ەلوردا پوليتسەيلەرى كامەلەتكە تولماعان جاسوسپىرىمدەر اراسىنداعى قۇقىقبۇزۋشىلىق پەن قىلمىستىڭ الدىن الۋ ماقساتىندا تۇراقتى تۇردە تەكسەرىس جۇرگىزىپ تۇرادى.
ءتارتىپ ساقشىلارى قابانباي باتىر كوشەسىندە كارانتين ەرەجەسىن بۇزىپ, تۇندە جۇمىس ىستەپ جاتقان «CYBER STRONG» كومپيۋتەر كلۋبىن تەكسەرگەن كەزدە كلۋبتا وتىرعاندار اراسىندا كامەلەت جاسىنا تولماعاندار بولعان. تۇنگى ۋاقىتتا ويىن-ساۋىق مەكەمەسىندە بولعانى, زاڭدى وكىلدەرىنسىز جۇرگەنى ءۇشىن جاسوسپىرىمدەردىڭ اتا-اناسى قر اقبتك-ءتىڭ 442-بابى 1-تارماعى بويىنشا اكىمشىلىك جاۋاپقا تارتىلدى.
نۇر-سۇلتان قالاسى پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسىنىڭ باستىعى گوسمان جاكين كامەلەتكە تولماعاندار جاساعان قىلمىستار سانى 37% ارتقانىن ايتتى. كامەلەتكە تولماعاندار اراسىنداعى قۇقىق بۇزۋشىلىقتاردىڭ ءوسۋ ستاتيستيكاسىنا جاسوسپىرىمدەر توبىنىڭ ينتەرنەت-الاياقتىق ارەكەتتەردى بىرنەشە رەت جاساۋى اسەر ەتكەن. «الاياقتىقتىڭ 62 فاكتىسىنىڭ 60-ى قر قىلمىستىق كودەكسىنىڭ 190-بابىندا كوزدەلگەن, ياعني 2017 جىلدان 2020 جىلعا دەيىنگى كەزەڭدە ءۇش ادامنان قۇرالعان جاسوسپىرىمدەر توبى جاساعان ارەكەتتەر. وسى قىلمىستىق ىستەر بويىنشا سوت ءىسىن جۇرگىزۋ 2020 جىلى اياقتالعاندىقتان, ولار تۋرالى مالىمەتتەر اعىمداعى جىلدىڭ ستاتيستيكاسىنا ەنگىزىلدى. كامەلەتكە تولماعانداردىڭ الكوگولدى تۇتىنۋىنىڭ پروفيلاكتيكالىق جۇمىستارى جالعاسۋدا. 2020 جىلدىڭ 6 ايىندا 21 جاسقا تولماعان ادامدارعا الكوگول ساتۋدىڭ 21 فاكتىسى انىقتالدى. 2020 جىلى ءىىو-دا تىركەلگەن 176 كامەلەتكە تولماعاننىڭ 29-ى الكوگولدىك ىشىمدىك ىشكەنى ءۇشىن ەسەپكە الىنعان» دەدى جەرگىلىكتى پوليتسيا قىزمەتى باسقارماسىنىڭ باستىعى. بۇعان قالاداعى مەكتەپ ينسپەكتورلارىنىڭ جەتىسپەۋى (17 ينسپەكتور جەتىسپەيدى), پروفيلاكتيكا ماسەلەلەردە ۆەدومستۆوارالىق ىنتىماقتاستىق ءالى دە ءتيىستى دەڭگەيدە قالىپتاسپاعاننىڭ اسەرى بارى انىق. سونداي-اق بۋكمەكەرلىك كەڭسەلەرگە قاتىستى ەرەجەنى دە كۇشەيتۋ كەرەك.
ىشكى ىستەر مينيسترلىگى كامەلەتكە تولماعاندار اراسىنداعى قۇقىق بۇزۋشىلىقتىڭ, قاراۋسىزدىقتىڭ جانە پاناسىزدىقتىڭ الدىن الۋ ماقساتىندا تۇراقتى تۇردە «ءجاسوسپىرىم», «تۇنگى قالاداعى بالالار», «ءجاسوسپىرىم-قۇقىق-قاۋىپسىزدىك» جەدەل-پروفيلاكتيكالىق ءىس-شارالار وتكىزەدى. وسى جىلى كامەلەتكە تولماعاندار تۇنگى ۋاقىتتا ويىن-ساۋىق مەكەمەلەرىندە نەمەسە ۇيدەن تىس جەرلەردە قاراۋسىز جۇرگەنى ءۇشىن 45 مىڭنان استام اتا-انا اكىمشىلىك جاۋاپكەرشىلىككە تارتىلدى (اكىمشىلىك كودەكستىڭ 442-بابى). پوليتسيادا ەسەپتە تۇرعان 6 مىڭ جاسوسپىرىممەن, سونداي-اق 8 مىڭ قولايسىز وتباسىمەن جەكە پروفيلاكتيكالىق جۇمىس جۇرگىزىلەدى (ولاردا 11 مىڭنان استام بالا تاربيەلەنەدى). جاسوسپىرىمدەردى ويىن-ساۋىق مەكەمەلەرىنە تۇنگى ۋاقىتتا قابىلداعان 550 كاسىپكەرگە اكىمشىلىك شارالار قولدانىلدى. بۇگىنگى كۇنى ىشكى ىستەر ورگاندارىندا 1450 كامەلەتكە تولماعاندار «قاراۋسىز قالعاندار» ساناتىندا تىركەلگەن. قاراۋسىز قالعان بالالار انىقتالعان كەزدە يۋۆەنالدى پوليتسيا قىزمەتكەرلەرى ولاردى پوليتسياعا اپارادى, ولاردىڭ جەكە باسىن, اتا-انالارىن نەمەسە زاڭدى وكىلدەرىن انىقتاۋ بويىنشا شارالار قابىلدايدى, سونداي-اق قاراۋسىز قالۋعا سەبەپتەر مەن جاعدايلاردى انىقتايدى. 3 ساعاتتان كەيىن ەگەر كامەلەتكە تولماعانداردى ونىڭ اتا-اناسىنا نەمەسە زاڭدى وكىلدەرىنە بەرۋ مۇمكىن بولماسا, ولاردى بەيىمدەۋ ورتالىعىنا جەتكىزەدى. وسى جىلدىڭ باسىنان بەرى پوليتسيا قىزمەتكەرلەرى 2425 ءجاسوسپىرىمدى ورتالىققا جەتكىزدى. كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسياعا بالالار قۇقىعىن بۇزۋ فاكتىلەرى بويىنشا يۋۆەنالدى پوليتسيانىڭ 4 مىڭنان استام ماتەريالى جىبەرىلدى. جالپى, اتا-انالاردىڭ بالا تاربيەسىندەگى مىندەتتەرىن ورىنداماعانى ءۇشىن شامامەن 3,5 مىڭ اتا-انا اكىمشىلىك جاۋاپكەرشىلىككە تارتىلعان (اكىمشىلىك كودەكستىڭ 127-بابى) جانە 400-دەن استامى اتا-انا قۇقىعىنان ايىرىلعان. بۇل كوپتەگەن اتا-انانىڭ ءوز مىندەتىنە مۇلدەم جاۋاپسىز قارايتىندىعىن كورسەتەدى.
