«استانا» كونتسەرت زالىندا «رۋحاني جاڭعىرۋ» باعدارلاماسى اياسىندا «اسەم قوڭىر» اتتى مۋزىكالىق كەش ءوتتى. بۇل اتاۋ بەكەردەن-بەكەر تاڭدالمادى. كۇي اناسى دينا نۇرپەيىسوۆانىڭ وسىلاي اتالاتىن كۇيى بار. ەلوردانىڭ مەملەكەتتىك اكادەميالىق فيلارمونياسىنىڭ قازاق وركەسترى ۇيىمداستىرعان وسى كونتسەرت قازاقتىڭ ءسوز جانە ساز ونەرىندە ءىز قالدىرعان اقىن جانە كۇيشى قىزداردىڭ شىعارماشىلىعىنا ارنالدى.
1937 جىلى الماتىدا كوركەمونەرپازداردىڭ سلەتى وتەدى. سول ۋاقىتتا بۇل جيىنمەن قاتار وقۋشىلار اراسىندا ەكىنشى رەسپۋبليكالىق وليمپيادا ءوتىپ جاتادى. ەكى شاراعا دا قاتىسىپ, تالاپتى وقۋشىلاردى كورگەن دينانىڭ ەسىنە نەمەرەسى قوڭىر تۇسەدى. سول جەردە جالىندى جاستارعا ارناپ «اسەم قوڭىر» اتتى كۇيىن جازادى. كەيبىر ونەر زەرتتەۋشىلەر بۇل كۇي اسەمقوڭىر ەسىمدى الىسقا ۇزاتىلىپ بارا جاتقان قىزعا ارنالعانىن ايتادى. وسى كۇيمەن اشىلعان كەش ءارى قاراي باسقا دا مۋزىكالىق شىعارمالارمەن جالعاستى.
قاراعاندى وبلىسىنىڭ اقتوعاي اۋدانىندا تۋىپ, ءومىر سۇرگەن اققىز (مۇگۇلسىم) احمەتقىزىنىڭ ارتىندا «قايران ەلىم», «اققىز», «جەتىم قىز», «قوسباسار», «قوڭىر كۇي» سىندى بىرنەشە كۇي, «جالعان-اي», «قايران باۋىرلارىم», «امان بول, امال قانشا», «ساعىنىش», «حانشايىم» اندەرى قالدى. ال بۇل كەش كورەرمەندەرى ونىڭ «مۇڭ قوسباسار» كۇيىن تىڭدادى.
باتىس قازاقستان كۇيشىلىك مەكتەبىندە اقبيكەش, ناۋشا قىز, التىناي ەسىمدەرى دە اتالادى. وكىنىشكە قاراي, بۇل كۇيشى قىزداردىڭ مۇراسى ءجىتى زەرتتەلمەگەن. ەسىمدەرى دە كومەسكىلەنىپ, اندا-ساندا كۇيلەرى تارتىلعاندا عانا اتالادى. اقبيكەش كەزىندە اتاقتى كۇيشى ەسجانمەن كۇي تارتىسقان. وعان ريزا بولعان ەسجان قوشتاساردا «قوش, امان بول, اقبيكەش» كۇيىن ارناعان. ال ناۋشا قىز ايگىلى ەسبايمەن ونەر سىناسقان. كۇيشى قىزدىڭ «شيدەمە-شەگەلەمە» كۇيى حالىققا جەتتى.
التىناي كۇيشى – ماڭعىستاۋ كۇيشىلىك مەكتەبىنىڭ نەگىزىن قالاۋشى ابىل تاراقۇلىنىڭ شاكىرتى. ونىڭ ارتىندا «التىناي اقجەلەڭ» اتتى جالعىز كۇي قالعان. مايرا ۋاليقىزى مەن سارا تاستانبەكقىزى – قازاق ونەرىندەگى بەلگىلى ەسىمدەر. ال قىتايدىڭ ىلە ايماعىندا دۇنيەگە كەلىپ, سوندا وتكەن اپپاق مايتابانقىزىنىڭ «كوك وزەن», «قۇباجاي» اتتى اندەرى ايتىلىپ ءجۇر. كورەرمەندەر قازاقستاننىڭ ەڭبەك سىڭىرگەن قايراتكەرى ايتقالي جايىموۆ جانە ديريجەرلەر نۇرلان بەكەنوۆ پەن الىشەر قاسقىرباي جەتەكشىلىك ەتكەن وركەستردىڭ, جازگۇل داڭىلباەۆا, انار مۇزداحانوۆا سىندى جەكە سوليستەردىڭ ورىنداۋىندا بۇل شىعارمالار قۇلاق قۇرىشىن قاندىردى.
