ينۆەستيتسيالىق جوبالار يگىلىگى
بۇگىنگى تاڭدا ەلىمىزدە مەملەكەتتىك ۇدەمەلى يندۋستريالىق-يننوۆاتسيالىق دامۋ باعدارلاماسى جۇزەگە اسىرىلۋدا. بۇل جونىندە كەشە قالالىق ءماسليحاتتىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسياسىنىڭ كەزەكتى وتىرىسى بارىسىندا كەڭىنەن ءسوز بولدى.
كۇن تارتىبىندە ءبىر عانا ماسەلە قارالدى. ول بويىنشا استانا قالاسى كاسىپكەرلىك جانە ونەركاسىپ باسقارماسى باستىعىنىڭ ورىنباسارى رىسگۇل قاۋعاباەۆا بايانداما جاساپ, مەملەكەتتىك ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ اياسىنداعى ينۆەستيتسيالىق جوبالاردىڭ جۇزەگە اسىرىلۋ جاعدايى تۋرالى اڭگىمەلەدى.
ەكونوميكانى ءارتاراپتاندىرۋ جانە ونىڭ باسەكەگە قابىلەتتىلىگىن ارتتىرۋ ارقىلى ورنىقتى جانە تەڭگەرىمدى ءوسۋىن قامتاماسىز ەتۋگە باعىتتالعان باعدارلاما اياسىندا قازىر ەلىمىزدىڭ بارلىق وڭىرلەرىندەگىدەي استانادا دا ىرگەلى جوبالاردىڭ جۇزەگە اسىرىلىپ جاتقانى جونىندە ايتا كەلە, رىسگۇل بورانبايقىزى بۇل ءوز كەزەگىندە جاڭا ءوندىرىس ورىندارىنىڭ اشىلىپ, ازاماتتارىمىزدىڭ جۇمىسپەن قامتاماسىز ەتىلۋىنە جول اشقانىن جەتكىزدى. 2010-2014 جىلدارعا ارنالعان مەملەكەتتىك ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ جۇزەگە اسىرىلۋى اياسىندا بۇگىنگى تاڭدا استانا قالاسى بويىنشا جالپى قۇنى 392 ملرد تەڭگەنى قۇرايتىن 19 جوبا جۇزەگە اسىرىلعان. وسىنىڭ ناتيجەسىندە 7 مىڭنان استام جاڭا جۇمىس ورنى اشىلىپ, وسىنشا ەلوردالىق ازامات جۇمىسپەن قامتاماسىز ەتىلگەن.
اتالمىش باعدارلاما شەڭبەرىندە 2010 جىلى 2 كاسىپورىن پايدالانۋعا بەرىلگەن بولاتىن. ال, بىلتىرعى جىلدىڭ وزىندە 3 كاسىپورىن, اتاپ ايتساق, «Talgo» جولاۋشىلار ۆاگوندارىن شىعاراتىن «تۇلپار -Talgo» جشس زاۋىتى مەن كوكونىس ونىمدەرىن ءوندىرۋ مەن وڭدەيتىن «استاناەكوستاندارت» جشس جانە «ستالتسينك» جشس زاۋىتىنىڭ ءبىرىنشى كەزەڭى ىسكە قوسىلعانى بەلگىلى. وسى جوبالاردى جۇزەگە اسىرۋ بارىسىندا 850 جۇمىس ورنى اشىلىپ, ولاردىڭ 124-ءى قۇرىلىس جۇمىستارى باستالعان ساتتە-اق ەڭبەككە ارالاسقانى تۋرالى بايانداي كەلە, باسقارما باستىعىنىڭ ورىنباسارى ۇستىمىزدەگى جىلدىڭ باسىنان بەرى باعدارلاما شەڭبەرىندە تاعى ءتورت جوبانىڭ جۇزەگە اسىرىلعانىن تىلگە تيەك ەتتى. بۇل كاسىپورىنداردىڭ ءبارى دە استاناداعى يندۋستريالدىق پارك اۋماعىندا ورنالاسقان. ولار, ءسوز جوق, ەلىمىزدىڭ ەكونوميكالىق دامۋىنا ۇلكەن سەرپىن بەرۋدە.
گۇلبارشىن وكەشقىزى