جاقىندا استانادا ەلدىڭ ەسىندە قالاتىن ەكى شارا ءوتتى. ونىڭ ءبىرى – ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جىل سايىنعى مەكتەپ ءبىتىرۋشى تۇلەكتەرگە ارنالعان «اشىق ەسىك كۇنى» بولسا, ەكىنشىسى – كۇيشى, جاس دارىن ايبەك بەكبوسىننىڭ «ماڭگىلىك» اتتى تۇڭعىش شىعارماشىلىق كەشى جانە كۇيتاباعىنىڭ تۇساۋكەسەرى.
سول كۇنى استاناداعى 1 مىڭ 500 ادامعا ارنالعان كونگرەسس-حولدىڭ اتشاپتىرىم زالىنا اسىققان ادامداردىڭ سانىندا ەسەپ بولمادى. اسىرەسە, جۇزدەرى جادىراعان جاستار كوكتەممەن بىرگە قۇلپىرىپ, ونەر سارايىن بەتكە الىپ بارا جاتتى.
سالتاناتتى شارانى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, تاريح عىلىمدارىنىڭ دوكتورى, پروفەسسور, قر ۇعا كوررەسپوندەنت مۇشەسى ەرلان سىدىقوۆ اشتى.
وقۋ ورنى وزدەرىنىڭ «ەۋرازيا ۋنيۆەرسيتەتى» گازەتىنىڭ ءبىر سانىن 13 فاكۋلتەتتەگى ماماندىقتارعا ارناپتى, ودان بولەك ارنايى بۋكلەتتەر شىعارعان.
رەكتوردىڭ مالىمدەۋىنشە, بارلىق سالادا ىلگەرىلەۋشىلىك بار. سوڭعى جىلدارى ۋنيۆەرسيتەت گرانت يەگەرلەرىنىڭ وقۋ ورنىن تاڭداۋى بويىنشا كوش باسىندا. «التىن بەلگى» يەگەرلەرى مەن رەسپۋبليكالىق جانە حالىقارالىق وليمپيادا جەڭىمپازدارى سۇرانىسقا يە, بىلىكتى مامان ۇستاحاناسى رەتىندە ەلوردانىڭ باستى وقۋ ورنىن قولايلى كورەدى.
ۋنيۆەرسيتەت قۇرامىنا جالپى سانى 36 عىلىمي-زەرتتەۋ ينستيتۋت, عىلىمي ورتالىق جانە زەرتحانالار قارايدى. ەلباسىنىڭ باستاماسىمەن م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ قازاقستاندىق فيليالى اشىلعان.
ۋنيۆەرسيتەتتە شەتەلدىك مەملەكەت باسشىلارى, نوبەل سىيلىعىنىڭ لاۋرەاتتارى, الەمگە تانىمال اتاقتى عالىمدار مەن قايراتكەرلەردىڭ ءجيى كەلىپ, ستۋدەنتتەر مەن وقىتۋشىلار الدىندا ءدارىس وقۋى داستۇرگە اينالعان. مۇنداي كەزدەسۋلەر ستۋدەنتتەر مەن وقىتۋشىلاردىڭ جالپى مادەني, ينتەللەكتۋالدىق جانە ساياسي دەڭگەيىن كوتەرۋگە اسەرىن تيگىزىپ, ۋنيۆەرسيتەتتىڭ حالىقارالىق دەڭگەيدەگى بەدەلىن كوتەرۋدە.
الەمنىڭ كوپتەگەن جەتەكشى ۋنيۆەرسيتەتتەرىمەن اراداعى قارىم-قاتىناس نىعايىپ كەلەدى. اكادەميالىق اۋىسىممەن, باسقا دا ءتۇرلى باعدارلامالار اياسىندا ستۋدەنتتەرگە شەت ەلدەردە ءبىلىم الۋعا كەڭ مۇمكىندىكتەر قاراستىرىلعان. بۇل جەتىستىكتەر – ۋنيۆەرسيتەتتىڭ ءبىلىم بەرۋ دەڭگەيىنىڭ ارتا تۇسكەندىگى جانە الەمدىك ستاندارتتارعا ساي دامىپ كەلە جاتقاندىعىنىڭ ناقتى كورىنىسى.
قومسىنباي ايتاتىن تاعى ءبىر جەتىستىك – بيىل ەۋرازيا ۇلتتىق ۋنيۆەرسيتەتى الەمدەگى جوعارى وقۋ ورىندارى اراسىندا ۇزدىك ەلۋلىك قاتارىنا ەندى. ءبىلىم بەرۋدى باعالاۋ باعىتىنداعى QS (Quacquarelli Symonds) حالىقارالىق كومپانياسىنىڭ سوڭعى QS Top 50 Under 50 رەيتينگىنىڭ ناتيجەسى بويىنشا قۇرىلعانىنا ەلۋ جىل تولماعان الەمنىڭ 50 جوو اراسىنان 32-ورىنعا تۇراقتادى. بۇل كورسەتكىش (QS Top 50 Under 50) – جوعارى وقۋ ورىنداردىڭ عىلىمي-زەرتتەۋ قىزمەتىنىڭ بەلسەندىلىگى مەن ساپاسى, وقىتۋ جانە ينتەرناتسيونالداندىرۋ, مانساپ الەۋەتى, جۇمىس بەرۋشىلەردىڭ پىكىرى جانە باسقا دا بەلگىلەر ارقىلى سالىستىرۋ جاساۋعا مۇمكىندىك بەرەدى.
قاي كەزدە دە كوش باسىنان كورىنىپ كەلە جاتقان ەۋرازيا ۇلتتىق ۋنيۆەرسيتەتى پرەزيدەنتتىڭ «التىن ساپا» سىيلىعىن دا يەلەنىپ, بىلتىر «QS World University Rankings» رەيتينگى بويىنشا الەمنىڭ كەڭىنەن تانىلعان 400 ۇزدىك ۋنيۆەرسيتەتى ءتىزىمى ىشىندە 303-ءشى قاتاردان كورىنگەن بولاتىن. ال ءوز ەلىمىزدە ءبىلىم بەرۋ ساپاسى جونىندەگى تاۋەلسىز اگەنتتىكتىڭ قورىتىندىسى بويىنشا قازاقستانداعى جوعارى وقۋ ورىندارى اراسىندا قاتارىنان ەكى جىل ءبىرىنشى ورىنعا شىقتى. جاقىندا عانا ەۋرازيا ۇلتتىق ۋنيۆەرسيتەتى ءبىلىم بەرۋ ساپاسى بويىنشا وتكەن بايقاۋدا تمد سىيلىعىنىڭ يەگەرى اتاندى. ۋنيۆەرسيتەت ەلىمىزدەگى ءبىلىم وردالارى اراسىنان مۇنداي قۇرمەتكە تۇڭعىش رەت قول جەتكىزىپ وتىر. پرەزيدەنتتىڭ بىرەر جىل بۇرىنعى جوعارى وقۋ ورىندارىنىڭ بازاسىندا زەرتتەۋ قىزمەتىن قايتا جاڭعىرتۋ تۋرالى تاپسىرماسىن ەسكەرسەك, ۋنيۆەرسيتەتتىڭ يننوۆاتسيالىق پاركى مەن عىلىمي زەرتتەۋ ينستيتۋتتارى ەل ەكونوميكاسىنا, وندىرىسىنە قاجەت عىلىمي جوبالاردى جۇزەگە اسىرا باستاعانىن ايتپاي كەتۋگە بولماس. 2013 جىلى عىلىمي زەرتتەۋلەرگە 1,6 ملرد تەڭگە قاراستىرىلىپ, 180 عىلىمي جوبا قارجىلاندىرىلدى. وعان وقۋ ورنىنىڭ 660 عالىمى تارتىلدى. ەۇۋ يننوۆاتسيالىق پاركى مەن قىزىلوردا وبلىسى اكىمدىگى اراسىندا ءوزارا ىنتىماقتاستىق جونىندەگى كەلىسىمگە قول قويىلعان. قازىرگى كۇنى سول قۇجاتتىڭ شەڭبەرىندە بىرنەشە عىلىمي جوبا ىسكە قوسىلدى. ال شىعىس قازاقستان وبلىسىندا كاربيد كرەمني ءوندىرىس زاۋىتى جوباسىن سالۋدان بولەك, بەسقاراعاي اۋدانىندا اعاش قالدىقتارىن كادەگە جاراتاتىن شاعىن زاۋىتتىڭ قاناتقاقتى جوباسى قولعا الىندى. سونىمەن قاتار, كوكشەتاۋدا «شۋچينسك-بۋراباي-زەرەندى» دەمالىس ايماعىنىڭ ەنەرگەتيكالىق ينفراقۇرىلىمىن «جاسىل تەحنولوگياعا» كوشىرۋ جۇمىستارى جۇرگىزىلىپ جاتىر.
بۇل جەتىستىكتەر – ۋنيۆەرسيتەتتىڭ ءبىلىم بەرۋ دەڭگەيى مەن عىلىمي ىزدەنىستەرگە تولى بەلسەندىلىگىنىڭ ارتا تۇسكەندىگى جانە الەمدىك ستاندارتتارعا ساي دامىپ كەلە جاتقاندىعىنىڭ ناقتى كورىنىسى.
مىنە, وسىنىڭ ءبارى بۇگىنگى – تالاپكەر, ەرتەڭگى ستۋدەنتتەر ءۇشىن!
بازاربەك تۇكىباي,
قازاقستان جۋرناليستەر وداعىنىڭ مۇشەسى
