10 ماۋسىم كۇنى استانادا ەلوردانىڭ 20 جىلدىعى اياسىندا «SAMGAU» VI حالىقارالىق تەاتر فەستيۆالىنىڭ شىمىلدىعى ءتۇرىلدى. شارانىڭ اشىلۋىنا استانا اكىمىنىڭ ورىنباسارى ەرمەك امانشاەۆ قاتىستى.
اپتا بويى 16 ماۋسىمعا دەيىن قالا تەاترلارىنىڭ ساحنالارىندا استانانىڭ جانە ەل وڭىرلەرى تەاترلارى مەن شەتەلدىك ونەر ۇجىمدارىنىڭ ۇزدىك قويىلىمدارى كورسەتىلەتىن بولادى.
بيىل فەستيۆالدىڭ اتاۋى دا مازمۇنى دا وزگەشە. بۇرىن ول «ساحنادان سالەم» دەپ اتالىپ كەلگەن ەدى. بۇل تۋرالى تەاتر اپتالىعىنىڭ اشىلۋىنا ارنالعان ءباسپاسوز ءماسليحاتىندا تەاتر جانە كينو رەجيسسەرى, قازاقستاننىڭ حالىق ءارتىسى تالعات تەمەنوۆ مالىمدەدى.
– التى جىل بۇرىن قاليبەك قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ىرگەسىندە وسى فەستيۆالدىڭ تۇساۋى كەسىلگەن بولاتىن. سول كەزدە ول حالىقارالىق دەڭگەيگە جەتەدى دەپ ەشكىم دە ويلاماعان. بيىل شارانىڭ اتاۋىن عانا ەمەس, سونداي-اق مازمۇنىن دا وزگەرتىپ وتىرمىز. ءبىز نوميناتسياار بەلگىلەپ, قاتىسۋشىلاردى ماتەريالدىق تۇرعىدان قولداۋ تۋرالى شەشىم قابىلدادىق. فەستيۆالدىڭ باس جۇلدەسى – 2 ميلليون تەڭگە, – دەدى تالعات تەمەنوۆ.
ونىڭ ايتۋىنشا, «SAMGAU» فەستيۆالىنە قاتىسۋعا 53 ۇجىم ءوتىنىم بەرگەن, ونىڭ ىشىنەن تەك 12-ءسى عانا تاڭدالعان.
– بۇگىندە تەاتر ونەرىنە سۇرانىس جوعارى. ەگەر 5 جىل بۇرىن تەاتر الەمى تۇرالاپ تۇرسا, سوڭعى 3-4 جىلدا ايتارلىقتاي سەرپىن جاسالدى. جاڭا ساپالى قويىلىمدار كوپ, سوندىقتان ىرىكتەۋ قاتاڭ بولدى. ازىرگە ۋاقىتتىڭ تىعىزدىعىنان قاتىسۋشىلاردى كوبىرەك الا المايمىز. قازىلار القاسى كۇنىنە 3 سپەكتاكلدەن كورەدى. ويتكەنى فەستيۆال ءبىر اپتاعا عانا سوزىلادى, – دەدى ول.
اپتا بويى بەلگىلى پروفەسسورلار, تەاتر ونەرىنىڭ ماماندارى كۇن سايىن فەستيۆال قاتىسۋشىلارىنا ۆوكال, ساحنادا قوزعالۋ جانە سويلەۋ, اكتەرلىك شەبەرلىك بويىنشا شەبەرلىك ءدارىسىن وتكىزەتىن بولادى.
– ەلوردادا تۇرعان سوڭ اكتەرلەرگە ۇيرەتۋ ءۇشىن تەاترعا ۆوكال بويىنشا پەداگوگتى نەمەسە بالەتمەيستەردى شاقىرا الامىز. ال وبلىستىق تەاترلاردا ونداي مۇمكىندىك جوق. سوندىقتان ءبىز ايماقتارداعى تەاترلارعا بۇگىندە تانىمال جاڭا قويىلىمداردى تاماشالاۋ جانە شەبەرلەرىمىزدەن ساباق الۋ ءۇشىن اكتەرلەرىن جىبەرسىن دەپ شاقىرۋ جىبەردىك. ولارعا سەرتيفيكاتتار بەرىلەدى, – دەدى «جاستار» تەاترىنىڭ كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى نۇرقانات جاقىپباي.
بيىلعى فەستيۆالدىڭ تاعى دا ءبىر ەرەكشەلىگى – وعان OFF-باعدارلاما رەتىندە قازاق ۇلتتىق ونەر ۋنيۆەرسيتەتىنىڭ اكتەرلىك ونەر جانە رەجيسسۋرا كافەدراسىنىڭ ستۋدەنتتەرىنىڭ ديپلومدىق سپەكتاكلدەرى دە قاتىسادى.
– بۇل تاجىريبەنى كەلەر جىلى دا جالعاستىرماقپىز. بۇل ءبىز ءۇشىن جاقسى. جاڭا دارىندارمەن تانىسامىز. بۇل – ءبارىمىز ءۇشىن جاقسى ستيمۋل, سەبەبى فەستيۆالدە تەاترلاردىڭ كوركەمدىك جەتەكشىلەرى مەن ديرەكتورلارى كوپ بولادى. ولار بىرلەسىپ جۇمىس ىستەۋ ءۇشىن جاس تالانتتى اكتەرلەر مەن رەجيسسەرلەردى تاڭداي الادى, – دەپ ءتۇسىندىردى تالعات تەمەنوۆ.
ءباسپاسوز ءماسليحاتىنا قاتىسۋشىلار بيىلعى فەستيۆالدىڭ وزگەشەلىكتەرى تۋرالى ايتقان سوڭ ءداستۇر بويىنشا قاتىسۋشىلار قىزىل كىلەمنىڭ ۇستىمەن ءجۇرىپ ءوتتى. ەڭ الدىمەن فەستيۆالدىڭ قازىلار القاسى كورىندى. ونىڭ قۇرامىنا ۇزدىك وتاندىق جانە رەسەي مەن قىرعىزستاننىڭ تەاتر سىنشىلارى ەندى.
ولاردان كەيىن «SAMGAU» فەستيۆالىنە قاتىسۋشىلار قىزىل كىلەممەن ءجۇرىپ ءوتتى. اتاپ ايتساق, استانا, پەتروپاۆل, شىمكەنت, وسكەمەن قالالارىنىڭ تەاترلارىنىڭ ترۋپپالارى, سونداي-اق سەربيا, تاتارستان, قىرعىزستان جانە وزبەكستاننان كەلگەن قوناقتار.
ادەتتەگىدەي, شەرۋ «جاستار» تەاترىنىڭ ساحناسىندا كونتسەرتتىك باعدارلامامەن جانە فەستيۆالدىڭ اشىلۋ سالتاناتىمەن جالعاستى. جينالعان قاۋىم ەلوردالىق اكتەرلەردىڭ ونەرىن تاماشالادى. باعدارلامانى فەستيۆالدىڭ العاشقى كورسەتىلىمى – «جاستار» تەاترىنىڭ نۇرقانات جاقىپباي قويعان «رەۆيزور» تراگيفارسى جالعاستىردى.
