بىلتىردان بەرى استانادا ەكولوگيالىق جاعىنان عانا ەمەس, قاۋىپسىزدىك تۇرعىسىنان دا ءتيىمدى تاكسيلەر جۇرە باستاعانى بەلگىلى. استانادا وسىنداي كولىكتەردىڭ سانى تاعى كوبەيمەك. بۇل تۋرالى «ەكوتاكسي» ورتالىعىنىڭ باسقارۋشى ديرەكتورى ءادىلحان جاقىپبەكوۆ ايتىپ بەردى.
– استانادا العاش «ەكوتاكسي» قىزمەتى ىسكە قوسىلعاندا, وڭتۇستىك كورەيالىق «SsangYong Kyron» ماركالى 100 كولىك جولعا شىققانى بەلگىلى. بۇگىندە تاكسوپاركتىڭ قاراماعىندا ەكولوگيالىق وتىنمەن جۇرەتىن قانشا كولىك بار؟
– قازىرگى تاڭدا جولاۋشىلار تاسىمالدايتىن 170 كولىك بار. 2017 جىلعا قاراي ولاردىڭ سانى 500-گە جۋىقتايدى دەپ بولجانۋدا.
– بۇل «ەكسپو – 2017» حالىقارالىق كورمەسىنە بايلانىستى بولار؟
– ارينە. الەمدىك دەڭگەيدەگى وسىناۋ ءىرى شارا اياسىندا استانا ميلليونداعان قوناقتى قارسى العالى وتىر. مۇنداي جاۋاپتى ساتتە باس شاھار قاي جاعىنان دا تالاپقا ساي بولۋى كەرەك. جالپى استانادا ەكوتاكسي جوباسىنىڭ دۇنيەگە كەلۋىنىڭ ءوزى «ەكسپو – 2017» حالىقارالىق كورمەسىنە قالا ينفراقۇرىلىمىن دايارلاۋداعى العاشقى قادامداردىڭ ءبىرى بولدى. كورمەنىڭ تاقىرىبى بولاشاق ەنەرگياسى ەكەنى بەلگىلى. وسىعان سايكەس, «جاسىل» جولعا كوشۋدىڭ بىردەن-ءبىر جولى دا ەكوتاكسيلەر دەۋگە بولادى.
– بۇگىندە ەكوتاكسيگە استانالىق جولاۋشىلاردىڭ سۇرانىسى قانداي؟
– بۇل تاكسيلەردە ەڭ ءبىرىنشى ادامنىڭ قاۋىپسىزدىگىنە كەپىلدىك بەرىلەدى. سوندىقتان سۇرانىس جامان ەمەس. ەكوتاكسي» قىزمەتى ىسكە قوسىلعان كۇننەن بۇگىنگە دەيىنگى مەرزىمدە 70 مىڭنان اسا تاپسىرىس كەلىپ ءتۇستى. كۇنىنە جەلىگە 130 كولىك شىعادى. سونىڭ 85-ءى – كۇندىز, قالعانى تۇندە جۇمىس ىستەيدى. ءار ەكيپاج ءبىر اۋىسىمدا جولاي الىپ كەتەتىن جولاۋشىلاردى ەسەپتەمەگەندە ورتا ەسەپپەن 15 تاپسىرىس ورىندايدى.
– ال, ەكوتاكسيمەن جولاۋشىلاردى تاسىمالداۋدىڭ قۇنى قانداي؟
– تاكسيدىڭ قۇنىن تاكسومەتر ەسەپتەپ شىعارادى. بۇل – جۇرگەن جولىڭىزدىڭ قاشىقتىعىنا بايلانىستى. نەگىزگى تاريف, ياعني 5 كم دەيىن – 750 تەڭگە. ەگەر باراتىن جەرىڭىز وسى قاشىقتىقتان اسىپ كەتسە, ءار كيلومەترىنە 120 تەڭگە تولەيسىز. جولاي دۇكەنگە نەمەسە دارىحاناعا, باسقا دا ورىندارعا كىرىپ-شىعۋعا بولادى. تاكسيدىڭ 10 مينۋت كۇتكەنى تەگىن. ودان اسىپ كەتسە, ءار مينۋتىنا 28 تەڭگە تولەۋگە تۋرا كەلەدى. اەروپورتتان الىپ كەلۋ – 2700 تەڭگە. وسى ايدان باستاپ بەنزين باعاسى قىمباتتاعانى بەلگىلى. سوعان بايلانىستى كوپتەگەن تاكسوپاركتەر تاكسي قۇنىن قىمباتتاتۋدى كوزدەپ وتىر. ال ءبىزدىڭ تاكسيلەر گازبەن جۇرەتىندىكتەن باعا سول قالپىندا ساۇتالادى.
قىمبات نۇرعالي
