25 مامىردا بارلىق بالاقايلار وقۋ جىلىن اياقتاپ, بوركىن اسپانعا اتتى. اتا-انالارى دا قۋانىشتى كۇندى اسىعا كۇتتى. الايدا قاراعاندىلىق 11 جاسار بالانىڭ اتا-اناسى قايعىدان قان جۇتتى. قاتتى سوققان جەل ورتالىق ساياباقتاعى ۇرلەنگەن باتۋتتى توڭكەرىپ, سونىڭ ناتيجەسىندە ءبىر بالا كوز جۇمدى. تاعى ەكى بالا ءارتۇرلى جاراقاتىمەن اۋرۋحاناعا ءتۇستى. قازىر وسى وقيعاعا وراي, قىلمىستىق كودەكستىڭ 306-بابى, 3-تارماعى بويىنشا قىلمىستىق ءىس قوزعالىپ, تەرگەۋ ءجۇرىپ جاتىر.
كوپ ۇزاماي-اق اجال اكەلگەن باتۋتتىڭ قوجايىنى انىقتالدى. ول جاي ادام ەمەس, قاراعاندى وبلىستىق توتەنشە جاعدايلار دەپارتامەنتىنىڭ جەدەل قۇتقارۋ بولىمشەسىنىڭ باستىعى بولىپ شىقتى. اتتراكتسيون بيزنەسى ونىڭ زايىبىنىڭ اتىنا جازىلعانىمەن, كۇيەۋى ۋاقىتشا اباقتىعا قامالدى. سەبەبى تەرگەۋشىلەر ءىس جۇزىندە باتۋتتىڭ قىزمەتىن وتاعاسىنىڭ ءوزى جۇرگىزگەنىن انىقتاعان. جۇمىس كۇندەرى ادامداردى قۇتقارىپ, دەمالىس كۇندەرى باتۋتپەن تابىس تاپقان 40 جاستاعى ازاماتتىڭ تاعدىرىن ەندى سوت شەشەدى.
ايتپاقشى, وتكەن جىلى ەلورداداعى «جاننۇر» ساۋدا ءۇيىنىڭ الدىنداعى باتۋت 20 مەتر جەرگە دەيىن ۇشىپ, اپاتتان 5 بالا زارداپ شەككەن. تورتەۋى جانساقتاۋ بولىمىنە تۇسكەن ەدى. وقىس وقيعاعا كۋا بولعان ءبىر ادام انالار مەن بالالاردىڭ جانۇشىرا ايقايلاعان داۋىستارىن, قۇتقارۋشىلاردىڭ باتۋتتى تىلگىلەپ, بالالاردى قالاي ىزدەگەنىن جازدى. ول جەردەگى قاراپايىم تۇرعىنداردىڭ ەرلىگىن كۇللى جيىلعان جۇرت كوردى.
بيىل جىل باسىنان بەرى باس قالادا 11 ۇرلەنەتىن باتۋت جۇمىسىن توقتاتتى. قالا باسشىلىعى توتەنشە جاعدايلار دەپارتامەنتىمەن بىرلەسىپ, «ەلوردالىق», «جەتىسۋ», «جەرۇيىق», «ستۋدەنتتەر» ساياباعىنىڭ اكىمشىلىگىمەن جۇمىس جۇرگىزدى. قازىر اكىمدىك قايعىلى وقيعادان سوڭ, ساۋدا ۇيلەرىنىڭ, ساۋدا-ساتتىق جانە ويىن-ساۋىق ورتالىقتارىنىڭ اۋماعىنا كوڭىل كوتەرەتىن اتتراكتسيونداردى ورناتۋعا رۇقسات بەرمەيدى.
قاۋىپسىزدىك شارالارىنىڭ قولعا الىنعانى دۇرىس-اق. دەگەنمەن قۇزىرلى مينيسترلىك پەن سالانىڭ ماماندارى سول قاۋىپسىزدىكتى 11 جاسار بالا اجال قۇشپاي تۇرىپ نەگە ويلانبادى ەكەن دەيسىڭ… تاعى ءبىر قىنجىلتاتىنى, بىزدە مەملەكەتتىك قىزمەتشىلەر زاڭدى بەلدەن ءبىر باسىپ قويىپ, بيزنەسپەن اينالىسىپ ءجۇر. بۇعان قاتاڭ توسقاۋىل قويۋ كەرەك. ايتپەسە, قوعامداعى بىلىق-شىلىق تا, بالا ءولىمى دە ازايمايدى.
