استانادا «كۇيىپ» تۇرعان ماسەلەنىڭ ءبىرى – جەر. جۇرتشىلىق باس قالادان ءبىر جەر تەلىمىن الۋعا زار. بۇگىندە جەر كەزەگىنە تۇرعانداردىڭ سانى 100 مىڭعا جۋىقتاپتى. وسىنشا ادامدى جەرمەن قامتاماسىز ەتۋگە كەمى 80 جىلداي ۋاقىت كەتەدى ەكەن.
جەر قاتىناستارى باسقارماسىنىڭ مالىمەتىنە قاراعاندا, استانادا جەكە تۇرعىن ءۇي قۇرىلىسىن جۇرگىزۋ ماقساتىنداعى جەر تەلىمدەرى سوڭعى رەت 2007 جىلدىڭ مامىر ايىندا بەرىلگەن. تەلىمدەر تەگىس زاڭعا سايكەس, ۇلى وتان سوعىسى ارداگەرلەرى مەن وعان تەڭەستىرىلگەن ازاماتتارعا كەزەك بويىنشا ۇلەستىرىلگەن كورىنەدى. سودان بەرى ەشكىمگە ەشقانداي جەر تەلىمى بەرىلمەگەن. استانادان جەر ءبولۋ نەگە توقتاتىلدى؟ بۇل ساۋالدىڭ جاۋابىن جەر الىپ, ءۇي سالعىسى كەلەتىن كەز كەلگەن اعايىن بىلگىسى كەلەتىنى انىق.
جەر تەلىمىن بەرۋدىڭ دە وزىندىك ءتارتىبى مەن زاڭدىق نورمالارى بار. تەلىمدەردى ءبولۋ قازاقستان رەسپۋبليكاسى ۇكىمەتىنىڭ 2006 جىلعى 1 تامىزداعى №726 قاۋلىسىمەن بەكىتىلگەن ەرەجەگە سايكەس جۇرگىزىلەدى. ەرەجە بويىنشا, ازاماتتارعا بەرىلەتىن جەر تەلىمدەرى ءتيىستى جانە قاجەتتى ينجەنەرلىك ينفراقۇرىلىمدارىمەن قامتاماسىز ەتىلگەن, تىرشىلىك ەتۋگە لايىقتالعان بولۋى ءتيىس. ياعني جارىعى مەن سۋى جوق, جولى سالىنباعان جەردى جۇرتشىلىققا ۇلەستىرۋ زاڭسىز بولىپ تابىلادى. استانادا جەر الۋعا كەزەككە تۇرعىنداردىڭ كوپتىگىنە قاراماستان تەلىمدەردىڭ بەرىلمەي وتىرۋى سوندىقتان. قالا اۋماعىندا قاجەتتى ينجەنەرلىك ينفراقۇرىلىممەن قامتاماسىز ەتىلگەن دايىن الاڭدار جوق. سول سەبەپتى دە ازىرگە جەكە تۇرعىن ءۇي سالۋعا جەر تەلىمدەرى بەرىلمەيدى.
قىمبات توقتامۇرات
