«قازمەديا ورتالىعىنىڭ» كينوكونتسەرت زالىندا قازاق راديوسىنىڭ حالىقارالىق «دالا داۋىسى» راديوفەستيۆالىنىڭ گالا-كونتسەرتى ءوتتى. ەلىمىزدىڭ جانە تۇركىتىلدەس ەلدەردىڭ 130-دان استام دۇلدۇلدەرىنىڭ قاتىسۋىمەن جەتى ايعا سوزىلعان بايقاۋ ءوزىنىڭ مارەسىنە جەتتى. وسى ۋاقىت ىشىندە تىڭدارمانداردىڭ مەيلىنشە كوپ داۋىسىنا يە بولعان جيىرما بەس ءانشى بۇل حالىقارالىق بايگەنىڭ جەڭىمپازى اتانىپ, ارنايى سىي-سياپاتقا يە بولدى.
«ءداستۇرلى ءان» جانە «ەسترادالىق ءان» اتالىمدارى بويىنشا قىدىرالى بولمانوۆ, قاراقات ءابىلدينا, دوسىمجان تاڭاتاروۆ, جۇبانىش جەكسەنۇلى, گۇلنۇر ورازىمبەتوۆا سەكىلدى تانىمال انشىلەر جەڭىمپاز اتاندى. ال, قىتايدان كەلگەن قانداستارىمىز ەجەلگى قازاق اندەرىن تامىلجىتا ورىنداسا, تۇركيالىق دۋەت «سارىالا قاز» حالىق انىمەن كوپشىلىك قۇرمەتىنە بولەندى. كارىس جىگىتتەرىنەن قۇرالعان كۆارتەت قازاق ءانىن ناقىشىنا كەلتىرە شىرقادى. بۇل بايقاۋ, ءتۇپتەپ كەلگەندە, بۇقارالىق اقپارات قۇرالدارى ىشىندەگى بايىرعى دا قاراپايىم, جەدەل دە قولجەتىمدى ءتۇرى سانالاتىن راديونىڭ تەك وتكىر ءسوز بەن ۇشقىر ويدىڭ عانا ەمەس, سونىمەن قاتار اسەم انىمەن دە تۇڭعيىقتا تولىقسىپ جاتقان سەزىمدەردى وياتىپ, حالىقتىڭ جىگەرىن جانىپ, رۋحىن كوتەرەتىن دۋماندى حابارلاردىڭ ارناسى ەكەندىگىن كورسەتىپ بەردى. قازاقستان رەسپۋبليكاسى مادەنيەت جانە اقپارات ءمينيسترى دارحان مىڭبايدىڭ قۇتتىقتاۋ ءسوزىن جەتكىزگەن اقپارات جانە مۇراعات كوميتەتى توراعاسىنىڭ ورىنباسارى قۋات بوراش تا بايقاۋدىڭ ماڭىزدىلىعىنا توقتالدى.
«دالا داۋىسى» حالىقارالىق بايقاۋىنىڭ جەڭىمپازدارىن ماراپاتتاۋعا پارلامەنت دەپۋتاتتارى, ونەر قايراتكەرلەرى, مارتەبەلى شەتەلدىك قوناقتار, بيزنەس وكىلدەرى جانە باس رەداكتورلار كلۋبى دا قاتىستى.
حاميت ەسامان
