قازاقستان رەسپۋبليكاسى تۇڭعىش پرەزيدەنتىنىڭ كۇنىنە وراي استاناداعى №6 قالالىق ەمحانادا جۇكتى ايەلدەر مەن ەمدەۋ مەكەمەسىنە كەلۋشىلەرگە ارنالعان اشىق ەسىك كۇنى ۇيىمداستىرىلدى.
اتالمىش ەمحانانىڭ اكۋشەرلىك-گينەكولوگيا بولىمشەسىنىڭ مەڭگەرۋشىسى ەرلان مۋسەنوۆتىڭ ايتۋىنشا, سەنبى كۇنى تاڭەرتەڭگى ساعات 9-دا باستالعان شاراعا ءۇش اكۋشەر-گينەكولوگ, ءبىر پسيحولوگ, تەراپەۆت, الەۋمەتتىك قىزمەتكەر, ەندوكرينولوگ جانە كارديولوگ ماماندار قاتىسىپ, قابىلداۋ جۇرگىزسە, زاڭگەر قۇقىقتىق اسپەكتىلەر بويىنشا كەلۋشىلەرگە كەڭەس بەردى. كۇندىزگى ساعات ەكىگە دەيىن جالعاسقان اكتسياعا بارلىعى 23 ادام كەلدى. ولاردىڭ اراسىندا اتالمىش ەمحاناعا تىركەلمەگەن, استانانىڭ باسقا اۋداندارىندا تۇراتىن ەمدەلۋشىلەر دە بولدى. ماسەلەن, قالانىڭ سول جاعالاۋىندا ورنالاسقان ساۋران كوشەسىنىڭ تۇرعىنى ا.بارقىتقىزى وسى ەمدەۋ مەكەمەسىنە تىركەلگىسى كەلەتىنىن جەتكىزسە, ماماندار وعان ەمحاناعا تىركەۋدىڭ اياقتالعانىن ايتىپ, ۇكىمەتتىڭ ارنايى قاۋلىسىنا سايكەس, قازىرگى كەزدە جۇكتى ايەلدەر ناقتى تۇراتىن مەكەنجايى بويىنشا قارالا الاتىنىن ءتۇسىندىردى.
سونىمەن بىرگە, اشىق ەسىك كۇندەرى اياسىندا ەكگ, ياعني, ەلەكتروكارديوگرامما-فۋنكتسيونالدىق دياگنوستيكا كابينەتى جۇمىس ىستەدى. سول ارقىلى بولاشاق انالار جاتىرداعى نارەستەنىڭ جۇرەك سوعۋىنىڭ گرافيكالىق سيپاتتاماسىن الۋعا مۇمكىندىك الدى.
«باقىتتى اتا-انا» مەكتەبىندە ساباقتار وتكىزىلىپ, پەرزەنت كۇتىپ جۇرگەن جاندارعا, سونىڭ ىشىندە جاس وتباسىلارعا سەرىكتەس بوسانۋ تۋراسىندا ناسيحات جۇرگىزىلدى.
جالپى, ەمحاناعا كەلۋشىلەر «بوسانۋ كەزىندە سەرىكتەس قاجەت پە؟» دەگەن سۇراقتى كوپ قويدى. بۇل رەتتە ماماندار ەلوردالىق تۇرعىندار اراسىندا بوسانۋدىڭ وسى ءتۇرىن قالايتىندار قاتارىنىڭ كۇن ساناپ ءوسىپ كەلە جاتقانىن جانە الەمدىك تاجىريبە كورسەتىپ وتىرعانداي, سەرىكتەس بوسانۋدىڭ بىزگە دە قاجەت ەكەنىن ەسكەرتتى. بولىمشە مەڭگەرۋشىسىنىڭ مالىمدەۋىنشە, ۇستىمىزدەگى جىلدىڭ التى ايىندا اتالمىش ەمحانادا جۇكتى ايەلدەردىڭ قاتىسۋىمەن 425 وقۋ ساباقتارى وتكىزىلگەن. ولاردىڭ 128-ىنە بوساناتىن ايەلدەر سەرىكتەرىمەن بىرگە قاتىسقان. دەمەك, ولار دا سەرىكتەس بوسانۋدى قولدايدى.
سونداي-اق, شارا سوڭىندا جۇكتى ايەلدەر مەن باسقا دا كەلۋشىلەرگە دەنساۋلىق ساقتاۋ جونىندە كىتاپشالار جانە بۋكلەتتەر تاراتىلدى.
گۇلبارشىن وكەشقىزى