استانادا كوكپاردان وتكەن تۇڭعىش ازيا اشىق چەمپيوناتى مارەسىنە جەتتى. ەلوردا تورىندە وتكەن ءدۇبىرلى سايىستا قازاقستان قۇراماسى قۇرلىق جەڭىمپازى اتاندى.
قازاقستاننىڭ ۇلتتىق ات سپورتى تۇرلەرى قاۋىمداستىعىنىڭ باستاماسىمەن قر سپورت جانە دەنە شىنىقتىرۋ ىستەرى اگەنتتىگى جانە «نۇر وتان» حالىقتىق دەموكراتيالىق پارتياسىنىڭ قولداۋىمەن وتكەن حالىقارالىق دوداعا تۇركيا, رەسەي, قىتاي, موڭعوليا, وزبەكستان, تاجىكستان, قىرعىزستان جانە قازاقستان قۇرامالارى قاتىسىپ, ۇلتتىق سپورتىمىزدىڭ مارتەبەسىن بيىككە كوتەرە ءتۇستى. ەرتە زاماننان قازاقتىڭ ۇلتتىق ويىنى رەتىندە تانىلىپ كەلگەن كوكپار سايىسى بۇگىندە زامانعا ساي جاڭا ەرەجەلەر بويىنشا وتكىزىلىپ كەلەدى. سوندىقتان بۇل سپورتقا باسقا قۇرلىقتاردان دا قىزىعۋشىلىق بايقالىپ وتىر.
استانادا تۇڭعىش رەت وتكىزىلگەن ازيا چەمپيوناتى الدىندا اتالمىش جارىستىڭ باس جۇلدەسىنە قازاقستان مەن قىرعىزستان كوكپارشىلارى تالاسادى دەگەن بولجام ايتىلعان دا ەدى. شىنىمەن دە وسى قۇراما ەكى توپتىڭ جەڭىمپازى رەتىندە اقتىق باسەكەگە جولداما الدى. اسا تارتىستى وتكەن بۇل سىندا قازاق جىگىتتەرى مىقتىلىعىن دالەلدەپ شىقتى. ايىر قالپاقتى اعايىنداردى 4:2 ەسەبىمەن ۇتقان قازاقستان قۇراماسى تۇڭعىش رەت وتكەن ازيا چەمپيوناتىنىڭ جەڭىمپازى اتاعىن جەڭىپ الدى. ەل نامىسىن قورعاپ شىققان جىگىتتەردىڭ قايسى بولسا دا وزدەرىنە ارتىلعان سەنىمدى اقتاي ءبىلدى. اتاپ ايتقاندا, ات قۇلاعىندا ويناعان قۇلاجان توعايباەۆ, باقتىباي شىرىنقۇلوۆ, باعلان شىرىمباەۆ, داۋلەتبەك ومباەۆ, ەركەباي وماربەك, نۇرجىگىت مىرزاباەۆ, ارسلان قابجانوۆ, ەرمەك كوبەي, ماناربەك دۇيسەنبيەۆ, ۇلان بايتورەەۆ, تەمىرحان ايتپاەۆ جانە الەكساندر پۋپەنكو التىن مەدال تاعىندى. ال قىرعىز شاباندوزدارى كۇمىس جۇلدەگە يە بولدى. ءۇشىنشى ورىن ءۇشىن بولعان باسەكەدە تاجىكستان قۇراماسى قىتاي كومانداسىن 3:0 ەسەبىمەن تىزە بۇكتىردى. وزبەكستان قۇراماسىن 9:2 ەسەبىمەن ۇتقان رەسەي قۇراماسى بەسىنشى ورىنعا تابان تىرەدى. ال جەتىنشى ورىنعا تالاسقان موڭعوليا جانە تۇركيا قۇرامالارى اراسىنداعى ويىندا بايان ولگەي ايماعىنان كەلگەن قانداستارىمىز باسىمدىق تانىتتى.
قۇرلىق بىرىنشىلىگىندە جەكەلەگەن نوميناتسيالار بويىنشا دا باعالى جۇلدەلەر تاعايىندالعان ەكەن. ماسەلەن, «ۇزدىك سالىمشى» سىيلىعى قىرعىز شاباندوزى نۇرمۇحامەد قويشەكەەۆكە بەرىلسە, ۇزدىك اتقا تاعايىندالعان «ەر قاناتى» سىيلىعى «لازەر» اتتى تۇلپاردى تىزگىندەگەن قازاقستاندىق باقتىباي شىرىنقۇلوۆقا تابىس ەتىلدى.
جارىستىڭ سالتاناتتى جابىلۋ راسىمىندە قازاقستان رەسپۋبليكاسى ۇلتتىق ات سپورتى تۇرلەرى قاۋىمداستىعىنىڭ پرەزيدەنتى قايرات ساتىبالدى جارىس جەڭىمپازدارىنا كوماندالىق كۋبوكتى جانە مەدالدار تاپسىردى. سونىمەن قاتار جەڭىمپاز كومانداعا 10 ميلليون, ەكىنشى ورىنعا يە بولعان كومانداعا 6 ميلليون, ال ءۇشىنشى ورىنعا يە بولعان كومانداعا 4 ميلليون تەڭگە سىياقىنىڭ سەرتيفيكاتى تابىس ەتىلدى. «نۇر وتان» حدپ اتىنان ۇلتتىق سپورتىمىز كوكپاردى ناسيحاتتاپ, ونى جانداندىرۋعا ۇلەس قوسىپ جۇرگەن بىرقاتار ازاماتتارعا ارنايى سىيلىقتار بەرىلدى.
سونىمەن ەلوردا تورىندە تۇڭعىش رەت وتكەن ازيا چەمپيوناتى ءوز مارەسىنە جەتتى. كەزەكتى قۇرلىق دوداسى ەكى جىلدان كەيىن تۇركيانىڭ ستامبۇل قالاسىندا وتەتىن بولادى.
عالىم قوجابەكوۆ
