باستاۋىش ۇيىم «باستاۋ»
قالالىق تۇرعىن ءۇي ينسپەكتسياسى باسقارماسىندا «نۇر وتان» پارتياسى استانا قالالىق فيليالىنىڭ «باستاۋ» اتتى باستاۋىش پارتيا ۇيىمى قۇرىلىپ, ونىڭ قاتارىنا 24 ادام مۇشەلىككە قابىلداندى.
ۇيىمنىڭ العاشقى وتىرىسىنا «نۇر وتان» پارتياسىنىڭ استانا قالاسى سارىارقا اۋداندىق فيليالى توراعاسىنىڭ ءبىرىنشى ورىنباسارى مۇرات شۋنگۋلشين قاتىسىپ, ءسوز سويلەدى.
ۇستىمىزدەگى جىل ەل تاۋەلسىزدىگىنىڭ 25 جىلدىعىمەن تۇسپا-تۇس كەلىپ وتىرعانىن ايتا كەلە, مۇرات قوجاحمەتۇلى قازاقستاننىڭ الداعى دامۋىن ايقىندايتىن ەلباسىنىڭ «100 ناقتى قادام» – ۇلت جوسپارىن جۇزەگە اسىراتىنداردىڭ ءبىرى – وسى «نۇر وتان» پارتياسى ەكەنىن جانە كۇنى كەشە عانا ەلىمىزدە وتكەن قازاقستان رەسپۋبليكاسى پارلامەنتى ءماجىلىسى مەن بارلىق دەڭگەيلەردەگى ءماسليحات دەپۋتاتتارىنىڭ سايلاۋى بارىسىندا جەتەكشى پارتيا 84 پايىز داۋىسپەن جەڭىسكە جەتكەنىن اتاپ ءوتتى.
جيىن بارىسىندا تۇرعىن ءۇي ينسپەكتسياسى باسقارماسىنىڭ نەگىزگى مىندەتتەرىنە توقتالعان باسقارما باسشىسى ءاليحان قۋاتبەكوۆ «نۇر وتانعا» سەنىم بىلدىرۋشىلەر قاتارى كۇن ساناپ ارتىپ كەلە جاتقانىن جەتكىزدى.
ودان ءارى باستاۋىش پارتيا ۇيىمىنىڭ توراعاسى مەن بيۋرو مۇشەلەرى سايلاندى. ۇيىمنىڭ توراعاسى ەتىپ, باستاۋىش ۇيىمنىڭ مۇشەلەرى ءبىراۋىزدان اتالمىش باسقارمانىڭ باسشىسى ءاليحان قۋاتبەكوۆتى جانە بيۋرو مۇشەلىگىنە بەلسەندى ءۇش ادامدى سايلادى.
جيىن سوڭىندا «نۇر وتان» پارتياسىنىڭ جاڭا مۇشەلەرىنە پارتيا بيلەتتەرى تاپسىرىلدى. باستاۋىش پارتيا ۇيىمىنىڭ توراعاسى بولسا, جاستاردىڭ بولاشاعىنا سەنىم ءبىلدىرىپ, ولاردىڭ الدا اتقارار جۇمىستارىنا تەك ساتتىلىك تىلەدى.
گۇلبارشىن وكەشقىزى