ميلليونىنشى تۇرعىن ەكى جاسقا تولدى
وسىدان ەكى جىل بۇرىن 4 شىلدە كۇنى ەلوردا تۇرعىندارىنىڭ سانى ايتۋلى مەجەگە جەتىپ, استانا ميلليونەر-قالاعا اينالعان ەدى. ميلليونىنشى تۇرعىن اتانۋ باقىتى بۇيىرعان كىشكەنتاي سابيگە اتاسى مەن اجەسى سايدا دەپ ات قويعان.
سايدا مۇحامەديار – ءبىرى قوستانايدان, ءبىرى پاۆلوداردان ارمان ارقالاپ استاناعا كەلىپ, تاعدىر توعىستىرعان ارايلىم مەن ولجاستىڭ تۇڭعىشى. ستاتيستيكالىق كورسەتكىشكە ەلەۋلى وزگەرىس اكەلگەنى ءۇشىن ءسابيدىڭ اتا-اناسىنا استانا اكىمى اسەت يسەكەشەۆ ەكى بولمەلى پاتەردىڭ كىلتىن تابىستاپ, وسىلايشا جاس وتباسى ۇلكەن شاتتىققا كەنەلگەن.
نەسىبەسى تاسىپ تۋعان سايدا, مىنە, بيىل ەكى جاسقا تولىپ وتىر. ول وسكەن سايىن قالا تۇرعىندارىنىڭ سانى دا قالماي ارتىپ كەلەدى. بار قازاق تۋىس ەكەنىن ەسكەرسەك, ەلوردادا دۇنيەگە كەلىپ جاتقان ەندىگى سابيلەردىڭ ءبىرى سايداعا ءىنى, ءبىرى ءسىڭلىسى ىسپەتتى.
ارايلىمنىڭ ايتۋىنشا, قازاقتىڭ دارحان پەيىلى بۇل بالاعا دا دارىماي قالماعان سياقتى. ول ەشكىمدى جاتىرقامايدى, كەز كەلگەن جەردە اينالاسىنداعىلارمەن ويناپ, ءتاتتى قىلىقتارىمەن ءۇيىرىپ الا جونەلەدى. وزىندىك مىنەزى دە جوق ەمەس – بىردەمەگە ۇمتىلسا, قول جەتكىزبەي قويمايدى.
كەيدە سايدا وكشەسىن كوتەرىپ, اياعىنىڭ ۇشىمەن ءجۇرىپ, بالەرينالار سەكىلدى بيلەيدى ەكەن. جاسامپازدىق پەن شىعارماشىلىق ونەردىڭ بيىك دەڭگەيىندە سالىنىپ, بوي تۇزەپ كەلە جاتقان قالامىزدىڭ ميلليونىنشى تۇرعىنى كەيىن ميلليونداردى اۋزىنا قاراتقان ونەر يەسى بولار, كىم ءبىلسىن؟!