مەملەكەت باسشىسى قاسىم-جومارت توقاەۆ VIII سايلانعان پارلامەنتتىڭ ءبىرىنشى سەسسياسىنىڭ اشىلۋى بارىسىندا شاعىن جانە ورتا بيزنەستىڭ باسەكەگە قابىلەتىلىگىن ارتتىرۋ ماسەلەسىنە باسا ءمان بەرە وتىرىپ, وسى ورايدا شاعىن جانە ورتا بيزنەسكە قولداۋ كورسەتۋدىڭ بىرىڭعاي كەشەندى باعدارلاماسىن ازىرلەۋدى تاپسىردى. بۇگىنگى تاڭدا استانادا 200 مىڭنان اسا كەسىپكەرلىك نىساندارى جۇمىس ىستەيدى. بيزنەس سالاسىندا 460 مىڭ ادام جۇمىسپەن قامتىلىپ وتىر. بۇل جۇمىسقا قابىلەتتى استانالىقتاردىڭ 71 پايىزىن قۇرايدى.
ەلورداداعى شاعىن جانە ورتا بيزنەس, سالالىق قاۋىمداستىقتار, قۇقىق قورعاۋ جانە قاداعالاۋ ورگاندارى, «اتامەكەن» كاسىپكەرلەر پالاتاسىنىڭ وكىلدەرى قاتىسقان جيىندا كاسىپكەرلىكتى دامىتۋدىڭ ماسەلەلەرى تالقىلاندى.
– استانادا 200 مىڭنان استام كاسىپكەرلىك سۋبەكتىسى جۇمىس ىستەيدى. بيزنەس 460 مىڭ ادامدى جۇمىس ورىندارىمەن قامتاماسىز ەتەدى, بۇل ەلوردانىڭ ەكونوميكالىق بەلسەندى حالقىنىڭ 71%-ىن قۇرايدى. ءبىز كاسىپكەرلەرگە جۇيەلى قولداۋ كورسەتۋگە مۇمكىندىك بەرەتىن بىرقاتار شارالار قابىلدادىق: اەا جانە يندۋستريالىق پارك اۋماعىندا پرەفەرەنتسيالار, ءتۇرلى باعدارلامالار بويىنشا گرانتتار مەن كرەديتتەر بەرىلەدى, Astana Invest ينۆەستورلارىنا ارنالعان فرونت-وفيس جۇمىس ىستەيدى, ينجەنەرلىك جەلىلەردى جۇرگىزۋگە, قاجەتتى ينفراقۇرىلىمدى قۇرۋعا كومەك كورسەتىلەدى. بىراق, مۇنىمەن توقتاپ قالمايمىز. الداعى ۋاقىتتا «اتامەكەن» ۇكپ-مەن بىرلەسىپ قوسىمشا قولداۋ شارالارىن جاسايتىن بولامىز, ونىڭ ىشىندە بيۋروكراتيالىق كىدىرىستەر مەن كەدەرگىلەردى جويۋدى جالعاستىرامىز, – دەدى استانا اكىمى جەڭىس قاسىمبەك.
ەلوردادا كاسىپكەرلەرمەن كەزدەسۋلەر تۇراقتى نەگىزدە وتكىزىلىپ كەلەدى. قالالىق كاسىپكەرلەر پالاتاسىنىڭ ديرەكتورى بەيسەن جولبولديەۆتىڭ ايتۋىنشا, قازىرگى ۋاقىتتا پالاتا اكىم ورىنباسارىنىڭ, باسقارما وكىلدەرىنىڭ قاتىسۋىمەن وبلىستىق كەڭەستەردىڭ 15 وتىرىسىن وتكىزدى.
– وتكەن جىلى 15 مىڭ كاسىپكەردىڭ قۇقىقتىق مۇددەلەرى قورعالدى. ماسەلەن, قالا باسشىسىنىڭ 2022 جىلدىڭ تامىز ايىندا وتكەن بيزنەس وكىلدەرىمەن سوڭعى كەزدەسۋىنەن باستاپ كوتەرىلگەن 23 ماسەلەنىڭ 15-ءى شەشىلدى, 6-ى ءىشىنارا شەشىلدى, 2-ءى بويىنشا جۇمىس جۇرگىزىلۋدە. وسىلايشا, «استانا-تەحنوپوليس» اەا قىزمەتىنىڭ باسىم تۇرلەرىن كەڭەيتۋگە, تجكب ماسەلەلەرى بويىنشا اكىمدىك جانىنان ۇيلەستىرۋ كەڭەسىن قۇرۋعا, «كاسىپكەرلىكتى دامىتۋدىڭ 2021-2025 جىلدارعا ارنالعان ۇلتتىق جوباسى» باعدارلاماسى شەڭبەرىندە گرانتتىق قاراجاتتى ءبولۋ, ساۋدا سالاسىنداعى ينۆەستيتسيالىق جوبالاردى ىسكە اسىرۋ ءۇشىن جەر ۋچاسكەلەرىن ءبولۋ ماسەلەلەرى جۇزەگە اسىرىلىپ جاتىر, – دەدى ديرەكتور.
پالاتا جانە باسقا دا ءتيىستى ورگاندار بيزنەسكە جان-جاقتى كومەك كورسەتۋگە تىرىسادى, الايدا بۇل سالادا ولقىلىقتار ءالى دە بايقالۋدا.
ينجەنەرلىك جەلىلەر جاڭارتىلۋى كەرەك
ينجەنەرلىك جەلىلەر ماسەلەسى – قالا بيلىگىنىڭ نازارىنداعى اۋقىمدى تاقىرىپ. بيزنەس جەلىلەردى قۇرۋدا, بىراق ولاردى تاراتا المايدى. وڭىرلىك كەڭەس اكىمدىك ءۇشىن ارنايى انىقتاما دايىنداپ, وسى جاعدايعا ءوز كوزقاراسىن ءبىلدىردى.
– ينجەنەرلىك جەلىلەر پروبلەماسىمەن ءبىز 2020 جىلدان بەرى بەتپە-بەت كەزدەسىپ, وسى باعىتتا جۇمىس ىستەپ كەلەمىز, بۇل ماسەلەنى شەشۋ بارىسىندا مينيسترلىكتەر مەن باسقارمالاردىڭ وكىلدەرىمەن ۇنەمى كەزدەسىپ وتىرامىز. بۇل شارۋانىڭ بەكىتىلگەن ەرەجەسى بولماعاندىقتان, ءبىزدىڭ مىندەتىمىز –جەلىلەردى بەرۋ ەرەجەلەرىن ازىرلەۋ. وسىعان وراي جۇمىس توبىن قۇرۋدى, قالالىق ءماسليحاتتا ينجەنەرلىك جەلىلەردى بەرۋ ءراسىمىنىڭ تەتىگىن قاراستىرۋدى جانە بەكىتۋدى ۇسىنامىز, – دەدى «ەدەم» جشس باسشىسى, «اتامەكەن» كاسىپكەرلەر پالاتاسى وڭىرلىك كەڭەسىنىڭ مۇشەسى يرينا مانجانوۆا.
قالا باسشىسى بۇل ماسەلەنى ەسەپكە الا وتىرىپ, اكىمدىك الداعى ەكى جىل ىشىندە بارلىق ينجەنەرلىك جەلىلەردى بالانسقا الۋدى جوسپارلاپ وتىرعانىن اتاپ ءوتتى.
استانادا 200 مىڭنان استام كاسىپكەرلىك سۋبەكتىسى جۇمىس ىستەيدى. بيزنەس 460 مىڭ ادامدى جۇمىس ورىندارىمەن قامتاماسىز ەتەدى, بۇل ەلوردانىڭ ەكونوميكالىق بەلسەندى حالقىنىڭ 71%-ىن قۇرايدى
– بۇل – شىنىمەن دە وزەكتى ماسەلە. وسى رەتتە ءسىز جۇمىس بارىسىندا تەك جەكە قۇرىلىس سالۋشىلاردا عانا ەمەس, سونىمەن قاتار مەملەكەتتىك بيۋدجەت ەسەبىنەن نىساندار سالاتىن مەردىگەرلەردە دە ماسەلەلەر تۋىندايتىنىن دۇرىس اتاپ ءوتتىڭىز. قاڭتار ايىندا ءبىز بۇل پروتسەستى جانداندىردىق. شىن مانىندە, بالانسقا الىنباعان ينجەنەرلىك جەلىلەردىڭ كوپتىگى بۇكىل قالادا بايقالادى جانە ولار وتكەن جىلى عانا ەمەس, وسىدان بەس-التى جىل بۇرىن سالىنعان. ولاردى جوندەۋ قاجەت. نەلىكتەن جاعداي وسىلاي بولدى؟ «استانا-تەپلوترانزيت», «استانا سۋ ارناسى», اەك سياقتى كوممۋنالدىق كاسىپورىنداردىڭ, وكىنىشكە قاراي, ولاردى قابىلداۋعا قارجىلىق مۇمكىندىگى جوق, ويتكەنى وسى وبەكتىلەرگە سالىق اۋىرتپالىعى بىردەن سالىنۋدا, وعان قوسا ولاردى كۇتىپ ۇستاۋ جانە جوندەۋ جۇمىستارىن جۇرگىزۋ قاجەت. شىندىعىندا, تۇرعىنداردى جىلۋ, سۋ جانە ت.ب. كۇندەلىكتى تۇرمىسقا قاجەتتى زاتتارمەن ءدال وسى كاسىپورىندار قامتاماسىز ەتەدى. وسى جىلدىڭ قاڭتار ايىنان باستاپ ءبىز ينجەنەرلىك جەلىلەردىڭ باسىم بولىگىن بالانسقا الۋ جۇمىستارىن جۇرگىزىپ جاتىرمىز. بۇل – وتە اۋقىمدى ماسەلە. ءسىزدىڭ ۇسىنىسىڭىزدى قولدايمىن جانە ونى ماسليحاتقا دەپۋتاتتاردىڭ قاراۋىنا ۇسىنۋعا دايىنمىن, – دەدى استانا اكىمى.
جەڭىس قاسىمبەكتىڭ ايتۋىنشا, اعىمداعى جىلدىڭ 1 قاڭتارىنان باستاپ تۇرعىن ءۇيدى جوبالاۋ ءۇشىن تەحنيكالىق شارتتار بەرۋگە بىرقاتار شەكتەۋلەر مەن تىيىمدار قابىلدانعان.
– قالا قارقىندى دامىپ كەلەدى, ال ينجەنەرلىك جەلىلەردىڭ قۇرىلىسى ودان ءارى جۇرگىزىلۋدە. بۇگىندە ەلوردادا شامامەن 7 ملن شارشى مەتر تۇرعىن ءۇي سالىنىپ جاتىر, 15 ملن شارشى مەتر تۇرعىن ءۇيدى جوبالاۋعا رۇقسات بەرىلدى, بۇل قۇرىلىستىڭ قازىرگى قارقىنىن تومەندەتپەۋ ءۇشىن جەتكىلىكتى, – دەدى قالا باسشىسى.
اقىلى اۆتوتۇراقتار ءتيىمدى مە؟
Qaz Property باسقارۋشى جانە سەرۆيستىك كومپانيالار قاۋىمداستىعىنىڭ توراعاسى قايرات كوكەنوۆتىڭ ايتۋىنشا, بيزنەس-قوعامداستىق «استانانىڭ اۆتوتۇراق كەڭىستىگى» مەملەكەتتىك-جەكەمەنشىك سەرىكتەستىگىنىڭ جوباسىنا قاتىستى تۇجىرىمدامالىق پىكىرلەرىن قالا باسشىلىعىمەن بىرلەسىپ شەشۋدى كوزدەپ وتىر.
– اقىلى تۇراق كەڭىستىگى كەز كەلگەن الەمدىك تاجىريبەدە, اسىرەسە قالانىڭ ورتالىق بولىگىندە, قالالىق ترافيك ماسەلەلەرىن شەشۋدىڭ نەگىزگى ەلەمەنتتەرىنىڭ ءبىرى بولىپ تابىلادى. وسى سەبەپتى قالاعا اقىلى اۆتوتۇراقتار قاجەت جانە قالادا اقىلى اۆتوتۇراقتار بولۋى كەرەك. ءسىز مەملەكەتتىك-جەكەشەلىك ارىپتەستىك شارتىنىڭ بىرقاتار تالاپتارىن – ينۆەستيتسيالار كولەمىن, مەملەكەت پەن جەكە ينۆەستور پايداسىنىڭ ۇلەسىن جانە تۇراق ورىندارىن قايتا قاراۋ قاجەت دەپ دۇرىس پىكىر ءبىلدىردىڭىز. وكىنىشكە قاراي, اۆتوتۇراقتار الەۋمەتتىك نىساندارعا تىم جاقىن ورنالاسقان فاكتىلەر كەزدەسۋدە. بۇل جوبا ءالى دە پىسىقتالۋ ۇستىندە, ءبىز بارلىق قالا تۇرعىندارىنىڭ مۇددەلەرىن ەسكەرە وتىرىپ, جاڭا ۇسىنىستاردى كۇتەمىز, – دەدى جەڭىس قاسىمبەك.
الەۋمەتتىك تۇرعىن ۇيلەر كوبەيەدى
كاسىپكەرلەردىڭ الەۋمەتتىك-كاسىپكەرلىك كورپوراتسيا ارقىلى جەر بەرۋگە تىيىم سالۋى نازاردان تىس قالمادى. بۇعان دەيىن اكك ينۆەستيتسيالىق جانە يننوۆاتسيالىق جوبالاردى ىسكە اسىرۋ ءۇشىن كونكۋرستان تىس نەگىزدە جەر ۋچاسكەلەرىن بولگەن بولاتىن. الايدا ءىس جۇزىندە كوپپاتەرلى تۇرعىن ۇيلەر, مەيرامحانالار, اۆتوكولىك جۋ ورىندارىن سالۋ ءۇشىن جەر ۋچاسكەلەرىن ساتۋ فاكتىلەرى انىقتالدى. ولاردىڭ ايتۋىنشا, كوپتەگەن نىسانداردا تۇرعىن ۇيلەردىڭ قابىرعالارى تۇرعىزىلىپ, جوبالىق سمەتالاردىڭ دايىن بولعانىنا قاراماستان, بۇل جەرلەردە قۇرىلىس جۇمىستارى توقتاتىلدى.
– وتكەن جىلدان باستاپ تۇرعىن ءۇي وبەكتىلەرىن سالۋ ءۇشىن اكك تەتىكتەرى ارقىلى جەر بەرۋگە تىيىم سالىندى. قازىر شامامەن 159 گا جەر مەملەكەتكە قايتارىلۋى كەرەك. بۇل وسىعان دەيىن تۇرعىن ءۇي قۇرىلىسىن جۇرگىزۋ تۋرالى شەشىم قابىلدانعان ۋچاسكەلەر بولىپ تابىلادى. ازىرشە قۇرىلىس جۇمىستارى ءالى باستالماعان نىسانداردا قۇرىلىس توقتاتىلدى. جوعارعى سوت جۇمىسىنىڭ قورىتىندىسى بويىنشا ولارعا قاتىستى ودان ءارى شەشىم قابىلداناتىن بولادى. وسى رەتتە تاعى دا قايتالاپ ايتامىن: كەلەشەكتە اكك تەتىكتەرى ارقىلى جەر ۋچاسكەلەرى حالىقتىڭ الەۋمەتتىك وسال توپتارىنان تۇرعىن ءۇي كەزەگىندە تۇرعان ازاماتتار ءۇشىن «ەلوردا دامۋ» نەمەسە «ەلوردا قۇرىلىس كومپانياسى» سالاتىن الەۋمەتتىك تۇرعىن ءۇي قۇرىلىسىنا عانا بولىنەتىن بولادى, – دەدى ەلوردا اكىمى.
ەلوردا باسشىسىنىڭ ايتۋىنشا, قازىرگى تاڭدا ەلوردادا 48 مىڭعا جۋىق وتباسى تۇرعىن ۇيگە كەزەكتە تۇر.
وتاندىق وندىرۋشىلەرگە قولداۋ قاجەت
جالپىعا بىردەي وقىتۋ جوباسى اياسىندا كوپشىلىككە ءوز ونىمدەرىن ۇسىناتىن كاسىپكەرلەر دە بيزنەسىن دامىتۋ بارىسىندا ءبىرشاما قيىندىقتاردى باستان وتكەرۋدە. مەكتەپ فورماسىن تىگۋ كومپانياسىنىڭ وكىلى ينەسسا تولەگەننىڭ ايتۋىنشا, وقۋشىلاردىڭ سانى جانە ءار بالاعا بولىنگەن قاراجات تۋرالى اقپارات وندىرۋشىلەرگە جاڭا وقۋ جىلى قارساڭىندا عانا كەلىپ تۇسەدى. البەتتە, بۇل كاسىپكەرلەردىڭ جۇمىسىن قيىنداتادى.
– ءبىز 10 جىلدان استام ۋاقىت بويى سەرتيفيكاتتالعان مەكتەپ فورماسىن تىگۋمەن اينالىسىپ كەلەمىز. وزدەرىڭىز بىلەتىندەي, استانادا 2019 جىلدان باستاپ از قامتىلعان, كوپبالالى وتباسىلاردان شىققان بالالاردى, حالىقتىڭ الەۋمەتتىك وسال توپتارىن مەكتەپ فورماسىمەن قامتاماسىز ەتۋگە باعىتتالعان جالپىعا بىردەي وقىتۋ باعدارلاماسى جۇرگىزىلۋدە. بۇل باعدارلاما بويىنشا ءبىزدىڭ تاجىريبەمىز جەتكىلىكتى. بۇل رەتتە بارشاعا ىڭعايلى بولۋ ءۇشىن ەلەكتروندىق كارتوچكا جۇيەسى ازىرلەندى, جوبانى تسيفرلاندىرۋ جۇرگىزىلدى. الايدا 2022 جىلى ءبىلىم بەرۋ سالاسىنىڭ وكىلدەرى ۇكىمەتتىڭ №64 قاۋلىسىنا بىرقاتار تۇزەتۋلەر ەنگىزىلدى. مەنىڭ ويىمشا, باعدارلامانىڭ باستاپقى ماقساتى وتاندىق تاۋار وندىرۋشىلەرگە قولداۋ كورسەتۋ بولاتىن. سوندىقتان, بىزگە ءبىلىم باسقارماسىنىڭ قولداۋى وتە قاجەت. بۇل باعدارلاماعا قانشا وقۋشى قاتىساتىنىن, ءار بالاعا قانداي سوما بولىنەتىنىن ءبىز الدىن الا ءبىلىپ وتىرۋىمىز كەرەك. وتكەن جىلى وسى ساندار تامىز ايىندا عانا حابارلاندى, ال مەكتەپ فورماسىن تىگۋگە قىرۋار ۋاقىت قاجەت. ەگەر بيىل دا وسىنداي جاعداي قايتالانسا, جوسپاردى ورىنداۋ قيىن بولادى دەپ ويلايمىن, – دەدى كومپانيا وكىلى.
100 مىڭ وقۋشى ورنى سالىنادى
استانا اكىمى ەلوردادا وقۋ ورىندارىن سالۋ بويىنشا جۇيەلى جۇمىستار جۇرگىزىلىپ جاتقانىن اتاپ ءوتتى.
– قالادا مەكتەپ وقۋشىلارىنىڭ سانى جىل سايىن تەز وسۋدە. بيىل مەكتەپ تابالدىرىعىن 25 مىڭ بالا العاش رەت اتتاعالى تۇر, 9 مىڭعا جۋىق تۇلەك 11-سىنىپتى بىتىرەدى. وسىلايشا, جىل سايىن قالادا كەمىندە 10 مەكتەپ سالۋ قاجەتتىلىگى تۋىنداپ وتىر. بۇگىندە, وكىنىشكە قاراي, ەلوردادا 8 ءۇش اۋىسىمدى, 18 تىعىزدالعان مەكتەپ بار. مەملەكەت باسشىسىنىڭ تاپسىرماسى اياسىندا ءبىز بيىل 24 جايلى مەكتەپتىڭ 15-ءىن سالۋدى باستايمىز. قالعان قۇرىلىس جۇمىستارى كەلەسى جىلى باستالادى. سونىمەن قاتار, بيىل 11 مەكتەپتىڭ قۇرىلىسىن اياقتايمىز, ونىڭ 10-ى جاڭا وقۋ جىلى باستالعانعا دەيىن تاپسىرىلادى, – دەدى جەڭىس قاسىمبەك.
2025 جىلعا دەيىن ەلوردادا 100 مىڭعا جۋىق جاڭا وقۋشى ورنى پايدا بولادى. دەمەك, وسى سالادا جۇرگەن كاسىپكەرلەر ءۇشىن اتقارىلار شارۋا شاش-ەتەكتەن.
جەكەمەنشىك ەمحانالار سانى ارتادى
كاسىپكەرلەردىڭ ايتۋىنشا, قالادا تۇرعىندار سانىنىڭ جىل ساناپ وسۋىنە بايلانىستى جەكەمەنشىك ەمحانالارعا قاجەتتىلىك ازايماي وتىر.
– مەن جاقىندا جەكەمەنشىك ەمحانالار سالۋمەن اينالىسۋعا نيەت بىلدىرگەن بىرقاتار ءىرى ينۆەستورلارمەن كەزدەستىم. بۇل ماسەلە تالقىلانۋ ۇستىندە, قالادا جەكەمەنشىك ەمحانالارعا قاجەتتىلىك بار. سونداي-اق ەلوردادا قالىپتى 60-70 مىڭنىڭ ورنىنا 110 مىڭعا جۋىق تۇرعىنعا قىزمەت كورسەتەتىن ەمحانالار بار. سوندىقتان مۇنداي باستامالاردى, ارينە, ءبىز قولدايمىز. قۇرىلىس جوسپارلارىنا سۇيەنە وتىرىپ, ينۆەستورلار ءۇشىن ۋچاسكەلەردى ءادىل بولەمىز. مىسالى, مەملەكەتتىك ەمحانالاردى ءبىز «ءوندىرىس», «جەلەزنودوروجنىي», «كيرپيچنىي» تۇرعىن الاپتارىندا سالۋدى جوسپارلاپ وتىرمىز. سەبەبى جەكە بيزنەس وكىلدەرى بۇل جەرلەردە كاسىپ اشۋعا قۇلىقسىز. مەملەكەتتىك ەمحانالاردى جەكەشەلەندىرۋ ماسەلەسى دە بىرنەشە رەت كوتەرىلدى. بۇل ءبىر جاقتى شەشىلە قوياتىن ماسەلە ەمەس, ويتكەنى كوپشىلىك جەكەمەنشىك ەمحانالاردا قارالعىسى كەلمەيدى. ءبىز ءاربىر ەمحانا بويىنشا جەكە-جەكە جۇمىس ىستەپ, بارلىق تاراپتاردى قاناعاتتاندىراتىنداي شەشىمگە كەلەمىز دەپ ويلايمىن, – دەدى قالا باسشىسى.
ساپالى ينتەرنەت – زامان تالابى
ەلوردالىق كاسىپكەرلەر ينتەرنەت ساپاسى تۋرالى ماسەلەنى دە كوتەردى. «استانانىڭ تۇراقتى دامۋ ورتالىعى» جشس ديرەكتورىنىڭ ورىنباسارى ۆيتالي پۋستوۆويتەنكونىڭ ايتۋىنشا, بۇل ماسەلە ءبۇگىندە بيزنەستىڭ جۇمىسىن عانا ەمەس, قالا تۇرعىندارىنىڭ ءومىرىن دە قيىنداتىپ وتىر.
– ەلوردالىق بيزنەسكە تسيفرلاندىرۋ بەلسەندى ەنگىزىلۋدە, قىزمەت كورسەتۋ بارىسىندا ەلەكتروندىق پوستتەرمينالدار پايدالانىلادى, جەتكىزۋدىڭ ونلاين-تاپسىرىسىنىڭ ءتۇرلى جۇيەلەرى ەنگىزىلدى. دەگەنمەن, بيزنەس پەن حالىق ينتەرنەتتىڭ ساپاسى ناشار بولعاندىقتان, بايلانىستىڭ ۇنەمى ءۇزىلىپ كەتەتىنىن ايتىپ شاعىمدانۋدا. بۇل قالاداعى قۇرىلىستىڭ تىعىزدىعىنا نەمەسە حالىق سانىنىڭ ارتۋىنا بايلانىستى ما, جوق پا, وسى جاعى بەلگىسىز, – دەدى ۆ.پۋستوۆويتەنكو.
تەلەكوممۋنيكاتسيا كوميتەتىنىڭ توراعاسى ەرجان مەيراموۆ قالادا, نەگىزىنەن, قالانىڭ جاڭا سالىنىپ جاتقان اۋداندارى مەن تۇرعىن اۋداندارىندا «اق داقتار» بارىن, سونداي-اق شىن مانىندە ينتەرنەتتىڭ قالاداعى قۇرىلىس قارقىنىنا ىلەسە المايتىن ساتتەرى دە بولاتىنىن اتاپ ءوتتى.
تۋريزم دە ەكونوميكانىڭ ءبىر باعىتى
ەلوردالىق تۋريزم قاۋىمداستىعىنىڭ وكىلى تاتيانا ۆەرنيتسكايا استانادا ءتۋريزمدى دامىتۋدىڭ ماڭىزدىلىعىن باسا ايتتى. ماسەلەن, مۇراجايلار اۋماعىندا كورمەلەردەن باسقا قوعامدىق تاماقتانۋ ورىندارى, ءدامحانالار مەن كوفەحانالار, ارنايى ادەبيەتتەرى بار كىتاپ دۇكەندەرى قاجەتتىگىن ايتتى.
– استانا – ەلىمىزدەگى قالالىق مۇراجايى جوق جالعىز قالا ەكەنىن اتاپ وتكىم كەلەدى. مەنىڭ ويىمشا, قالامىزعا مۇنداي مۇراجاي وتە قاجەت. قالادا وتكىزىلەتىن ءىس-شارالار تۋرالى اقپاراتتىڭ جەتىسپەۋشىلىگى تۋرالى دا ءۇنسىز قالا المايمىن. تۋروپەراتورلار, قوناق ءۇي قىزمەتكەرلەرى بۇل تۋرالى تىم كەش ءبىلىپ جاتادى. مۇنىڭ ءبارى قالادا ءتۋريزمنىڭ دامۋىنا كەدەرگى كەلتىرەدى, – دەدى ول.
تۋريزم قاۋىمداستىعىنىڭ وكىلى سونداي-اق قالادا ءتۋريزمدى دامىتۋ بويىنشا ءوز ۇسىنىستارىن جەتكىزدى.
كەزدەسۋ بارىسىندا جەرگىلىكتى اتقارۋشى ورگاندارمەن جۇمىس وڭىرلىك كاسىپكەرلەر پالاتالارىنىڭ سالالىق كوميتەتتەرىمەن ءوزارا تىعىز قارىم-قاتىناس ارقىلى قۇرىلعانى اتاپ ءوتىلدى. الداعى ۋاقىتتا مۇنداي كەزدەسۋلەر «اتامەكەن» ۇكپ الاڭىندا تۇراقتى تۇردە وتكىزىلەتىن بولادى.
كارينا كۋشانوۆا
