«استانا وپەرا» تەاترىندا بيبىگۇل تولەگەنوۆانىڭ XI حالىقارالىق ۆوكاليستەر بايقاۋىنىڭ سالتاناتتى ماراپاتتاۋ ءراسىمى مەن فيناليستەر كونتسەرتى ءوتتى. جاس ءانشى دىنمۇحامەد كوشكىنباەۆ جەڭىمپاز اتاندى.
– بارشا قاتىسۋشىلاردى, دارىندى, بەلسەندى, ارتىستىك قابىلەتكە يە جاس انشىلەردى شىن جۇرەكتەن قۇتتىقتايمىن! بيىلعى بايقاۋ وتە ءماندى, مازمۇندى بولدى, بارلىق ورىنداۋشىلار دايىندىقتارىنىڭ جوعارى دەڭگەيىن پاش ەتتى. ۇزدىكتەردىڭ ۇزدىگىن تاڭداۋ وڭاي بولعان جوق, بۇل سوزىمە قازىلار مۇشەلەرى دە قوسىلادى دەپ ويلايمىن, دەگەنمەن ەڭ مىقتى جەڭىسكە جەتتى. وسىناۋ بايقاۋ ارقىلى اسقاق ونەردىڭ عاجاپ الەمىنە جول تارتقان جانداردىڭ كاسىبي تاعدىرىن ۇنەمى باقىلاپ وتىرامىز, – دەپ اتاپ ءوتتى ءحى حالىقارالىق ۆوكاليستەر بايقاۋىنىڭ ءادىل قازىلار ءتورايىمى, كسرو حالىق ءارتىسى, سوتسياليستىك ەڭبەك ەرى, كسرو مەن قازاقستاننىڭ مەملەكەتتىك سىيلىقتارىنىڭ لاۋرەاتى بيبىگۇل تولەگەنوۆا.
ەستەرىڭىزگە سالا كەتسەك, بيبىگۇل تولەگەنوۆانىڭ حالىقارالىق بايقاۋى 2001 جىلدان بەرى ءداستۇرلى تۇردە ەكى جىلدا ءبىر رەت وتكىزىلىپ كەلەدى. بيىل بايقاۋدىڭ 20 جىلدىعى قازاقتىڭ بۇلبۇلى بيبىگۇل تولەگەنوۆانىڭ شىعارماشىلىق قىزمەتىنىڭ 70 جىلدىعى جانە ەل تاۋەلسىزدىگىنىڭ 30 جىلدىعىمەن تۇسپا-تۇس كەلدى. ەكى كەزەڭنەن تۇراتىن بيبىگۇل تولەگەنوۆانىڭ XI حالىقارالىق ۆوكاليستەر بايقاۋىنا قاتىسۋعا ەلۋدەن استام ۇمىتكەر ءوتىنىم بەردى. ولاردىڭ باسىم بولىگى قازاقستان, رەسەي, قىرعىزستان, باشقۇرتستان جانە وزبەكستاننان كەلىپ ءتۇستى.
قورىتىندى كەشتە قازىلار القاسى ەڭ ءبىرىنشى بايقاۋ جەڭىمپازدارىن جاريالادى. ودان كەيىن جۇرتشىلىق نازارىنا تارتىمدى باعدارلاماعا قۇرىلعان گالا-كونتسەرت ۇسىنىلدى, وعان وتاندىق جانە شەتەلدىك كلاسسيكانىڭ ۇزدىك ۇلگىلەرى ەندى. بايقاۋ لاۋرەاتتارى نۇر-سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسى سيمفونيالىق وركەسترىنىڭ سۇيەمەلدەۋىمەن ونەر كورسەتتى.
سونداي-اق «استانا وپەرا» تەاترى جەڭىمپازدارعا جەكە سىيلىق تابىستادى. تەاتر ديرەكتسياسى اتىنان ارنايى جۇلدە – Astana Opera حالىقارالىق وپەرا اكادەمياسىندا اي سايىنعى ستيپەنديامەن وقۋعا ارنالعان سەرتيفيكات دىنمۇحامەد كوشكىنباەۆ پەن اسەم اۋباكىروۆاعا بۇيىردى.
ءبىرىنشى ورىن لاۋرەاتتارى – گابريەل دە-رەل (رەسەي), اتابەك نازيروۆ (وزبەكستان), ءاليحان زەينوللا (قازاقستان), ەكىنشى ورىن لاۋرەاتتارى – ۇلپان اۋباكىروۆا (قازاقستان), ازيزا مۋحامەدوۆا (وزبەكستان), اسەم اۋباكىروۆا (قازاقستان) اتاندى. ال ەلوردانىڭ ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ سوليستەرى, حالىقارالىق جانە رەسپۋبليكالىق بايقاۋلاردىڭ لاۋرەاتتارى داريعا مۋساەۆا جانە التىنبەك ءابىلدا جۇلدەلى ءۇشىنشى ورىندى يەلەندى.
