استانا قالاسى كوممۋنيكاتسيالار قىزمەتىنىڭ ءباسپاسوز الاڭىندا قر ەلەكتروندى ۇكىمەتىنىڭ eGov mobile ءموبيلدى قوسىمشاسى, egov.kz پورتالىنىڭ جۇمىسى تۋرالى «ازاماتتارعا ارنالعان ۇكىمەت» مەملەكەتتىك ەمەس اكتسيونەرلىك قوعامى استانا قالاسى بويىنشا فيليالىنىڭ قوعاممەن بايلانىس مامانى باحتيار الياقپاروۆ بايانداپ, ءتۇرلى سۇراققا جاۋاپ بەردى.
ماماننىڭ ايتۋىنشا, ەندى ەتسق الۋ ءۇشىن حالىققا قىزمەت كورسەتۋ ورتالىعىنا بارۋدىڭ قاجەتى جوق. «ءموبيلدى حقو» قوسىمشاسىندا حقو وپەراتورىمەن بەينەقوڭىراۋ ارقىلى بايلانىسىپ, ەتسق-عا ۇيدەن شىقپاي-اق تاپسىرىس بەرۋگە بولادى.
قىزمەتتى پايدالانۋ ءۇشىن قوسىمشاعا كىرىپ, «بەينە قىزمەتى» باتىرماسىن باسۋ كەرەك. وپەراتوردىڭ قوسىلۋىن كۇتىپ, وعان جەكە كۋالىك پەن SMS ارقىلى كەلگەن كودتى ايتىپ, ءوتىنىمدى جىبەرۋ قاجەت.
جىل باسىنان بەرى 4 ميلليوننان استام ازامات قىزمەت الۋ ءۇشىن حقو-عا جۇگىنگەن. ولاردىڭ شامامەن 30 پايىزى سۇرانىسقا يە ەتسق الۋ قىزمەتىنە تاپسىرىس بەرگەن. سوندىقتان حقو-عا بارۋدى قاجەت ەتپەيتىن مەملەكەتتىك قىزمەت كورسەتۋدىڭ قولجەتىمدى جانە ىڭعايلى امالى ويلاستىرىلدى. قازىرگى تاڭدا «ءموبيلدى حقو» ارقىلى 38 ءتۇرلى قىزمەت الۋعا بولادى. ءتىزىم ءالى دە تولىعادى.
سونداي-اق اتالعان قوسىمشادا جىلجىمايتىن مۇلىككە قۇقىق بەلگىلەيتىن قۇجاتتىڭ جانە جىلجىمايتىن مۇلىك وبەكتىلەرىنىڭ تەحنيكالىق پاسپورتىنىڭ ەلەكتروندى نۇسقاسىن الۋ, بالانىڭ تۋىنا جانە بالا كۇتىمىنە بايلانىستى الەۋمەتتىك تولەم تاعايىنداۋ, كوپبالالى وتباسىنا جاردەماقى تاعايىنداۋ, تۇرعىن ءۇي كومەگىن تاعايىنداۋ سەكىلدى سۇرانىسى جوعارى قىزمەتتەر دە بار. قانداس مارتەبەسىن بەرۋ نەمەسە ۇزارتۋ قىزمەتتەرىن دە الۋعا بولادى.
اقىلى قىزمەتتەرگە تاپسىرىس بەرۋ كەزىندە تولەم شوتى ەكىنشى دەڭگەيلى بانكتەردىڭ قوسىمشالارىنا سىلتەمە جىبەرەدى. ازاماتتار بەينەقوڭىراۋ ارقىلى قىزمەت الۋ بارىسىندا باج سالىعىن بىردەن تولەي الادى. ءموبيلدى قوسىمشا حقو-عا بارۋدى الدىن الا برونداۋعا, ەلەكتروندى كەزەك تالونىن الۋعا, تۇرعىندارعا جاقىن ورنالاسقان حقو مەكەنجايىن كورۋگە مۇمكىندىك بەرەدى. اتالعان قىزمەتتەردى قولجەتىمدى قىلۋداعى نەگىزگى ماقسات – حقو-عا كەلۋشىلەر اعىنىن ازايتۋ.
قازىرگە دەيىن 68 مىڭعا جۋىق قولدانۋشى ۇيالى تەلەفونىنا «ءموبيلدى حقو» ورناتتى. قوسىمشانى Google Play جانە App Store ونلاين-دۇكەندەرىنەن جۇكتەپ الۋعا بولادى.
