كەشە مەملەكەت باسشىسى نۇرسۇلتان نازارباەۆ شىمكەنت قالاسىنىڭ ماڭىندا اسكەري-كولىك ۇشاعىنىڭ اپاتقا ۇشىراۋىنا بايلانىستى مەملەكەتتىك جانە قۇقىق قورعاۋ ورگاندارىنىڭ باسشىلارىمەن كەڭەس وتكىزدى.
كەڭەسكە پرەمەر-مينيستر س.احمەتوۆ, پرەزيدەنتتىڭ كومەكشىسى-قاۋىپسىزدىك كەڭەسىنىڭ حاتشىسى م.ءتاجين, باس پروكۋرور ا.داۋىلباەۆ, قورعانىس ءمينيسترى ءا.جاقسىبەكوۆ, ىشكى ىستەر ءمينيسترى ق.قاسىموۆ, ۇلتتىق قاۋىپسىزدىك كوميتەتى توراعاسىنىڭ ءبىرىنشى ورىنباسارى ۆ.جۇماقانوۆ قاتىستى.
مەملەكەت باسشىسى 25 جەلتوقساندا 18 ساعات 55 مينۋتتا شىمكەنت قالاسىنىڭ اۋماعىندا بورتىندا شەكاراشىلار بولعان اسكەري-كولىك ۇشاعى اپاتقا ۇشىراعانىن ايتىپ ءوتتى.
– ەكيپاجدىڭ جەتى مۇشەسى, جيىرما وفيتسەر قايتىس بولدى. ارنايى ۆەدومستۆوارالىق كوميسسيا قۇرىلدى. باس پروكۋراتۋرا قىلمىستىق ءىس قوزعادى, تەرگەۋ جۇرگىزىلۋدە. مەنىڭ نۇسقاۋىم بويىنشا, بارلىق ۇيىمداستىرۋ ماسەلەلەرىن انىقتاۋ ءۇشىن اپات ورنىنا ۇقك توراعاسى ۇشىپ باردى. بۇل – ۇلكەن قايعى, مەن قايتىس بولعانداردىڭ بارلىق جاقىندارى مەن تۋعان-تۋىستارىنا قايعىرىپ كوڭىل ايتامىن, – دەدى نۇرسۇلتان نازارباەۆ.
قازاقستان پرەزيدەنتى اۋە اپاتىنىڭ بارلىق جاي-جاپسارى جان-جاقتى زەرتتەلەتىنىن اتاپ ءوتتى.
– قىزمەتتىك تەكسەرىس جۇرگىزۋ ءۇشىن ارنايى توپ قۇرىلدى. «قارا» جاشىكتى اشقاننان كەيىن ءبىز قايعىلى وقيعانىڭ ءمان-جايىن تولىق بىلەتىن بولامىز. الدىن الا مالىمەتتەر بويىنشا, ەشقانداي جات نيەتتى سىرتقى اسەرلەر بولماعان دەپ ايتۋىمىزعا بولادى. بۇل ءتۇرلى جاعدايلاردىڭ سالدارى دەپ ەسەپتەيمىن. سول كۇنى شىمكەنت ماڭىندا اۋا-رايى وتە قۇبىلمالى بولدى, سوعان قاراماستان ەكيپاج ۇشاقتى قوندىرۋعا تىرىسقان. قالادان 40 شاقىرىم ماڭدا ۇشاق راداردان جوعالىپ كەتكەن. ۇشقىش تاجىريبەلى ەدى, ۇشاق جارامدى جاعدايدا بولعان, جوسپارلى جوندەۋدەن وتكىزىلگەن. دەگەنمەن وقيعانىڭ بارلىق ءمان-جايى اپاتقا ۇشىراۋ سەبەپتەرى ءبىز جۇرگىزىپ وتىرعان تولىق تەكسەرىستەن كەيىن ناقتى بەلگىلى بولادى, – دەدى مەملەكەت باسشىسى.
نۇرسۇلتان نازارباەۆ مۇنداي وقيعالاردىڭ قايتالانۋىنا جول بەرمەس ءۇشىن شارالار قابىلداۋ قاجەتتىگىنە توقتالدى.
– ادامدار قىزمەتتىك مىندەتتەرىن ورىنداۋ كەزىندە قازا تاپتى. بۇل – ۇلكەن قايعى. بۇل – ءبارىمىز ءۇشىن اۋىر سىناق. بۇل – بۇكىل حالقىمىز ءۇشىن ازالى كەزەڭ. سوندىقتان مەن 27 جەلتوقساندى جالپىۇلتتىق ازا تۇتۋ كۇنى دەپ جاريالادىم. وقيعانىڭ انىق-قانىعى بولعان جايعا جان-جاقتى تالداۋ جاسالعاننان كەيىن جاريا ەتىلەدى. وكىنىشكە قاراي, الەمدە مۇنداي وقيعالار بولىپ تۇرادى. بىراق بۇل ءبىزدى سوندا دا جۇباتپاۋعا ءتيىس. ءبىز ەلىمىزدە مۇنداي جاعدايلار بولماس ءۇشىن بارلىق قاجەتتى شارالاردى قابىلداۋعا ءتيىسپىز, – دەدى قازاقستان پرەزيدەنتى.
سونداي-اق كەڭەس بارىسىندا مەملەكەت باسشىسى ۇكىمەتكە, ءتيىستى ۆەدومستۆولارعا قايتىس بولعانداردىڭ وتباسىلارىنا بارلىق قاجەتتى كومەك كورسەتۋدى تاپسىردى.
ۇقك توراعاسىنىڭ ءبىرىنشى ورىنباسارى ۆ.جۇماقانوۆ ۆەدومستۆو باسشىسى وقيعا ورنىندا جۇرگەنىن جانە قاجەتتى ۇيىمداستىرۋشىلىق ءىس-شارالاردى وتكىزىپ جاتقانىن مالىمدەدى.
– ۇقك توراعاسى قايتىس بولعانداردىڭ تۋىستارىمەن كەزدەستى, «وڭتۇستىك» وڭىرلىك باسقارمادا كەڭەس وتكىزدى. قايتىس بولعان ادامداردىڭ ورنىنا مىندەتتى ۋاقىتشا اتقارۋشى ادامدار تاعايىندالدى. قازىرگى ۋاقىتتا قانداي دا ءبىر قاسكۇنەمدىك ارەكەت بولعانىن ايعاقتايتىنداي بەلگىلەر جوق. جالپى, شەكارا قىزمەتى جوسپارلى رەجىمدە جۇمىس ىستەۋدە. مەملەكەتتىك شەكارا تيىسىنشە قورعالۋدا, – دەدى ۆ.جۇماقانوۆ.
بۇدان بولەك, ول ۇقك-دا قايتىس بولعانداردىڭ وتباسىلارىمەن جۇمىس جۇرگىزۋ جانە شەكارا قىزمەتىنىڭ قايتىس بولعان وفيتسەرلەرىن جەرلەۋدى ۇيىمداستىرۋ ءۇشىن كوميسسيا قۇرىلعانى تۋرالى حاباردار ەتتى.
قورعانىس ءمينيسترى ءا.جاقسىبەكوۆ اۆياتسيالىق وقيعاعا تەكسەرۋ جۇرگىزۋ ەرەجەلەرىنە سايكەس, ۇشاقتىڭ اپاتقا ۇشىراۋ سەبەپتەرىن تەكسەرۋمەن اينالىساتىن ارنايى كوميسسيا تاعايىندالعانىن ايتىپ ءوتتى.
– الدىن الا تەكسەرىس اۋەجاي اۋدانىندا اۋانىڭ ىلعالدىلىعى 97 پايىز, تۇماندى, تەمپەراتۋراسى – 1 گرادۋس بولعانىن كورسەتتى, سوندىقتان مۇز قاتىپ قالۋى دا مۇمكىن. سونداي-اق ۇشاقتىڭ قالىپتى قونۋىنا كەدەرگى كەلتىرگەن اۋا-رايىنىڭ قولايسىز جاعدايىن كورسەتەتىن بىرقاتار وزگە دە فاكتىلەر بار, – دەدى ءا.جاقسىبەكوۆ.
باس پروكۋرور ا.داۋىلباەۆ قۇرىلعان جەدەل تەرگەۋ توبىنا پروكۋراتۋرانىڭ, ۇلتتىق قاۋىپسىزدىك ورگاندارىنىڭ جانە ءىىم اسكەري-تەرگەۋ بولىمشەلەرىنىڭ تاڭداۋلى تەرگەۋشىلەرى ەنگەنىن مالىمدەدى.
– ءبىز اسكەري-كولىك ۇشاعىنىڭ ۇشۋ ورنى مەن ورنالاسۋ ورنىن قوسا العاندا, وسى تەحنيكاعا جۇرگىزىلگەن جوندەۋ جۇمىستارىنا بايلانىستى بارلىق قۇجاتتارىن الدىق. «قارا» جاشىك تابىلدى, ءتيىستى ساراپتاما جۇرگىزىلۋدە, وقيعا بولعان ورىن تەكسەرىلۋدە. ءبىز اسكەري-كولىك ۇشاعىنىڭ اپاتقا ۇشىراۋىنا اكەلىپ سوققان ناقتى سەبەپتەردى انىقتايمىز, – دەدى ا.داۋىلباەۆ.
گۇلميرا ايماعانبەت
