قازىرگى كەزدە ەلىمىزدەگى زاڭي تۇلعالار مەن جەكە كاسىپكەرلەردىڭ نەگىزگى بولىگى قولما-قول اقشامەن ەسەپ ايىرىساتىن ساۋدا وپەراتسيالارىن جۇرگىزىپ, قىزمەت تۇرلەرىن كورسەتەدى. مۇنداي وپەراتسيالاردىڭ وسۋىنە بايلانىستى قولما-قول قاراجاتى اينالىمىنا فيسكالدى ورگاندار تاراپىنان قاتاڭ دا ءتيىمدى باقىلاۋ ورناتۋ قاجەتتىلىگى تۋىندايدى.
تۇتىنۋشىلارمەن ەسەپ ايىرىسۋ بارىسىندا قولما-قول اقشانى قابىلداپ, ەسەپكە الۋدى تارتىپكە كەلتىرۋ, سالىق تولەمدەرىنىڭ بيۋدجەتكە تولىقتاي ءارى ۋاقىتىلى ءتۇسۋىن قامتاماسىز ەتۋ ماقساتىندا قازاقستان رەسپۋبليكاسىنىڭ سالىق زاڭدارى قولما-قول اقشا, بانكتىك تولەم كارتوچكالارى, چەكتەر ارقىلى ساۋدا وپەراتسيالارىن جاساۋ نەمەسە قىزمەت تۇرلەرىن كورسەتۋ كەزىندە جۇزەگە اسىرىلاتىن اقشالاي ەسەپ ايىرىسۋعا مىندەتتى تۇردە فيسكالدى جادى بار كاسسالىق-باقىلاۋ ماشيناسىن (كبم) قولدانىپ, باقىلاۋ چەگىن بەرۋ ءتارتىبىن بەلگىلەدى. وسىلايشا, كبم كاسىپكەردىڭ تابىسىن تولىق كولەمدە ەسەپكە الۋ تەتىگىنە اينالدى.
كاسسالىق-باقىلاۋ ماشينالارى دەگەنىمىز – تاۋار ساتۋ, قىزمەت كورسەتۋ, جۇمىس اتقارۋ بارىسىندا جۇزەگە اسىرىلاتىن اقشالاي ەسەپ ايىرىسۋ تۋرالى اقپاراتتى تىركەپ, اشىپ كورسەتەتىن فيسكالدى مودۋلدەر, فيسكالدى جادى بار ەلەكتروندى قوندىرعىلار جانە (نەمەسە) كومپيۋتەرلىك جۇيەلەر. ۋاكىلەتتى ورگان فيسكالدى جادى بار, قازاقستان رەسپۋبليكاسىنىڭ اۋماعىندا پايدالانۋعا رۇقسات ەتىلگەن كاسسالىق-باقىلاۋ ماشينالارىنىڭ مەملەكەتتىك رەەسترى مەن ونى قولدانۋ ەرەجەسىن بەكىتەدى.
كبم-داردى تىركەۋ قر قارجى ءمينيسترىنىڭ 19.12.2007 ج. №469 بۇيرىعىمەن بەكىتىلگەن مەملەكەتتىك قىزمەت كورسەتۋ تۇرلەرىنىڭ ءبىرى بولىپ سانالادى. سالىق كودەكسىندەگى 645-باپتىڭ 4-تارماعىنىڭ 1-تارماقشاسىنا سايكەس كبم-دى سالىق ورگانىندا تىركەۋ قولما-قول اقشا ارقىلى ەسەپ ايىرىسۋعا بايلانىستى قىزمەت باستالعانعا دەيىن جۇرگىزىلەدى. تىركەۋ ەسەبىنە كبم-دى ۋاقىتىلى ورناتپاعان رەتتە, قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 215-بابىنا سايكەس, سالىق تولەۋشىلەرگە قاتىستى اكىمشىلىك شارا قولدانىلادى. كاسسالىق اپپاراتقا بايلانىستى تاقىرىپ – باقىلاۋشى ورگاندار ءۇشىن اۋقىمدى ءارى وتە «تابىستى» ەندىك. وكىنىشكە وراي, مۇنداي تۇلەننىڭ تۇگىن تارتىپ, ماي سوراتىن الاقول تىرلىكتەن سالىق قىزمەتى دە سىرت قالماي ءجۇر. سالىق قىزمەتى ورگاندارىنداعى سىبايلاس جەمقورلىققا توسقاۋىل قويۋ باستى مىندەتتەردىڭ ءبىرى سانالادى. وسى پروبلەمانى تۇبەگەيلى شەشۋ ءۇشىن ۇزاق مەرزىمدى ستراتەگيالىق شارالاردى دا, جەدەعابىل ناقتى امالداردى دا قولعا الۋ قاجەت. سىبايلاس جەمقورلىق سالىق قىزمەتى ورگاندارىنىڭ بەدەلىنە قارا داق سالىپ, جۇرتشىلىق سەنىمىن ىرىتەدى, مەملەكەتتىڭ نارىقتىق قارىم-قاتىناستاردى دامىتۋ مۇراتىنا نۇقسان كەلتىرىپ, ەكونوميكالىق جانە ۇلتتىق قاۋىپسىزدىكتىڭ ىرگەسىن شايقالتادى.
سىبايلاس جەمقورلىقتىڭ كەلەڭسىزدىكتەرىنە جول بەرمەي, ولاردى تۋىنداتاتىن قۇقىق بۇزۋشىلىق كورىنىستەرىنىڭ الدىن الۋ ماقساتىندا سالىق قىزمەتى ورگاندارىنىڭ قىزمەتكەرلەرى قر قم سالىق كوميتەتى توراعاسىنىڭ 30.09.2006 ج. №474 بۇيرىعىمەن بەكىتىلگەن كاسىبي ەتيكا كودەكسىنىڭ جانە اتالعان كوميتەتى باسشىنىڭ 26.11.2007 ج. №689 بۇيرىعىمەن بەكىتىلگەن «قازاقستان رەسپۋبليكاسىنىڭ سالىق قىزمەتى ورگاندارىنداعى سىبايلاس جەمقورلىقپەن كۇرەس ستراتەگياسىنىڭ» تالاپتارىن قاتاڭ ساقتايدى.
سالىق ورگاندارى قىزمەتكەرلەرى اراسىندا سىبايلاس جەمقورلىققا قارسى زاڭداردى وقىپ, ارناۋلى باپ تالاپتارىن بۇزاتىن ءىس-ارەكەتتەرگە جول بەرمەۋ جونىندە سەمينارلار وتكىزىلەدى. سالىق ورگاندارى قىزمەتكەرلەرىنىڭ قۇقىققا سىيىمسىز ارەكەتتەرى جونىندە كەز كەلگەن سالىق تولەۋشىنىڭ حابارلاسۋىنا مۇمكىندىك بەرەتىن سەنىم تەلەفوندارى جۇمىس ىستەيدى. ءسويتە تۇرا, قر «جەكە جانە زاڭدى تۇلعالاردىڭ شاعىمدارىن قاراۋ تۋرالى» 12.01.2007 ج. №221-3 زاڭىنا سايكەس «دومالىق ارىزشىلاردىڭ» تالاپ-شاعىمدارى قارالمايدى.
سالىق ورگانىنىڭ اتاۋى: سەنىم تەلەفونى:
استانا قالاسى بويىنشا سالىق دەپارتامەنتى 773 – 190
سارىارقا اۋدانى بويىنشا سالىق باسقارماسى 773 – 225
الماتى اۋدانى بويىنشا سالىق باسقارماسى 376 – 803
ەسىل اۋدانى بويىنشا سالىق باسقارماسى 678 – 131
راۋشان بەيسەنوۆا,
سارىارقا اۋدانى بويىنشا سالىق باسقارماسى تىركەۋ ءبولىمىنىڭ باستىعى
