ەلوردالىق جاۋىنگەرلەر دامىلسىز تىرلىكتىڭ كولەڭكەلى جاعىمەن ءجيى ۇشىراسادى. كەز كەلگەن ساتتە, كەز كەلگەن قيىندىققا دايىن بولۋ – سول ءۇشىن دە ماڭىزدى.
سۋرەتتە 5573 اسكەري ءبولىمىنىڭ قوس ساربازى – قايىربولات پەن نيكولاي. ەكى دوس كەستە بويىنشا كەزەكتى دەمالىستارىن العان بولاتىن. ولار جەڭىس داڭعىلى مەن ءا.مولداعۇلوۆا كوشەسىنىڭ قيىلىسىنا جاقىن ماڭداعى اۋلالاردان ءوتىپ بارا جاتىپ, قۇبىردىڭ جانىندا ءبىر ازاماتتىڭ تۇرعانىن كورەدى. پاناسىزداردىڭ ءبىرى بولار دەپ ويلايدى. قاسىنان ءسال ۇزاي بەرگەندە, ەكەۋى ىڭىرسىعان داۋىستى ەستيدى. كەنەت قۇبىرلاردىڭ استىنان ەڭكەيىپ قاراعاندا, تەرىس قاراپ جاتقان بىرەۋدى بايقايدى. انىقتاپ قاراسا, الگى ادامنىڭ شالبارى شەشىلگەن ەكەن. «ول كورىنىستى سوزبەن ايتۋ بىزگە قيىن. شۇعىل ارەكەت ەتپەۋ مۇمكىن ەمەس ەدى. ادام شىداپ تۇرا المايدى. ونى كورگەن بويدا ەكى قولىن ارتىنا قايىرىپ تاستادىق» دەيدى قاتارداعى ق.زاكاريەۆ. سويتسە, ەڭگەزەردەي ەكەۋ اي-كۇننىڭ امانىندا كىپ-كىشكەنتاي عانا ءبۇلدىرشىندى زورلاعان ەكەن. ۇلاندىقتار الگى ەر ادامدى ءالسىز بالاقايعا ءزابىر كورسەتىپ جاتقان جەرىنەن جۇلىپ العان. وسى ەكى ارادا ارام ويىن جۇزەگە اسىرىپ بولىپ, قۇبىر جانىندا تۇرعان ەكىنشىسى قاشىپ ۇلگەرىپتى. قاتارداعى ن.شپادوۆ دەرەۋ ۇزاقتان ءوتىپ بارا جاتقان جاس جىگىتتى توقتاتىپ, ۇيالى تەلەفونىنان 102 ءنومىرىن تەرەدى. ىشكى ىستەر ورگاندارىنا قاشقان ادامدى سۋرەتتەپ, بەت العان باعىتىن, بولعان وقيعانى حابارلايدى. ناتيجەسىندە, ءتارتىپ ساقشىلارىنان قۇتىلماق بولعان ول دا كوپ ۇزاماي قولعا تۇسەدى.
تەكسەرۋ بارىسىندا ايۋاندىققا جول بەرگەن ەكەۋدىڭ ىشىمدىك ىشكەنى انىقتالدى. «مەن بۇل بوزبالالاردى كەرەك ۋاقىتىندا قىزىمنىڭ قاسىنان تابىلعان قوس پەرىشتەسى دەپ ەسەپتەيمىن. ەگەر ولار وقيعانىڭ ءدال ۇستىنەن ءتۇسىپ, دەرەۋ تۇتقىنداماعاندا, الگىلەر قىلمىستىڭ ءىزىن جويۋ ءۇشىن قىزىمدى ءولتىرىپ كەتەر مە ەدى؟..» دەيدى ءزابىر كورگەن ءبۇلدىرشىننىڭ اكەسى.
قىلمىسكەرلەردى قۇرىقتاۋ كەزىندە كورسەتكەن قىراعىلىعى ءۇشىن قوس جاۋىنگەر قر ۇلتتىق ۇلان باس قولباسشىسىنىڭ بۇيرىعىمەن ءىى دارەجەلى «ۇلتتىق ۇلان قىزمەتىنىڭ ۇزدىگى» كەۋدە بەلگىسىمەن ناگرادتالدى. بار بولعانى جەتى جاسار قىز بالانىڭ تاعدىرىنا بالتا شاپقان, وزدەرىنەن ەكى ەسە ۇلكەن 38, 39 جاستاعى وپاسىز جانداردى قۇقىق قورعاۋشىلارعا ۇستاپ بەرگەن قوس جاۋىنگەر قانداي قۇرمەتكە بولسا دا لايىق.
گۇلميرا ايماعانبەت
