«استانا» باسكەتبول كلۋبى ۆتب بىرىڭعاي ليگاسىندا بەلارۋستان كەلگەن «تسموكي-مينسك» كومانداسىن 77:59 ەسەبىمەن جەڭدى.
قارسىلاس كوماندا جاڭا جىل باستالعالى ءالى جەڭىستىڭ ءدامىن تاتىپ كورمەدى. ال استانالىقتاردىڭ بولسا, كەرىسىنشە, قارقىندارى كۇشەيىپ, جەڭىستى ساتتەرى كوبەيدى. ناتيجەسىندە پلەي-وفف كەزەڭىنە وتۋگە مۇمكىندىك تۋدى.
بۇل كەزدەسۋدە «استانانىڭ» اتىن وزدىرىپ, ەڭ ناتيجەلى ويىن كورسەتكەندەر 16 ۇپايمەن لەونيداس كاسەلاكيس, 14 ۇپاي جيناعان يكە ۋدانو جانە 12 ۇپايدان العان ەنتوني كلەممونس پەن لارري گوردون بولدى.
«استانانىڭ» كەلەسى ويىنى 5 ناۋرىز كۇنى قازاقستان كۋبوگى شەڭبەرىندە «توبىلعا» قارسى وتەدى. ال ۆتب اياسىندا 11 ناۋرىز كۇنى «حيمكي» كومانداسىن قابىلدايدى.
ورىنبەك وتەمۇرات
