ەلدى ەلەڭ ەتكىزگەن
كاريموۆتىڭ اتىن اتاۋعا تىيىم سالىندى ما؟
وزبەكستان رەسپۋبليكاسىنىڭ ۇلتتىق تەلەراديوكومپانيا قۇرامىنداعى تەلەارنالاردا ەلدىڭ بۇرىنعى پرەزيدەنتى يسلام كاريموۆتىڭ ەسىمىن اتاۋعا تىيىم سالىندى.
وزبەكستاننىڭ تۇڭعىش باسشىسىنىڭ فوتوسىن قولدانباۋ, ەسىمىن اتاماۋ تۋرالى بۇيرىق رەسمي تۇلعالار تاراپىنان بەرىلگەن دەگەن دەرەك بار.
– وسى جىلدىڭ باسىندا ەفيردە يسلام كاريموۆ ەسىمىن از قولدانۋ ايتىلسا, ەندى تىپتەن تىيىم سالىندى. سوڭعى ايدا رەداكتورلارىمىز يسلام كاريموۆ اتىنا وتە ساق بولىپ ءجۇر. شىنى كەرەك, بۇرىنعى پرەزيدەنتتىڭ اتىن اتاۋ ەكسترەميستىك توپتىڭ باسشىسى تاحير يۋلداشەۆتىڭ اتىن اتاۋدان دا قاۋىپتىرەك, – دەپ حابارلادى «راديو وزودليك».
ال رەسەيدىڭ lenta.ru اقپارات پورتالىنىڭ حابارلاۋىنشا, 20 تامىز كۇنى سامارقاند پەن قاشقاداريا وبلىستارىندا رەيد ءجۇرىپ, مارقۇم پرەزيدەنتتىڭ بەينەسى بار كادەسىيلاردىڭ ساتىلۋىنا تىيىم سالىندى. ال اتالمىش زاتتاردى ساتقان ساۋداگەرلەرگە ايىپپۇل سالىنىپ, تاركىلەندى.
گەنوتسيد بولدى ما؟
بىرىككەن ۇلتتار ۇيىمى ميانمانىڭ راكحاين شتاتىنداعى روحيندجالىقتارعا جاسالعان زورلىق ارەكەتتەردى تەرگەپ شىعىپ, ەل اسكەرىن جانە قولباسشىسى مين اۋنگ حلايندى جازاعا تارتپاق.
تەرگەۋ قۇجاتتارى 18 قىركۇيەك كۇنى جەنەۆادا وتەتىن ادام قۇقىقتارى جونىندەگى بۇۇ-نىڭ كەزەكتى وتىرىسىندا رەسمي تۇردە تانىستىرىلادى. ايتا كەتەر ءبىر جايت, تەرگەۋشىلەر ميانما جەرىنە كىرگىزىلمەگەندىكتەن, قۇجات, نەگىزىنەن, زارداپ شەككەندەردەن الىنعان ينتەرۆيۋ, سپۋتنيك ارقىلى تۇسىرىلگەن سۋرەتتەر مەن ۆيدەولار ارقىلى ازىرلەندى. جۇمىس بارىسىندا ساراپشىلار بانگلادەش, يندونەزيا, مالايزيا, تايلاند جانە ۇلىبريتانيا ەلدەرىن ارالاپ شىققان.
بۇل مىندەتتى ورىنداۋشىلار ميانما ءاسكەرىنىڭ گەنوتسيد جاساعانىنا تولىقتاي كوز جەتكىزىپ وتىر. جەنەۆادا وتەتىن وتىرىستا لاۋازىمدى قىزمەتتە وتىرعانداردىڭ روحيندجالىقتارعا قارسى بۇيرىق بەرگەنى ناقتى قۇجاتتارمەن دالەلدەنبەك.
جۇرگىزۋشىسى جوق تاكسي
توكيودا Hinomaru Kotsu كومپانياسى ZMP فيرماسىمەن بىرگە جۇرگىزۋشىسى جوق تاكسي كولىكتەرى ارقىلى جولاۋشىلار تاسىمالداۋعا كىرىسىپ كەتتى.
سىناق رەجيمىندە ءجۇزەگە اسىپ جاتقان باستاما 8 قىركۇيەككە دەيىن جالعاسپاق. Toyota مينيۆەنىندەگى تاكسي كۇنىنە ءتورت رەيس جاسايدى. ءاۆتوموبيلدىڭ قوزعالىسى, بۇرىلىسى اۆتوماتتى تۇردە جۇزەگە اسادى. دەي تۇرعانمەن ۇيىمداستىرۋشىلار ساقتىق رەتىندە جۇرگىزۋشىنىڭ بىرگە وتىرۋىن ءجون كورىپتى. ال جولاقى 14 دوللار سوماسىن قۇرايدى.
كومپانيا باسشىلارىنىڭ ايتۋىنشا, بۇل تاكسي جۇرگىزۋشىلەرىنىڭ جەتىسپەۋشىلىگىنە قاتىستى ماسەلەنى شەشپەك. تەستىك رەجيمدەگى باستاما ءساتتى جۇزەگە اسسا, 2020 جىلى توكيوداعى وليمپيادا ويىندارىندا قولدانىسقا ەنگىزىلمەك.
ايتا كەتەيىك, بىلتىر جاپونيا بيلىگى جۇرگىزۋشىسىز جۇرەتىن ءارى ەكولوگيالىق تازا اۆتوموبيل وندىرىسىنە 25 ملرد دوللار كولەمىندە قارجى بولگەن. ەگەر ءبارى جوسپارلى تۇردە جۇزەگە اسسا, 2030 جىلعا قاراي ءاربىر بەس كولىكتىڭ بىرەۋى جۇرگىزۋشىسىز باسقارىلماق.
ايان ءابۋالي