شاكارىم وقۋلارى ءىى رەسپۋبليكالىق بايقاۋىنىڭ استانا قالالىق كەزەڭىندە توپ جارعان №73 مەكتەپ-ليتسەيدىڭ 5-سىنىپ وقۋشىسى ەدىگە قيلىمبەكۇلى بايقاۋ قورىتىندىسىندا باس جۇلدەنى يەلەندى. اتالمىش رەسپۋبليكالىق بايقاۋعا 17 وبلىس پەن رەسپۋبليكالىق ماڭىزى بار قالالاردىڭ 19 كىتاپحاناسى اتسالىستى. فينالدا ءار ءوڭىر مەن قالادان 5-8-سىنىپ ارالىعىنداعى 18 ءجاسوسپىرىم جارىستى. قورىتىندىسىندا ەلوردا وق بويى وزىق شىقتى.
جالپى باستاپقىدا وسى بايقاۋعا ەلىمىزدىڭ بارلىق اۋماعىنان 2000-نان اسا ۇمىتكەر قاتىسىپ, ەرەكشە بەلسەندىلىك تانىتتى. وڭىرلەردە توپ جارعاندار استاناعا جينالىپ, ۇلتتىق اكادەميالىق كىتاپحانادا ونەرىن ورتاعا سالدى.
قازىلار القاسىنىڭ قۇرامىندا بەلگىلى اقىن, عالىم, فيلولوگيا عىلىمدارىنىڭ كانديداتى, پروفەسسور جانات اسكەربەكقىزى, وسى بايقاۋدىڭ وتۋىنە قولداۋ كورسەتىپ, دەمەۋشىلىك ەتكەن كاسىپكەر, «ادال اس» كورپوراتسياسىنىڭ پرەزيدەنتى ەرمەك مەزىباەۆ, ابايتانۋشى عالىم, «اباي اكادەمياسى» عىلىمي-زەرتتەۋ ينستيتۋتىنىڭ ديرەكتورى جاندوس اۋباكىر, بەلگىلى اقىن, «دارىن» مەملەكەتتىك جاستار سىيلىعىنىڭ لاۋرەتى قالقامان سارين, ۇلتتىق اكادەميالىق كىتاپحانا ديرەكتورى عازيزا قۇدايبەرگەنقىزى بولدى.
بايقاۋ قورىتىندىسىندا باس جۇلدەنى استانا قالاسىنىڭ №73 مەكتەپ-ليتسەيىنىڭ 5-سىنىپ وقۋشىسى ەدىگە قيلىمبەكۇلى يەلەندى. 1-ورىندى 7-سىنىپ وقۋشىسى ءاديا ادىلاحمەت (تاراز قالاسى), 2-ورىندى 8-سىنىپ وقۋشىسى كاۋسار يسليامقىزى (باتىس قازاقستان وبلىسى), 3-ورىندى 5-سىنىپ وقۋشىسى ايارۋ الىبەك (اباي وبلىسى) الدى. جەڭىمپازدارعا جانە بايقاۋعا قاتىسۋشىلارعا دەمەۋشىلەر ەسەبىنەن باعالى سىيلىق بەرىلسە, جەتەكشىلەرى ارنايى العىس حاتپەن ماراپاتتالدى.
