ەلورداداعى بالالار جانە جاسوسپىرىمدەر كىتاپحاناسىندا سارىارقا اۋدانى اكىمدىگى مەن ورتالىقتاندىرىلعان كىتاپحانالار جۇيەسىنىڭ قولداۋىمەن «قاراشاڭىراق» قوعامدىق بىرلەستىگى ۇيىمداستىرعان «تاۋەلسىزدىك – التىن دىڭگەگىم» اتتى شىعارما جازۋدان باستاۋىش سىنىپ وقۋشىلارى اراسىندا وتكەن بايقاۋدىڭ جەڭىمپازدارى ماراپاتتالدى.
اتالعان بايقاۋعا قالا مەكتەپتەرىندەگى وقۋشىلاردان 80-گە جۋىق شىعارما كەلىپ تۇسكەن. سونىڭ اراسىنان قازىلار القاسى 13 شىعارمانى ىرىكتەپ الدى. مادەني شاراعا سارىارقا اۋدانىنىڭ اكىمى ەسەت بايكەن دە قاتىسىپ, جينالعان قاۋىمدى ۇلى مەرەكە – تاۋەلسىزدىك كۇنىمەن قۇتتىقتاپ, سايىستا توپ جارعان وقۋشىلارعا العىس حات تاپسىردى. سونىمەن بايقاۋدىڭ باس جۇلدەسىن ازاتتىق جايىندا مازمۇندى شىعارما جازعان ءاليحان بوكەيحان اتىنداعى №76 مەكتەپ-ليتسەيدىڭ 3 «ك» سىنىپ وقۋشىسى ناۋرىزباي نۇراسىل جەڭىپ الدى. ءبىرىنشى ورىندى ءىلياس جانسۇگىروۆ اتىنداعى №58 مەكتەپ-گيمنازيانىڭ 3 «گ» سىنىپ وقۋشىسى بولات عازيز يەلەنسە, ەكىنشى ورىن – ساكەن سەيفۋللين اتىنداعى №80 مەكتەپ-گيمنازيانىڭ 3 «د» سىنىپ وقۋشىسى ديانا نۇرماعامبەتوۆاعا بۇيىردى. ءۇشىنشى ورىندى №62 مەكتەپ-گيمنازيانىڭ 1 «ك» سىنىپ وقۋشىسى مانسۇر گاليۋلين الدى. سونداي-اق بايقاۋعا بەلسەنە قاتىسقان ءبىر توپ جەتكىنشەككە دە العىس حات پەن سىيلىق تابىس ەتىلدى. ءىس-شارا سوڭى سازدى ءان مەن كۇيگە ۇلاستى.
