جەكە ينۆەستيتسيالار تارتۋ ەسەبىنەن ەلوردادا بىرقاتار زاۋىتتار مەن لوگيستيكالىق ورتالىقتاردىڭ قۇرىلىسى قارقىندى ءجۇرىپ جاتىر. بۇل جونىندە استانا قالاسىنىڭ اكىمى التاي كولگىنوۆ ءمالىم ەتتى.
اتاپ ايتقاندا, وندىرىستىك-ازىق-تۇلىك كەشەنى (نان زاۋىتى, ءسۇت وڭدەۋ زاۋىتى, كوكونىس قويماسى), نان-توقاش, ۇن جانە كونديتەرلىك ونىمدەردى وندىرۋگە ارنالعان وندىرىستىك كەشەن, زاماناۋي لوگيستيكالىق ورتالىق, كوممۋنالدىق قويما جانە باسقا دا نىساندار قۇرىلىسى ءجۇرىپ جاتىر. اتالعان جوبالارعا ارنالعان ينۆەستيتسيانىڭ جالپى سوماسى – شامامەن 50 ملرد تەڭگە.
«بىرقاتار زاۋىت پەن لوگيستيكالىق ورتالىقتاردىڭ قۇرىلىسىمەن تانىستىم.
مىسالعا, وندىرىستىك-تاماق كەشەنى نان زاۋىتىنان, ءسۇت وڭدەۋ زاۋىتىنان جانە كوكونىس قويماسىنان تۇرادى. نان زاۋىتى تاۋلىگىنە 25 تونناعا دەيىن ءونىم شىعارسا, كوكونىس قويماسى 6 تونناعا دەيىن ءونىم ساقتاي الادى. نان زاۋىتى مەن كوكونىس قويماسىن كەلەر جىلى پايدالانۋعا بەرۋدى جوسپارلاپ وتىرمىز. ءسۇت وڭدەۋ زاۋىتى 2024 جىلى تاۋلىگىنە 100 تونناعا دەيىن ءونىم بەرەدى.
ازىق-تۇلىك ماسەلەسىن قامتاماسىز ەتۋ ءۇشىن زاماناۋي لوگيستيكالىق ورتالىق جانە كوممۋنالدىق قويما سەكىلدى جوبالاردىڭ دا ماڭىزى زور. ولار ازىق-تۇلىكتى دە, ءدارى-دارمەكتەردى دە, سول سياقتى وزگە دە ماڭىزدى ونىمدەردى ساقتاۋعا مۇمكىندىك بەرەدى. ەكى جوباعا ارنالعان جەكە ينۆەستيتسيالار سوماسى شامامەن 32 ملرد تەڭگەنى قۇرايدى.
وسىعان دەيىنگى ينۆەستيتسيالىق كەڭەستە جوعارىدا اتالعان زاۋىتتار مەن لوگيستيكالىق ورتالىقتارعا قولداۋ بىلدىرگەنبىز. جەكە ينۆەستيتسيالاردى جۇمىلدىرۋ ەسەبىنەن قالادا مەكتەپتەر, مەديتسينالىق نىساندار, سپورت ورتالىقتارى, جىلىجاي كەشەندەرى, كوتەرمە-تاراتۋ ورتالىقتارى جانە ت. ب. سالىنىپ جاتىر. وسى جىلدىڭ 10 ايىندا قالا ەكونوميكاسىنا 1 تريلليون تەڭگەدەن استام جەكە ينۆەستيتسيا تارتىلدى. 2021-2022 جىلدارى – 2 تريلليوننان 300 ملرد تەڭگەدەن استام» دەدى ەلوردا اكىمى.
