استانانىڭ 20 جىلدىق مەرەيتويىنا وراي «Elorda aqparat» مەدياكومپانياسى مەن رەسپۋبليكالىق توعىزقۇمالاق فەدەراتسياسىنىڭ ۇيىمداستىرۋىمەن اقىن-جازۋشىلار, جۋرناليستەر اراسىندا ۇلتتىق ويىن – توعىزقۇمالاقتان اشىق رەسپۋبليكالىق تۋرنير ءوتتى.
تۋرنيردە استانا, الماتى, شىمكەنت قالالارىنان جانە قىزىلوردا, قوستاناي, پاۆلودار, شىعىس قازاقستان وبلىستارىنان كەلگەن سپورتشىلار باق سىنادى. جارىستىڭ اشىلۋ سالتاناتىنا دۇنيەجۇزىلىك جانە رەسپۋبليكالىق توعىزقۇمالاق فەدەراتسياسىنىڭ توراعاسى ءاليحان بايمەنوۆ, «Elorda aqparat» مەدياكومپانياسىنىڭ ديرەكتورى قايسار جۇمابايۇلى, استانالىق توعىزقۇمالاق فەدەراتسياسىنىڭ توراعاسى, استانا قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى تىلەۋعالي قىشقاشباەۆ, «قر ۇلتتىق ءارحيۆى» رەسپۋبليكالىق مەملەكەتتىك مەكەمەسىنىڭ ديرەكتورى جانگەلدى ماحاشوۆ, «قولجازبالار جانە سيرەك كىتاپتار ۇلتتىق ورتالىعى» مەكەمەسىنىڭ باسشىسى اسىلحان سادۋوۆ قاتىسىپ, جارىسقا قاتىسۋشىلار مەن جانكۇيەر قاۋىمدى ەلوردا مەرەكەسىمەن قۇتتىقتاپ, ساتتىلىك تىلەدى.
– وشكەنىمىز جاڭعىرىپ, ۇزىلگەنىمىز قايتا جالعانعان ۇلتتىق ويىنىمىز – توعىزقۇمالاق سوڭعى جىلدارى جوعارى قارقىنمەن دامىپ كەلەدى. انگليا, فرانتسيا, چەحيا مەملەكەتتەرىنىڭ زياتكەرلىك ويىندارىنىڭ فەستيۆال باعدارلاماسىنا ەنگىزىلدى. قازىرگى تاڭدا الەم بويىنشا بۇل ويىنمەن شۇعىلدانۋشىلاردىڭ قاتارى 200 مىڭعا جاقىندادى. بۇگىندە الەمنىڭ كوپتەگەن ەلدەرىندە توعىزقۇمالاقتان حالىقارالىق دەڭگەيدەگى ءتۇرلى جارىستار وتكىزىلىپ تۇرادى. وعان قازاق حالقى عانا ەمەس, شەتەلدەردەگى جەرگىلىكتى جۇرتشىلىق تا بەلسەندى قاتىسادى. جالپى, توعىزقۇمالاق – جەڭىسى بار دا, جەڭىلىسى جوق ويىن. ويتكەنى قارسىلاستان ۇتىلساڭىز دا مەيلى, باستىسى ۇلتتىق ويىننىڭ مەرەيى كوتەرىلەدى, – دەگەن ءاليحان بايمەنوۆ جارىسقا قاتىسۋشىلارعا ساتتىلىك تىلەدى. ايتىسكەر اقىن نۇرقانات قايرات ۇلتتىق قۇندىلىقتارىمىزدى ۇلىقتاعان شاراعا ارناۋ ايتتى.
جارىسقا حالىقارالىق دارەجەدەگى تورەشى ەرنۇر مەرەشوۆ تورەلىك جاسادى. ايتا كەتۋ كەرەك, تۋرنير اياسىندا استانا قالاسى تىلدەردى دامىتۋ جانە ارحيۆ ءىسى باسقارماسىنىڭ ۇيىتقى بولۋىمەن «ءتىل – قازىنا» اتتى ارنايى شارا ۇيىمداستىرىلدى. وندا انا ءتىلىمىز بەن ەل تاريحىنا قاتىستى سۇراقتارعا مۇدىرمەي جاۋاپ بەرگەن قاتىسۋشىلارعا سىيلىقتار تابىستالدى. سايىس بارىسىندا ءان مەن كۇي اۋەلەپ, جىردان شاشۋ شاشىلدى.
ال توعىزقۇمالاق ءتۋرنيرى قورىتىندىسىندا «مىنبەر» ينتەرنەت باسىلىمىنىڭ ءتىلشىسى, الماتىلىق باقىتجان قادىلبەك ءى ورىندى قانجىعالاسا, استانالىق جۋرناليست ولجاس سۇلەيمەنوۆ ەكىنشى ورىنعا, تۇركىستان وبلىسى اكىمدىگى ءباسپاسوز قىزمەتىنىڭ مامانى عابيت ساپاربەك ءۇشىنشى ورىنعا تابان تىرەدى. سونىمەن قاتار ءبىر توپ قاتىسۋشىعا ىنتالاندىرۋ سىيلىعى بەرىلدى. جەڭىمپازدار مەن جۇلدەگەرلەر ديپلومدارمەن جانە قارجىلاي سىيلىقپەن ماراپاتتالدى.
