ەلوردا تورىندە Nur-Sultan Jiu Jitsu Grand Prix حالىقارالىق ءتۋرنيرى ءوتتى.
جارىستىڭ اشىلۋ سالتاناتىندا قازاقستان دجيۋ-دجيتسۋ قاۋىمداستىعىنىڭ پرەزيدەنتى, قالالىق مادەنيەت جانە سپورت باسقارماسىنىڭ باسشىسى بولات ماجاعۇلوۆ قۇتتىقتاۋ ءسوز سويلەپ, وسىنداي جارىستاردىڭ ۇيىمداستىرىلۋى ەلىمىزدە دجيۋ-دجيتسۋ سپورتىنىڭ دامۋىنا جاقسى سەرپىن بەرەتىنىن اتاپ ءوتىپ, تۋرنيرگە كەلگەن شەتەلدىك, سونداي-اق قازاقستاندىق سپورتشىلارعا ساتتىلىك تىلەدى.
– بۇل جارىس جاس سپورتشىلاردى قولداۋ ماقساتىندا «جاستار جىلى» اياسىندا ۇيىمداستىرىلىپ وتىر. تۋرنيرگە الەمدەگى ۇزدىكتەردىڭ, الەم جانە ازيا چەمپيوندارىنىڭ قاتىسىپ وتىرعانى – ءبىز ءۇشىن زور قۇرمەت. ءبىزدىڭ ەلوردامىز دا لوندون, ريم, پاريج, ءابۋ-دابي, توكيو جانە GrandSlam شاراسىن وتكىزگەن استانالار قاتارىنا قوسىلادى دەپ سەنىممەن قارايمىن, – دەدى بولات ماجاعۇلوۆ.
ءتۋرنيردىڭ قۇرمەتتى قوناعى بولعان حالىقارالىق دجيۋ-دجيتسۋ قاۋىمداستىعىنىڭ پرەزيدەنتى پانايوتيس تەودوروپولۋس تا جارىسقا قاتىسۋشىلاردى قۇتتىقتاپ, قوناقجايلىلىق تانىتىپ جاتقان قازاقستاندىق ارىپتەستەرىنە العىسىن ءبىلدىردى. ءداستۇر بويىنشا قۇرمەتتى قوناققا قازاقتىڭ ۇلتتىق شاپانى جابىلدى.
ەكى كۇندە تاتاميدە الەمنىڭ 10 مەملەكەتىنەن 300-گە جۋىق سپورتشى بەلدەستى. ونىڭ ىشىندە بىرىككەن اراب امىرلىگى, برازيليا, يوردانيا, اۋعانستان, تۇركمەنستان, موڭعوليا, تاجىكستان, رەسەي, وزبەكستان جانە قازاقستان سپورتشىلارى بولدى. دجيۋ-دجيتسۋ شەبەرلەرى Ne-Waza, Fighting, DUO جانە Contact-System سەكىلدى 4 باعىتتا كۇش سىناستى. قازاقستان قۇراماسى ساپىندا 30 ەلوردالىق سپورتشى ەل نامىسىن قورعادى.
ءبىرىنشى جارىس كۇنى 150-گە جۋىق سپورتشى باعىن سىنادى, ولاردىڭ قاتارىندا 30-ى نۇر-سۇلتان قالاسىنىڭ نامىسىن قورعادى.
– دجيۋ-دجيتسۋ – كەرەمەت كۇرەس, ونى جۇرەكپەن, سانامەن مەڭگەرۋ كەرەك. ءبىز ۇلكەن ءبىر وتباسى سياقتىمىز. مەن سياقتى مۇگەدەكتىگى بار ادامدار وسىنداي بەدەلدى جارىستارعا قاتىسا الادى دەپ ويلاماپپىن. بۇل ءبىرىنشى رەت. بىزگە قولداۋ كورسەتىپ, قازاقستاننىڭ نامىسىن قورعاپ, تۋىمىزدى كوكتە جەلبىرەتۋىمىزگە سەپ بولىپ, دايىنداپ, جاتتىقتىرىپ جۇرگەن سەنسەيىمىز قۋات ساعيەۆكە العىسىم شەكسىز, – دەيدى ارنايى ۇيىمداستىرىلعان پارادجيۋ-دجيتسۋ تۋرنيرىندە التىن جۇلدە يەلەنگەن باۋىرجان ارىستانبەكوۆ.
حالىقارالىق جارىستىڭ چەمپيوندارى قاتارىنان بىرىككەن اراب امىرلىكتەرى, وزبەكستان, رەسەي, برازيليا جانە قازاقستان سپورتشىلارى كورىندى. جەڭىمپازدار مەن جۇلدەگەرلەر ديپلومدار, مەدالدار جانە باعالى سىيلىقتارمەن ماراپاتتالدى.
