دوستىق دوداسى
«Global Silk Road» جىبەك جولى بويىنداعى قالالار مەرلەرىنىڭ فورۋمىنىڭ قورىتىندىسى ىسپەتتەس استانادا فۋتبولدان جىبەك جولى كۋبوگى ءوتتى.
جولداستىق كەزدەسۋدە مەرلەر قۇراما كومانداسى مەن حالىقارالىق يسلام ىسكەرلىك قاۋىمداستىعىنىڭ قۇراما كومانداسى كەزدەستى. جىبەك جولى كۋبوگىنىڭ اشىلۋ سالتاناتىندا ءسوز سويلەگەن ەلوردا اكىمى اسەت يسەكەشەۆ جينالعان كوماندا مۇشەلەرىنە قوشەمەت كورسەتىپ, ساتتىلىك تىلەدى:
– بارشاڭىزدى استانا قالاسىنىڭ 20 جىلدىق مەرەيتويىمەن شىن جۇرەكتەن قۇتتىقتايمىن. جىبەك جولى بويىنداعى قالالار مەرلەرىنىڭ فورۋمى اياسىندا كوپتەگەن شارالار ءوتتى. ال بۇل سپورت مەرەكەسى فورۋمنىڭ ادەمى قورىتىندىسى دەگەن ويدامىن. ويىن ءساتتى ءوتسىن. بارشاڭىزعا جەڭىس تىلەيمىن!
ويىن الدىندا قازاقستان رەسپۋبليكاسىنىڭ مەملەكەتتىك ءانۇرانى تىڭدالدى. ال اسەت يسەكەشەۆكە يسلام ىسكەرلىك قاۋىمداستىعىنىڭ قۇراما كومانداسى اتىنان كوماندا كاپيتانى, تانىمال فۋتبول جۇلدىزى ۆاگيز حيدياتۋللين دوپ سىيلادى. بۇل قۇراما ساپىندا رۋسلان نيگماتۋللين, اندرەي كانچەلسكيس, رينات داساەۆ سەكىلدى فۋتبول جۇلدىزدارى دوپ تەپتى.
– قالا اكىمدىگىنىڭ ۇيىمداستىرۋىمەن جىبەك جولى كۋبوگى بولىپ جاتىر. قوس قۇراما جارىسقا دايىن. مەرلەر قۇراما كومانداسى ساپىندا ەلوردا اكىمدىگىنىڭ قىزمەتكەرلەرى دە وينايدى. جالپى, اكىمدىك قوعامدىق سپورتتى دامىتۋعا كوپ كوڭىل بولۋدە. مۇنداي شارالارعا قالا اكىمى ءوزى باس بولىپ, اكىمدىك قىزمەتكەرلەرى قاشاندا قولداۋ كورسەتەدى, – دەدى «استانا سۋ ارناسى» مكك باس ديرەكتورى زەينۋلقابدەن تابيعات.
ءار كوماندا 20 ويىنشىدان قۇرالدى. فۋتبولشىلار 20 مينۋتتان تۇراتىن ەكى تايم وينادى, اراسىندا 5 مينۋت دەمالىس بەرىلدى. ال ويىنشى الماستىرۋ ەركىن تۇردە ءجۇردى. جولداستىق كەزدەسۋدىڭ اتى زاتىنا ساي بولىپ, ويىن تەڭ اياقتالدى. ەسەپ – 2:2. قوس قۇراما مۇشەلەرىنە بۇگىنگى فۋتبول مەرەكەسىنەن ەستەلىك رەتىندە سىيلىقتار بەرىلدى.
بەكساتتار ساتتار