استانا قالاسى مادەنيەت باسقارماسىنىڭ قولداۋىمەن ەلورداداعى «قازاقستان» كونتسەرت زالىندا كورنەكتى كومپوزيتور كەڭەس دۇيسەكەەۆتىڭ 70 جاسقا تولۋىنا وراي شىعارماشىلىق كەش ءوتتى.
وتكەن اقپان ايىندا كورنەكتى كومپوزيتور مەرەيلى 70 جاسقا تولدى. كەڭەس دۇيسەكەەۆتىڭ شىعارمالارى حالقىمىزدىڭ تابيعاتى سەكىلدى قوڭىر مىنەزدى. الىپ-ۇشپاسى جوق, ءيىرىمى تەرەڭ وزەندەر سەكىلدى تۇنىق اعادى. قازاق ونەرىندە ءوز بيىگى بار تۇلعانىڭ تۋىندىلارىن جۇرتشىلىق ءسۇيىپ
تىندايدى. ول كىسى تەك قانا كوپشى-
لىككە كەڭ تانىمال اندەر عانا ەمەس, سۇيەكتى سيمفونيالىق شىعارمالار, رومانستار, كانتاتتالار جازدى. ءبىر عانا «ءجالاڭتوس باتىر» سيمفونياسىنىڭ ءوزى ۇلتتىق مۋزىكانىڭ ءبىر بەلەسى سانالادى.
ارينە, كومپوزيتوردى حالىققا كەڭىرەك تانىتقان ونىڭ عاجايىپ نازعا تولى سازدى اندەرى. وسى اندەر ارقىلى بۇگىندە ورتا بۋىن سانالاتىن تالانتتى انشىلەردىڭ ونەردە باعى جاندى. ونىڭ «سالەم ساعان, تۋعان ەل», «ءومىر, ءومىر», «عاشىقتار جىرى», «ويلان بالام», «قاراعىم-اي» اتتى شىعارمالارىن حالايىق ەرەكشە جاقسى كورەدى. وسىلاردىڭ بارلىعى سازدى كەشتە ورىندالدى.
ايتۋلى شارادا, روزا رىمباەۆا, ناعيما ەسقاليەۆا, ماقپال ءجۇنىسوۆا, سەمبەك جۇماعاليەۆ, مايرا ءىلياسوۆا سەكىلدى دۇلدۇلدەر قاتىسىپ, ونەر كورسەتتى. سونداي-اق, بۇگىنگى تاڭدا ەسترادانىڭ جۇيرىك اقبوزىن ەرتتەپ ءمىنىپ جۇرگەن ءبىر توپ دارىندى جاس انشىلەر دە كومپوزيتوردىڭ شىعارمالارىن ناقىشىنا كەلتىرە ورىندادى. قىسقاسى, ەلوردا جۇرتشىلىعى تالانتتى تۇلعانىڭ كەشىنەن كوكتەمنىڭ «التىنكۇرەك» سامالىنداي عاجايىپ اسەرلەنىپ قايتتى دەسە بولادى.
ازامات ەسەنجول
