ۇيلەسىم مەن كەلىسىم
ۇلتتىق مۋزەيدە ەلوردانىڭ 20 جىلدىق مەرەكەسى اياسىندا «استانا: بەيبىتشىلىك پەن كەلىسىم ورتالىعى» اتتى ەكى كۇنگە سوزىلعان حالىقارالىق كونفەرەنتسيا ءوتتى.
ايتۋلى شارانى وتكىزۋگە قر تۇڭعىش پرەزيدەنتى – ەلباسى قورى مەن قازاقستاندىق ۇلتتىق يۋنەسكو كلۋبتارىنىڭ فەدەراتسياسى مۇرىندىق بولدى. كەلەلى جيىنعا 200-گە جۋىق حالىقارالىق جانە ۇلتتىق ەكسپەرتتەر, ازيا-تىنىق مۇحيتى ايماعىنداعى يۋنەسكو كلۋبتىق قوزعالىسىنىڭ جانە الەمدىك ۇيىمداردىڭ وكىلدەرى قاتىستى.
ۇيىمداستىرۋشىلاردىڭ ايتۋىنشا, باسقوسۋدىڭ ماقساتى ماماندار مەن ازاماتتىق قوعام وكىلدەرىنىڭ اراسىندا ەكى تاراپقا دا پايدالى اقپارات الماسۋ, وسى تاقىرىپتارعا قاتىستى ۇزدىك تاجىريبەلەرمەن تانىسۋعا ارنالعان ديالوگ الاڭىن جاساۋ جانە الىستان ات تەرلەتىپ كەلگەن قوناقتارعا باس شاھاردىڭ دامۋى مەن «رۋحاني جاڭعىرۋ» باعدارلاماسىن تانىستىرۋدى كوزدەگەن.
كونفەرەنتسيا بارىسىندا ازيا-تىنىق مۇحيتى ايماعىنىڭ جانە ورتالىق ازيانىڭ قىتاي, جاپونيا, قىرعىزستان, تاجىكستان, وزبەكستان, ءۇندىستان, فيليپپين, رەسەي ەلدەرىنەن كەلگەن سپيكەرلەر مەن وتاندىق قايراتكەرلەر ءسوز الىپ, باس-اياعى 25-تەن استام بايانداما جاسالدى.
جيىن جۇمىسىنىڭ ناتيجەسىندە قازاقستاننىڭ حالىقارالىق ساحناداعى بەيبىتشىلىك پەن كەلىسىم ورتالىعى رەتىندەگى ءرولىن راستاۋ, تۇراقتى دامۋ ماقساتتارىنا جەتۋ ءۇشىن يۋنەسكو كلۋبتارىنىڭ دامۋ باعىتتارىن انىقتاۋ, سونداي-اق, ءبىزدىڭ ەلىمىز بەن ازيا-تىنىق مۇحيتى ايماعى جاستارىنىڭ كوشباسشىلىق قاسيەتتەرىن دامىتۋ سەكىلدى ۇسىنىستار قارالدى.