استانادا جۇزەگە اسىرىلا باستاعان «ە-پيك» ەلەكتروندى جوباسىنا قالاداعى 486 پيك-ءتىڭ 473-ءى نەمەسە 97 پايىزى قوسىلعان. بۇل جوبا شەڭبەرىندە قاناتقاقتى رەجيمدە جيناقتاۋشى بۋحگالتەريا ىسكە قوسىلدى. سول ارقىلى كەز كەلگەن پاتەر يەلەنۋشى ءوز كووپەراتيۆىنىڭ شىعىندارىن باقىلاپ, قارجى قانداي كولەمدە جۇمسالىپ جاتقانىن بىلە الادى.
«استانا Innovations» اق باسقارما توراعاسىنىڭ تسيفرلى ينفراقۇرىلىم بويىنشا ورىنباسارى مەيرام ديۋسيۋكوۆتىڭ مالىمدەۋىنشە, «ە-پيك» ءموبيلدى قوسىمشاسى 7995 رەت جۇكتەلگەن, تىركەلگەن قولدانۋشىلاردىڭ سانى – 8575, ال 5 مىڭعا جۋىق ادام قوسىمشانى بەلسەندى تۇردە قولدانادى.
الايدا قالالىق ءماسليحات دەپۋتاتى يرينا مانجانوۆانىڭ ەسەپتەۋىنشە, ەلورداداعى پيك-تەردىڭ 97 پايىزى ەلەكتروندى جوباعا قوسىلعانىمەن, تۇرعىندار ءۇشىن ونىڭ پايداسى ءالى دە بولسا از بوپ تۇر.
«پيك جۇمىسىنا قاتىستى حالىقتىڭ شاعىمى ءجيى تۇسەدى. سونىڭ ىشىندە تۇرعىندار باسقارۋشى كومپانيالاردان اقپارات الا المايتىنىنا ارىزدانادى. سول سەبەپتەن ءبىز ماركەتينگتىك زەرتتەۋ جۇرگىزدىك. سونى جۇرگىزۋ بارىسىندا پيك جۇمىسكەرلەرى «ە-پيك» جوباسىن قولداناتىنىنا, اۆتوماتتاندىرۋدىڭ پايداسىن ءتۇسىنىپ, تابىس كوزى رەتىندە كورەتىنىنە, اتالمىش قوسىمشا جايلى حالىققا ايتاتىنىنا كۇمان تۋدى. بۇل جاعداي, مەنىڭشە, اۆتوماتتاندىرۋ جۇيەلەرىندە جۇمىس ىستەۋ تاجىريبەسىنىڭ جوقتىعىنان بولىپ وتىر» دەيدى دەپۋتات.
ونىڭ سوزىنشە, استانا حالقى «ە-پيك» جوباسى تۋرالى بىلە قويمايدى, سول سەبەپتەن قولدانبايدى. تۇرعىندار تۇيتكىلدەر تۋىنداسا, بۇرىنعىسىنشا پيك-كە تەلەفون شالادى نەمەسە وزدەرى بارادى.
يرينا مانجانوۆا باستاعان توپتىڭ زەرتتەۋ ناتيجەلەرىنە جۇگىنسەك, پيك جۇمىسكەرلەرىنىڭ ءبارى «ە-پيك» جوباسى تۋرالى بىلەدى. سوعان قاراماستان, قوسىمشا ارقىلى قولدانۋشىلاردان وتىنىشتەر مۇلدە تۇسپەيدى. ارينە, بۇل جاعدايدا وتىنىشتەردى قابىلداۋ, ولارمەن جۇمىس ىستەۋ كورسەتكىشى نولگە تەڭ.
دەپۋتات الەۋمەتتىك جەلىدە جۇرگىزىلگەن ساۋالناما قورىتىندىسىمەن دە تانىستىردى. ناتيجەسىندە حالىقتىڭ 27 پايىزى عانا «ە-پيك» جوباسى تۋرالى ەستىسە, 4 پايىزى عانا بۇل قوسىمشانى قولداناتىنى, سولاردىڭ 1 پايىزى ايىنا ءبىر رەتتەن ارتىق پايدالاناتىنى انىقتالدى.
«ە-پيك» سەكىلدى تاماشا جوبانىڭ بارىنە پايدالى بولاتىنى بەلگىلى. الايدا ونى جەتىلدىرۋگە, حالىققا تانىتۋعا ءالى دە ۋاقىت كەرەك» دەيدى ي.مانجانوۆا.
