بۇگىندە تاۋەلسىزدىكتىڭ قۇرداستارى ءارتۇرلى سالادا ەڭبەك ەتىپ, ەل دامۋىنا ەسەلەپ ۇلەس قوسۋدا. سولاردىڭ ىشىندە تەاتر ساحناسىندا جۇرگەندەرى دە بارشىلىق. ءبىزدىڭ بۇگىنگى كەيىپكەرىمىز ەلورداداعى ق.قۋانىشباەۆ اتىنداعى مۋزىكالىق دراما تەاتردىڭ اكتەرى, تاۋەلسىزدىك قۇرداسى – ءابىلمانسۇر سەرىكوۆ.
تەك تەاتردا عانا ەمەس, كينودا دا اتىن قالىپتاستىرعان ءابىلمانسۇر ونەرلى وتباسىندا دۇنيەگە كەلگەن. اكەسى ءابۋناسىر سەرىكوۆ – بەلگىلى ازىلكەش, اكتەر, قازاقستان رەسپۋبليكاسىنىڭ مادەنيەت قايراتكەرى. ال اناسى ليزا سەرىكوۆا – ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ اكتريساسى. اكە ءىزىن جالعاعان ءابىلمانسۇر 10 جاسىنان باستاپ ع.مۇسىرەپوۆ اتىنداعى قازاق مەملەكەتتىك اكادەميالىق جاسوسپىرىمدەر جانە بالالار تەاترىنىڭ ساحناسىنا شىققان. العاشقى ءرولى – دراماتۋرگ م.قابانبايدىڭ «جيھانگەز تيتي» ەرتەگىسىندەگى باس كەيىپكەر تيتي. كينو سالاسىنا 6-سىنىپ وقىپ جۇرگەننەن باستاپ كىرىسكەن. 2009-2013 جىلدارى الماتى قالاسىنداعى ت.جۇرگەنوۆ اتىنداعى قازاق ۇلتتىق ونەر اكادەمياسىندا وقۋعا ءتۇسىپ, «تەاتر جانە كينو ءارتيسى» ماماندىعى بويىنشا ءتالىم العان.
ول جاستىعىنا قاراماستان تەاتر مەن كينو سالاسىندا ەداۋىر جەتىستىككە جەتتى. اتاپ ايتقاندا, 2015 جىلى ماسكەۋدە وتكەن «زولوتوي ۆيتياز – 2015» حالىقارالىق تەاتر فورۋمىندا «تىراۋلاپ ۇشقان تىرنالار» سپەكتاكلىندەگى پەرنەبەك ءرولى ءۇشىن «التىن ديپلوم» يەگەرى اتاندى. سودان سوڭ «ساحناگەر-2017» تۇڭعىش ۇلتتىق تەاتر بايقاۋىندا «ءۇمىت» اتالىمىمەن ماراپاتتالدى. 2020 جىلى «دارىن» مەملەكەتتىك جاستار سىيلىعىنا يە بولدى. سونداي-اق ول بىرنەشە كينوفيلمدە: 2009 جىلى «ءبىرجان سال», 2011 جىلى «بالالىق شاعىمنىڭ اسپانى», «جاۋجۇرەك مىڭ بالا», 2014 جىلى «ۆوپرەكي ۆسەمۋ», «ودنوكلاسسنيكي: كوموك», «سۇربويداق», «جەدەل جاردەم 2», «ۇلجان», 2015 جىلى «نەسلوملەننىي», «كەڭەسشىلەر», «ماحاببات كوكتەمى», «جىبەك», «تاڭداۋ», 2016 جىلى «سۇيە بىلسەڭ», «ۆا-بانك» سەكىلدى كينوجوبالاردا شەبەر ويناعان.
كەيىپكەرىمىز «بالالىق شاعىمنىڭ اسپانى» فيلمىندە سۇلتان ءرولى ارقىلى ءدۇيىم جۇرتقا تانىلدى. بيوگرافيالىق فيلمدە ەلباسىنىڭ ءرولىن جوعارى دەڭگەيدە سومداپ, ەل ىقىلاسىنا بولەندى. ءدال سول جىلى اقان ساتاەۆتىڭ ۇزدىك تۋىندىلارىنىڭ ءبىرى «جاۋجۇرەك مىڭ بالا» فيلمىنە ءتۇستى. تاۋەلسىزدىك قۇرداسى ءابىلمانسۇر سەرىكوۆ ەسىمى جاستار اراسىندا تانىمال. جاقىندا شىققان «5:32» فيلمىندە باستى رولدەردىڭ ءبىرىن سومدادى.
«اكتەر وي ادامى بولادى» دەيدى فرانتسۋزدار. ءبىز بۇگىن تاۋەلسىزدىكپەن قاتار وربىگەن جاس تالانتتىڭ ومىرىنە توقتالدىق. وردا بۇزار وتىز جاسىندا حالىقتىڭ سۇيىكتىسىنە اينالعان ابزال جانعا اق جول تىلەيمىز!
