جالىن اراسىنان الىپ شىقتى

استانالىق ءورت ءسوندىرۋشى اسحات سالكەەۆ جۋىردا بولعان ورتتەن ەكى بىردەي جاندى امان الىپ شىقتى.

6 شىلدە كۇنى ەلوردالىق ءورت ءسوندىرۋ قىزمەتىنە قالانىڭ شەتكى اۋدانىندا ورنالاسقان جاتاقحانالاردىڭ بىرىنەن ءورت شىققاندىعى تۋرالى اقپارات كەلىپ تۇسكەن. جەدەل اتتانعان بريگادا ءاپ-ساتتە 200 ادامدى ەۆاكۋاتسيالايدى.
وسى كەزدە تومەنگى قاباتتا ءبىر قىزدىڭ قالىپ قويعانى انىقتالادى. ونى امان الىپ شىعۋ اسحاتتىڭ موينىنا جۇكتەلەدى.
– سول كۇنى ەلەكتر جەلىلەرىنەن شىققان ءورتتىڭ ءتۇتىنى بەسىنشى قاباتقا دەيىن كوتەرىلگەن. ءبىرىنشى قاباتتا تۇراتىن قىز ءدالىز ءتۇتىن بولىپ جاتقاندىقتان شىعا الماي قالعان. ونىڭ ۇستىنە تەرەزەلەرى تەمىردەن قورشالعان. مەن قىزمەتتىك جەدەلساتى ارقىلى ءبىرىنشى قاباتتىڭ تەرەزەسىنە بارىپ, ارنايى قۇرالمەن تەمىر قورشاۋدى بۇزىپ, ىشكە كىردىم. ىشتە قالىپ قويعان قىزدى تەرەزە ارقىلى امان-ەسەن ارىپتەستەرىمە تابىستادىم, – دەيدى ول.
كەنەت ىشتە تاعى ءبىر ەر ادامنىڭ بارىن ەستيدى. ناقتىراق ايتقاندا, 5-قاباتتا تۇراتىن مۇگەدەك جان جالعىز قالىپ قويعان ەكەن. اسحات تاعى دا ءومىرىن قاۋىپكە تىگىپ, جوعارى قاباتقا جۇگىرەدى. بولمەگە كىرگەن بويدا, كەرۋەتتە جاتقان كىسىنى ارقاسىنا مىنگىزىپ الىپ, ساناۋلى سەكۋندتاردا تومەنگە ءتۇسىپ ۇلگەرەدى.
– اۋا تولتىرىلعان جابدىقتى كيىپ الىپ, جوعارىعا كوتەرىلدىم. ءوز اياعىمەن جۇرە المايتىن كىسى شاراسىزدىقتان كەرۋەتتە جاتىر ەكەن. ابىروي بولعاندا, ەكەۋمىز دە ءدىن امان شىقتىق, – دەيدى اسحات تولەگەنۇلى.
شىنىن ايتقاندا, الگى كىسىنىڭ 55-60 جاستا ەكەنىن اسحات كەيىننەن بىلگەن. ويتكەنى, ءار سەكۋند قىمبات بولعان سوڭ, تۇرىنە, جاسىنا قاراۋعا مۇمكىندىك بولمايتىن كورىنەدى.
ءورت ءسوندىرۋ قىزمەتى جالىندى وشىرگەن سوڭ, تۇرعىندار ءۇي-جايلارىنا تاراي باستاعان. مۇگەدەك ارباسىنا تانىلعان الگى كىسىنى اسحات سالكەەۆ قايتادان ءوزى ارقالاپ, بولمەسىنە جەتكىزگەن. جوعارى قاباتقا كوتەرىلگەندە, الگى كىسىنىڭ «راقمەت, بالام!» دەگەن داۋىسى اسحاتتىڭ ءوز قىزمەتىنە دەگەن جاۋاپكەرشىلىگىن ودان سايىن ارتتىرا تۇسكەندەي.

گۇلميرا ايماعانبەت