپ كورەدى.
ال ەكىنشىنىڭ اتى – باتىرحان. اتالارى وسى ەكى نەمەرەسىن ءباھادۇر, باتىر بابالارىمىزدىڭ قۇرمەتىنە وسىلاي دەپ اتاعان. قويىلىم ستسەناريىنىڭ اۆتورى, باتىرحاننىڭ بەينەسىن سومداعان جاس اقىن قۋات ەجەمبەك قوعامدا قازىر كەزدەسەتىن كەلەڭسىز كورىنىستەردى ۇلتتىق تاربيەمەن شەبەر قيۋلاستىرعان. كەش بارىسىندا اقساقال نەمەرەلەرىنە بىرقاتار باتىرلارىمىزدىڭ ەرلىگى جايىندا اڭگىمە شەرتتى.
بيىل شىعىس تۇركىستان قازاقتارى ۇلت-ازاتتىق كوتەرىلىسىنىڭ باسشىسى وسپان باتىر يسلامۇلىنىڭ تۋعانىنا – 120 جىل. ەلدىڭ ەركىندىگى ءۇشىن باسىن بايگەگە تىگىپ, شەيىت كەتكەن باتىردىڭ ەرلىگى تۋرالى ولەڭ-جىرلار جازىلدى. كەشتىڭ باسىندا اقىن عالىم قابيبەكۇلىنىڭ «وسپان باتىردىڭ سوڭعى ءسوزى» تولعاۋى مەن كومپوزيتور توعجان ءجاحيننىڭ «وسپان باتىر» شىعارماسى ورىندالدى.
بۇعان قوسا, قاراساي, وراق-ماماي, قاپال, ەسپەنبەت, كورۇعلى, وتەگەن باتىرلار تۇلعالارى جىر مەن كۇيمەن اسپەتتەلدى. اتاپ ايتقاندا, ءسۇيىنباي ارونۇلىنىڭ «قاراساي باتىر», دۋلات باباتايۇلىنىڭ «ەسپەنبەت باتىر» جىرلارى, نۇرعيسا تىلەنديەۆتىڭ «مەنىڭ بابام قاراساي» كۇيى, شولپان قورعانبەك, سەرىك ءابدىنۇروۆ سياقتى كومپوزيتورلاردىڭ شىعارمالارى شالقىدى. بۇل تۋىندىلاردى دارحان مۇقان, ارايلىم راحىمقىزى, كۇنسۇلۋ تۇرلىبەكوۆا, جازگۇل دانىلباەۆا, اينۇر قونىسباەۆا, ايگەرىم نارتۇيە, ت.ب. ونەرپازدار, قازاقستاننىڭ ەڭبەك سىڭىرگەن قايراتكەرى ايتقالي جايىموۆ جەتەكشىلىك ەتەتىن ەلوردالىق فيلارمونيانىڭ قازاق وركەسترى (ديريجەرى – مادەنيەت قايراتكەرى نۇرلان بەكەنوۆ) ورىندادى.
كەشتە ءبىراز باتىردىڭ ەسىمدەرى جاڭعىردى. ولاردىڭ ءبىرىن بىلسەك, ءبىرىن بىلمەيدى ەكەنبىز. «ۇلان-عايىر جەر ءۇشىن, تەكتى تۋعان ەل ءۇشىن بىرلىگىن بەكىتىپ, تەرەزەسىن تەڭ ۇستاعان ءباھادۇر بابالاردىڭ ەرلىگى ءسىز بەن بىزگە – امانات. باتىرلارىمىزدىڭ دارا جولىن دارىپتەپ, باتىرلىعىن ناسيحاتتاۋ – ەلدىگىمىزدىڭ ايعاعى» دەدى كەش يدەياسىنىڭ اۆتورى-باس رەجيسسەرى, قازاقستاننىڭ ەڭبەك سىڭىرگەن قايراتكەرى ساكەن ءابدىراحمانوۆ.
