استانادا حالىقارالىق «اق كوگەرشىن» بالالار شىعارماشىلىعى بايقاۋى ءوتتى. ونەر دوداسىنىڭ ونجىلدىق مەرەيتويىندا بيىل رەسەي, قىرعىزستان, قازاقستاننىڭ تۇكپىر-تۇكپىرىنەن كەلگەن 1500-دەن اسا ۇمىتكەر باق سىنادى.
ەكى كۇنگە سوزىلعان سايىس قر ءبىلىم جانە عىلىم مينيسترلىگى مەن استانا قالاسى اكىمدىگىنىڭ قولداۋىمەن ەلورداداعى «جاستار» جانە وقۋشىلار سارايىندا, №3 بالالار مۋزىكا مەكتەبىندە وتكىزىلدى. تالابى تاۋداي تالانتتار 7 اتالىم بويىنشا ونەرىن ورتاعا سالدى. اتاپ ايتقاندا, 4 پەن 17 جاس ارالىعىنداعى قاتىسۋشىلار حورەوگرافيا, ۆوكال, ءداستۇرلى ءان, اسپاپتا ويناۋ, ءسان, كوركەمسوز وقۋ شەبەرلىگى جانە ەرەكشە جانردا ءوزارا سىنعا ءتۇستى. جارىس بارىسىندا ساحنالانعان كورىنىستەردە تاۋەلسىزدىكتىڭ 25 جىلدىعى تاقىرىبى كەڭىنەن ايشىقتالدى.
«اق كوگەرشىن» بايقاۋى – ونەر جولىنىڭ العاشقى باسپالداعى. جارىسقا ۇكىلەگەن ۇمىتپەن قاتىساتىن دارىندى ونەرپازداردىڭ ىشىنەن جاڭا ەسىمدەر انىقتالادى. بالالار ءۇشىن بۇل – تارتىستى بايگە عانا ەمەس, دوستىق, شىعارماشىلىق, بەرەكەلى باستامالاردىڭ مەرەكەسى. كونكۋرس باعدارلاماسى شەڭبەرىندە قاتىسۋشى ونەرپازدار استاناداعى بالالار ۇيىندە قايىرىمدىلىق كونتسەرت كورسەتتى. سونداي-اق, باس شاھاردىڭ ساۋلەتتى جەرلەرىنە ساياحات جاسادى. «بايتەرەك» مونۋمەنتىن, بەيبىتشىلىك جانە كەلىسىم سارايىن ارالاپ, «جاستار» تەاترى سپەكتاكلىن تاماشالادى» دەيدى «اق كوگەرشىن» بالالار قورىنىڭ پرەزيدەنتى تامارا ەسكەنوۆا.
«جاستار» سارايىنداعى گالا-كونتسەرتتە ءار نوميناتسياعا سايكەس گران-پري يەگەرى انىقتالىپ, بارلىق قاتىسۋشىلار ديپلوم جانە باعالى سىيلىقتارمەن ماراپاتتالدى. استانا قالاسىنىڭ ونەرپازدارى 4 نوميناتسيا بويىنشا گران-پري جۇلدەسىن جەڭىپ الدى. جۇزدەن جۇيرىك شىققان استانالىقتار: «ۆوكال» اتالىمى بويىنشا ونەر كورسەتكەن – 6 جاستاعى كاۋسار ومىرسەرىكقىزى, ءداستۇرلى ورىنداۋشىلىردان – «كەربەز قىزدار» جەتىگەنشىلەر ءانسامبلى, حورەوگرافيادان – «تۇلپار» بي توبى جانە بالالار ءسانىن كورسەتكەن ءاليا ابدراش.
ءمادينا جاقىپ
