نۇر-Cۇلتان قالاسىنداعى ازىرەت-Cۇلتان مەشىتىنىڭ اشىلعانىنا 8 جىل تولدى. شەتەلدىكتەردى ۇلتتىق ناقىشىمەن تامساندىرعان مەشىت – ەلورداداعى ءزاۋلىم عيماراتتاردىڭ بىرەگەيى. الەمدەگى ىرگەلى عيبادات ۇيلەرىنىڭ بىرىنە جاتاتىن اتالمىش رۋحاني ورداعا 2 مىڭ ادام سىيادى. مەشىتتىڭ تاۋەلسىزدىك داڭعىلىندا, بەيبىتشىلىك پەن كەلىسىم سارايى جانە تاۋەلسىزدىك سارايى ورتاسىندا ورنالاسۋىنىڭ ءوز ءمانى بار.
ازىرەت سۇلتان – ورتالىق ازياداعى ەڭ ادەمى ءارى ەڭ ءزاۋلىم مەشىت. ەلباسىنىڭ باستاماسىمەن ەكى جىل ىشىندە سالىنىپ بىتكەن مەشىتتىڭ قۇرىلىسىن تۇركيانىڭ سەمبول ينشاات كومپانياسى جۇرگىزگەن. قازاقستاننىڭ قۇرمەتتى ساۋلەتشىسى, مەملەكەتتىك سىيلىق لاۋرەاتى ساعىندىق جانبولاتوۆ پەن قر سۋرەتشىلەر وداعى مەن ەۋرازيالىق ديزاينەرلەر وداعىنىڭ مۇشەسى ەسەنعالي احمەتوۆتىڭ جوبالاۋىمەن سالىنعان يماندىلىق ورداسىنىڭ ءاۋ باستاعى سىزبالىق كونكۋرسىنا الەمنىڭ 54 كومپانياسى ۇسىنىس بىلدىرگەن ەكەن. مەشىت جوباسىن نۇرسۇلتان نازارباەۆتىڭ ءوزى تاڭداپ العان بولاتىن.
ەكى جىلعا سوزىلعان مەشىتتىڭ قۇرىلىسىنا 100-دەن استام جەرگىلىكتى جانە شەتەلدىك قۇرىلىس كومپانيالارى اتسالىستى. قۇرىلىسقا قاجەتتى زاتتار الەمنىڭ 11 ەلىنەن اكەلىندى. ۇلكەن ناماز زالىنداعى بيىكتىگى – 51, ەنى 28 مەترلىك كۇمبەزدى ورتالىق ازياداعى ەڭ ۇلكەنى ەكەنىن ايتا كەتۋ كەرەك. اينەگى تازا حرۋستالدان, نەگىزگى بولىگى جەزدەن جاسالعان سالماعى 3 توننالىق ليۋسترا ارنايى وسى مەشىت ءۇشىن دايىندالعان.
عيبادات ءۇيىنىڭ ءبىرىنشى قاباتىندا ەكى نەكە زالى جانە 500 ادامعا ارنالعان اسحانا بار. مەشىتتىڭ ەكىنشى قاباتىندا ەرلەردىڭ ناماز وقۋ زالى ورنالاسسا, ءۇشىنشى قاباتىندا يمامدار بولمەسى مەن سىنىپتار, ءدىني باعدارلاما تۇسىرەتىن ستۋديا بار. ايەلدەرگە ارنالعان نامازحانا زالى – ءۇشىنشى قاباتتا.
بۇگىندە كيەلى ورىن شەتەلدىك مارتەبەلى مەيمانداردىڭ ارنايى كەلەر يماندىلىق ورداسىنا اينالعان, – دەيدى ازىرەت سۇلتان مەشىتىنىڭ باس يمامى ەربولات ءجۇسىپوۆ.
2012 جىلى 6 شىلدەدە ەلباسى نۇرسۇلتان نازارباەۆتىڭ قاتىسۋىمەن مەشىتتىڭ اشىلۋ سالتاناتى ءوتتى. تۇڭعىش پرەزيدەنت مەشىتكە سالماعى 40 كەلى بولاتىن كونە قۇران كارىمدى سىيعا تارتتى.
نايما نۇرالى
