دەنيس تەن جانە ونىڭ دوستارى 1000-عا جۋىق جانكۇيەرىن قۋانتتى. شارا استانانىڭ 20 جىلدىعىنا وراي قر مادەنيەت جانە سپورت مينيسترلىگى مەن استانا قالاسى اكىمدىگىنىڭ قولداۋىمەن ءوتتى. تىپىرشىپ وتىرىپ, دەنيس مۇزعا شىققاندا شاتتانىپ كەتتىك. ءوزى قالاقتاي عانا. سويتە تۋرا, مۋزىكا اۋەنىمەن بارىنشا سوزىلادى. مۇزدا ەمەس, كىلەمدە جۇرگەندەي قۇددى.
مۇز شوۋى ءمانەرلەپ سىرعاناۋشى, سوچي وليمپياداسىنىڭ قولا ءجۇلدەگەرىنىڭ «دەنيس تەن جانە ونىڭ دوستارى» اتتى باعدارلاماسى اياسىندا ءوتتى. مۇز مايتالماندارى, جاندى مۋزىكا, تەاترلاندىرىلعان قويىلىم, يننوۆاتسيالىق تەحنيكالىق ەلەمەنتتەر – وسىنىڭ بارلىعى تاڭداندىردى. اكروباتتىق ونەر, وليمپيادالىق بي تۇرلەرى دۇنيەنىڭ ءدۇبىرلى دۇلدۇلدەرىن بىرىكتىردى.
ەرەكشە شوۋدا كارولينا كوستنەر, ەلەنا راديونوۆا, الەنا ساۆچەنكو, برۋنو ماسسو, يان حان جانە تاعى باسقا مانەرلەپ سىرعاناۋشى الەمدىك دەڭگەيدەگى سپورتشىلار ونەر كورسەتتى. ولار سىرعاناپ قانا قويماي, قازاقستان تۋرالى ىستىق ىقىلاستارىمەن ءبولىسىپ, ەلوردا تويىمەن قۇتتىقتادى. استانانىڭ الەمدە ەشقانداي قالاعا ۇقسامايتىن, وزىندىك ەرەكشەلىگى بار ەكەنىن بىرىنەن سوڭ ءبىرى ايتتى.
دەنيس تەن كورسەتكەن تاماشا قويىلىمداردىڭ ءبىرى – ديماش قۇدايبەرگەننىڭ انىنە دايىندالعان ارنايى باعدارلاما. «بۇل قويىلىمدى پحەنچحان قىسقى وليمپياداسىنىڭ فينالىندا كورسەتۋىم كەرەك ەدى, وكىنىشكە قاراي, ول كەزدە رەتى بولمادى. سوندىقتان دايىندىققا كوپ ۋاقىتىم كەتكەن باعدارلامامدى بۇگىن كورسەتۋدىڭ ءساتى تۋعان سىندى» دەدى ول. شارانىڭ باستى توسىنسىيى
– وسى. سونداي-اق, شوۋ سوڭىندا دەنيس پەن دوستارى قازاقتىڭ ۇلتتىق كيىمىندە, قازاق ۇلتتىق-سيمفونيكالىق وركەسترىنىڭ قولداۋىمەن بيلەدى. قويىلىمدار مەن ايرىقشا دەكوراتسيا, ادەمى كوستيۋمدەر مەن مانەرلەپ سىرعاناۋداعى قايتالانباس قيمىلدار قالا تۇرعىندارىن جەلپىنتىپ تاستادى. وسىدان بىرەر كۇن بۇرىن دەنيس تەن ءباسپاسوز ءماسليحاتىن وتكىزىپ, جۋرناليستەرگە جەمىستى ەڭبەك ەتۋ ءۇشىن ايانبايتىنىن جەتكىزگەن ەدى. ءارى الەمنىڭ ماڭدايالدى جۇلدىزدارىن قازاقستانعا اكەلۋگە قاشان دا قۇمبىلدىعىن ايتتى. ءبىز دەنيسكە سەنەمىز!
