ەلوردا تورىندە قازاق كۇرەسىنەن ازيا چەمپيوناتىنىڭ جالاۋى جەلبىرەدى. بايراقتى باسەكەدە 11 ەلدىڭ 77 بالۋانى 8 سالماق دارەجەسى بويىنشا باق سىنادى.
مادەنيەت جانە سپورت مينيسترلىگى مەن استانا قالاسى اكىمدىگىنىڭ, «سامۇرىق-قازىنا» ۇلتتىق ءال-اۋقات قورىنىڭ, ERG ەۋرازيالىق توبىنىڭ جانە «ەلوردا اقپارات» مەدياكومپانيانىڭ قولداۋىمەن, حالىقارالىق قازاق كۇرەسى فەدەراتسياسىنىڭ ۇيىمداستىرۋىمەن وتكەن چەمپيوناتتا گرۋزيا, وزبەكستان, ليتۆا, ۋكراينا ەلدەرىنەن كەلگەن جانە استانا مەن الماتى, سەمەي قالالارىنان شاقىرىلعان حالىقارالىق دارەجەدەگى 16 سپورت تورەشىسى بالۋانداردىڭ كۇرەسىنە قازىلىق ەتتى.
جانكۇيەر قاۋىم «داۋلەت» سپورت كەشەنىنە لىق تولدى. جارىستىڭ اشىلۋ سالتاناتىندا ءسوز سويلەگەن مادەنيەت جانە سپورت ءمينيسترى ارىستانبەك مۇحامەديۇلى بارشا سپورتشىعا ساتتىلىك تىلەدى.
تارتىستى باسەكەدە ازيانىڭ كىل مىقتىلارىمەن بەلدەسكەن قازاق بالۋاندارى شاشاسىنا شاڭ جۇقتىرمادى. مىسالى, چەمپيوناتتىڭ ەڭ تومەنگى سالماق دارەجەسىندە قازاقستاندىق ەربول الدۋحان قارسىلاس شاق كەلتىرمەدى. اقتىق سايىستا موڭعوليالىق بۋحچۋيۋن داۆااناياممەن كەزدەسكەن ول قارسىلاسىن تىزە بۇكتىرىپ, العاشقى التىندى قورجىنعا سالدى. بۇل سالماقتا قولا مەدالدى تاجىكستاندىق وياتوللا قوجاەۆ يەلەندى. ال 60 كەلىگە دەيىنگى سالماق دارەجەسىندە قازاق بالۋانى وسپان داۋىلباي وزبەكستاننان كەلگەن شوحرۋح نۋريددينوۆپەن بەلدەستى. ولاردىڭ باسەكەسى وتە تارتىستى ءوتىپ, قوس بالۋان ءبىر-بىرىنە سوڭىنا دەيىن بەرىسپەي باقتى. اقىرى بەلدەسۋگە ۇلاسقان كۇرەس سوڭىندا جەڭىس وسپان داۋىلبايدىڭ ەنشىسىنە بۇيىردى. قولا مەدالدى موڭعول بالۋانى لحاگۆاجامتس ۋنيبجلەد, جاپون بالۋانى يپپەي ناكانو, يراندىق ساججاد كاراميان گاندومبانيلەر ءبولىستى. 66 كەلى سالماقتا كۇرەسكەن قازاقستاندىق نۇربولات ىزىمعاليەۆ فينالدا موڭعوليالىق باسحۋ يوندونپەرەنلەيمەن جولىقتى. باسەكە تارتىستى وتكەنمەن, قازاق بالۋانى موڭعول سپورتشىسىنا جول بەرىپ الدى. ءۇشىنشى ورىندى تاجىكستاندىق رازيوۆلوك لويكوۆ پەن وزبەكستاندىق دونيار سۇلتانباەۆ يەلەندى. 82 كەلىگە دەيىنگى سالماقتا فينالعا قازاق بالۋانى ەرسىن سەيىتقازينوۆ پەن وزبەك بالۋانى الىشەر قۇدايبەرگەنوۆ شىقتى. ۇزاققا سوزىلعان باسەكەدە قازاق بالۋانى قارسىلاسىنان ايلاسىن اسىرىپ, ازيا چەمپيوناتىندا توپ جاردى. اتالمىش سالماقتا ءۇشىنشى ورىن جاپوندىق سەي تاكيگاشيرا مەن موڭعوليالىق تۇمەنناسىن ەردەنەتوعتوحقا بۇيىردى. 90 كەلىگە دەيىنگى سالماقتا ونەر كورسەتكەن قازاقستاندىق بالۋان ءادىلجان ىستىباەۆ موڭعوليالىق بالۋان تەنگيز باتسايحاندى جەڭىپ, چەمپيون اتاندى. قولا جۇلدەنى وزبەكستاندىق ساريار يكراموۆ پەن تۇرىكمەنستاندىق دۋردۋ نوجاگۋليەۆ ەنشىلەدى. سونداي-اق 100 كەلىگە دەيىنگى سالماق بويىنشا اقتىق سايىستا قازاقستاننىڭ نامىسىن قورعاعان باۋىرجان قاباەۆ بارىن سالعانمەن, موڭعوليالىق تۋۆشىنجارعال گاننان ايلاسىن اسىرا المادى. ءۇشىنشى ورىن تاجىكستاندىق كۋرشەد ءشارىپوۆ پەن تۇرىكمەنستاندىق يحلاس سەتداروۆتىڭ قورجىنىندا كەتتى. ال چەمپيوناتتىڭ ەڭ جوعارى سالماق دارەجەسى بويىنشا اقتىق سىندا موڭعوليا بالۋانى سەرىك بەردىمۇراتپەن شىققان «قازاقستان بارىسى» جانە «الەم بارىسى» اتانعان قازاق بالۋانى ايبەك نۇعىماروۆ قارسىلاسىن ويسىراتا جەڭىپ, ازيانىڭ ءابسوليۋتتى چەمپيونى اتاندى. جالپى, بۇل ەكى بالۋان – ءبىر-بىرىنە بۇرىننان تانىس قارسىلاس. وتكەن جىلعى «الەم بارىسىندا» ولار جارتىلاي فينالدا بەلدەسىپ, كەزدەسۋدە ايبەك باسىم تۇسكەن بولاتىن. بۇل جولى دا ايبەك جەڭىستى قولدان بەرمەدى. چەمپيوناتتىڭ قولا جۇلدەسىن جاپون بالۋانى تانيموتو سۋزۋكيدى ۇتقان تاجىكستاندىق دادوحان كۋرباناليەۆ ەنشىلەدى.
ازيا چەمپيوناتىنداعى نەگىزگى باسەكە قازاق پەن موڭعول بالۋاندارى اراسىندا ءوربىدى. 8 سالماق بويىنشا 4 التىندى قانجىعاعا بايلاعان قازاق بالۋاندارى كوماندالىق ەسەپتە دە جەڭىس تۇعىرىنان كورىنىپ, مىقتى ەكەندىكتەرىن تاعى ءبىر دالەلدەدى. ال 3 التىن موڭعول, 1 التىن تۇركىمەن بالۋاندارىنىڭ ەنشىسىنە بۇيىردى. چەمپيوناتتىڭ جالپى جۇلدە قورى 20 مىڭ اقش دوللارىن قۇرادى.
جەڭىمپازدار مەن جۇلدەگەرلەردى حالىقارالىق قازاق كۇرەسى فەدەراتسياسىنىڭ پرەزيدەنتى قانات بوزىمباەۆ, وليمپيادا چەمپيونى, قازاقستاننىڭ ەڭبەك ەرى جاقسىلىق ۇشكەمپىروۆ جانە «قازاقستان بارىسى» جوباسىنىڭ اۆتورى ارمان شوراەۆ سىندى تۇلعالار ماراپاتتادى.
