«بارىس» بيلەپ-توستەدى

استانانىڭ «بارىس» كومانداسى قۇرلىقتىق حوككەي ليگاسىنىڭ شەڭبەرىندە فينليانديانىڭ حەلسينكي قالاسىنان كەلگەن «يوكەريت» كومانداسىن قابىلدادى.

بۇدان بۇرىن 2018 جىلدىڭ 23 قاراشاسىندا حەلسينكي قالاسىندا وتكەن ويىندا ەسەسى كەتكەن «يوكەريت» بۇل ويىنعا بارىنشا دايىندالىپ-اق كەلىپتى. ونى العاشقى كەزەڭدەگى ەكپىنى اڭعارتتى. ەسەپتى الدىمەن 8-مينۋتتا قوناقتار اشتى. شايبا اۆتورى – ساكاري ماننينەن. بىراق اراعا ەكى مينۋت سالىپ ايدىن يەلەرى تارازى باسىن تەڭەستىرىپ كەتتى. انتون ساگادەەۆ­تىڭ ىڭعايلى پاسىن ءاليحان اسەتوۆ تورعا ءدال ءتۇسىردى.
ەكىنشى كەزەڭنىڭ باسىندا برەندون بوچەنسكي كومانداسىن العا شىعاردى. بۇعان قوناقتار ساپىنان پەتەر رەگين جاۋاپ قاتتى. الايدا استانالىق اندرە پەتەرسسون 38-مينۋتتا ءۇشىنشى شايبانى سوعىپ كەتتى.
ال ءۇشىنشى كەزەڭدە «بارىس» تولىعىمەن بيلەپ-ءتوس­تەدى. باس-اياعى بەس مينۋتتىڭ ىشىندە ءتورت شايبا سالىپ تاستادى. ەرەكشەلەنگەندەر – رومان ستارچەنكو, اندرە پەتەرسسون, نيكيتا ميحايليس, ەگور پەتۋحوۆ. ويىن نۇكتەسىن 50-مينۋتتا مەتتيۋ فرەتتين قويدى. جالپى ەسەپ – 8:2.
بۇل ويىندى «بارىس ارەنا» مۇز سارايىندا 9263 كورەرمەن تاماشالادى.
«بارىس» وسىمەن «يوكەريت» كومانداسىمەن 9-رەت كەزدەستى. سونىڭ التاۋىندا استانالىقتار جەڭىسكە جەتسە, ۇشەۋىندە «يوكەريت» باسىم تۇسكەن.