كەشە قالالىق اكىمدىكتىڭ ۇلكەن زالىندا استانانىڭ 20 جىلدىق مەرەيتويىنا ارنالعان سالتاناتتى جيىن ءوتتى.
استانا اكىمى اسەت يسەكەشەۆ جينالعانداردى جانە بارشا قالا جۇرتشىلىعىن ەلوردانىڭ 20 جىلدىق مەرەيتويىمەن قۇتتىقتادى.
– استانا – سارىارقا توسىندە سالىنعان ءىرى مەگاپوليس, تاۋەلسىزدىكتىڭ سيمۆولى. ەلوردا – ەلباسىنىڭ ءتول تۋىندىسى. بۇگىندە استانا 20 جىلدىق مەرەيتويىنا زور تابىستارمەن, سالماقتى جەتىستىكتەرىمەن جەتىپ وتىر. ەلوردانى ءالى دە الەمنىڭ وزىق شاھارلارىمەن تەرەزەسى تەڭ, تۇرعىندارى باقۋاتتى قالاعا اينالدىرۋ قولعا الىنۋدا. بۇعان ءبىزدىڭ تولىق تاجىريبەمىز بار. سوندىقتان قالامىزدىڭ كەلەشەگى كەمەل, جارقىن ساتتەرى كوپ بولادى دەپ سەنەمىز. مەرەكە قۇتتى بولسىن! – دەدى قالا باسشىسى ءوز سوزىندە.
جيىن بارىسىندا اسەت يسەكەشەۆ استانانىڭ بۇرىنعى باسشىلىق قىزمەتىندە بولعان, ەلوردانىڭ سالىنۋىنا, دامۋىنا ۇلەس قوسقان ارداگەرلەر مەن زيالى قاۋىم وكىلدەرىن, قوعام قايراتكەرلەرىن جانە قالا باسشىلىعىن, اكىمدىككە قاراستى ۇيىم جەتەكشىلەرىن «استاناعا 20 جىل» مەرەكەلىك مەدالىمەن ماراپاتتادى. ماراپاتتاۋ ساتىندە ءسوز الىپ, زاماناۋي استانانى زور ماقتان تۇتاتىنىن ايتقان قازاقستاننىڭ حالىق ءارتىسى گۇلجان اسپەتوۆا قالا باسشىسىنا انالىق اق تىلەگىن جەتكىزدى.
