ساناعا ساۋلە تۇسىرگەن
ەلىمىز تاۋەلسىزدىگىن العان تۇستا كوپتەگەن ۇلتتىق قۇندىلىقتار قازاق قوعامىندا قايتا جاڭعىردى. قازاقى ساناعا ساۋلە ءتۇسىرىپ, ۇلت رۋحىمەن قايتا قاۋىشتىرعان «تاڭشولپان» باعدارلاماسى ومىرگە كەلدى. اتالعان باعدارلامامەن بىرگە ۇلت رۋحى قايتا ويانىپ, جاڭاشا باس كوتەرگەندەي ەدى.
«تاڭشولپان» اقپاراتتىق -سازدى باعدارلاماسى 1992 جىلدىڭ 14 جەلتوقسانىندا قالىڭ كوپشىلىككە جول تارتتى. بوزتورعاي سەكىلدى بوزالا تاڭنان باستاپ ەرەكشە كۇي سىيلاعان سازدى حابار از ۋاقىتتىڭ ىشىندە-اق قالىڭ قازاقتىڭ كوزايىمىنا اينالىپ سالا بەردى. باعدارلامانىڭ جارىققا شىعۋىنا سەبەپكەر بولعان سول كەزدەگى «قازاقستان» تەلەارناسىنىڭ باسقارما توراعاسى, جازۋشى شەرحان مۇرتازا بولاتىن. قازاق تەلەۆيزياسىنىڭ تاريحىندا «تاڭشولپانعا» دەيىن شاعىن فورماتتاعى تانىمدىق حابارلار بولعانىمەن, تىكەلەي ەفيردە «تاڭشولپان» سەكىلدى اقپاراتتىق-سازدى باعدارلاما بولعان جوق. الايدا, 1994 جىلى ش.مۇرتازا پارلامەنت دەپۋتاتتىعىنا سايلانىپ, «قازاقستاننىڭ تەلەديدارى مەن راديوسى» رەسپۋبليكالىق كورپوراتسياسىنىڭ باسشىلىعى اۋىستى. سول جىلى تاڭعى باعدارلاما مەن كەشكى جاڭالىقتار اگەنتتىگى قۇرىلىپ, «تاڭشولپان» باعدارلاماسى جابىلدى. بىراق, حالىققا رۋحاني سەرپىلىس بەرگەن وسىنداي باعدارلاما ءبارىبىر قاجەت ەدى, 1996 جىلى «تاڭشولپان» قايتادان دۇنيەگە كەلدى. جيىرما جىلدان بەرى اتاۋى «اراي», «جاڭا كۇن», «ءتاڭسارى», «ويان, قازاق!», «كوڭىلاشار», «قايىرلى تاڭ, قازاقستان!», «اسسالاۋماعالايكۇم, اعايىن!» بولىپ سان رەت ءوزگەرگەن باعدارلاما 2008 جىلى ءتول ەسىمىن قايتا يەلەندى.
جيىرما جىل ىشىندە «تاڭشولپاندا» تالاي تانىمال تەلەجۋرناليستەر يىق تىرەسە جۇمىس ىستەدى, ءتىپتى بۇل باعدارلاما تالاي شىعارماشىلىق يەسىنىڭ حالىققا تانىلۋىنا دا كەڭ جول اشتى. مادەني-رۋحاني جاڭالىقتارمەن قاتار, ۇلتتىق ماسەلەلەر دە ەش ۇمىت قالمادى. قازاق حالقىنىڭ كوڭىل سۇيسىنتەر جەتىستىكتەرى تەلەديدار بەتىنەن ءسۇيىنشىلەندى. باعدارلاما تاريحىندا الدىڭعى بۋىننان تىنىس وتەباەۆ, باقىتجامال ەرمانوۆا, يمانباي جۇباي, كەنجەباي جارمۇحامەدوۆ, گۇلميرا دايراباي, ءلاززات تانىسباي, دانا نۇرجىگىت سەكىلدى بەلگىلى تەلەجۋرناليستەردىڭ ەسىمدەرى ەرەكشە اتالادى. باعدارلامانى العاش ءجۇرگىزگەن يمانباي جۇباي مەن لاۋرا يۋسۋپجانوۆانىڭ ەسىمدەرى ءالى كۇنگە ەل ەسىندە. ال, ايگەرىم ەسەناليەۆا, مارقۇم رۋسلان بولەباي, بەرىك كوشەربەكۇلى, مارجان بولاتحانقىزى, مايا ۆەرونسكايا سەكىلدى بىرقاتار جاس تەلەجۇرگىزۋشىلەردىڭ ەسىمدەرى «تاڭشولپان» ارقىلى حالىققا تانىلدى.
كەزىندە تاڭعى باعدارلامادا ەلگە تانىمال ازاماتتار دا قىزمەت ەتتى. مىسالى, سەنبى سايىن شىعىپ تۇرعان «زاڭ» ايدارىن بەلگىلى ساياساتكەر ماقسۇت نارىكباەۆ جۇرگىزدى. بۇگىندە «تاڭشولپان» اقپاراتتىق-سازدى تاڭعى باعدارلامالار بىرلەستىگىندە وتىزعا جۋىق قىزمەتكەر جۇمىس ىستەيدى.
بەتتى دايىنداعان:
حاميت ەسامان