29 قاراشا كۇنى تاۋەلسىزدىك سارايىندا «بولاشاق» باعدارلاماسىنىڭ 20 جىلدىعىنا ارنالعان فورۋم وتەدى. مەرەيتويلىق شاراعا مەملەكەت باسشىسى نۇرسۇلتان نازارباەۆ قاتىسادى. كەشە ورتالىق كوممۋنيكاتسيالار قىزمەتىنىڭ بريفينگىندە اعىمداعى اپتادا بولاتىن ماڭىزدى ساياسي جاڭالىقتارمەن بولىسكەن وكق رەسمي وكىلى التاي ابيبۋللاەۆ وسىنى دا اتاپ ءوتتى. وتانداستارىمىزعا شەتەلدەردە ءبىلىم الۋعا مۇمكىندىك بەرگەن باعدارلامانىڭ 20 جىلدىق قورىتىندىسىنا, بۇگىنگى تالاپتارى مەن مىندەتتەرىنە «حالىقارالىق باعدارلامالار ورتالىعى» اق پرەزيدەنتى عاني نىعمەتوۆ تولىعىراق توقتالدى.
1993 جىلدىڭ 5 قاراشاسىندا ەلباسىنىڭ جارلىعىمەن تاعايىندالعان «بولاشاق» باعدارلاماسىنا وسى كۇندەرگە دەيىن 10025 ستيپەنديا بولىنگەن. قازىرگى تاڭدا اتالمىش باعدارلامانىڭ 6015 تۇلەگى ەلىمىزگە ورالىپ, ءتۇرلى سالالاردا, اتاپ ايتساق, 60 پايىزى جەكەمەنشىك سەكتوردا, 20 پايىزى ۇلتتىق كومپانيالاردا, 15 پايىزى مەملەكەتتىك ورگانداردا, 4-5 پايىزى حالىقارالىق جانە ۇكىمەتتىك ەمەس ۇيىمداردا ەڭبەكتەنىپ ءجۇر. ولاردىڭ 60 پايىزعا جۋىعى قوعامدىق-گۋمانيتارلىق جانە شىعارماشىلىق ماماندىقتار بويىنشا ءبىلىم السا, 38 پايىزى
ينجەنەرلىك-تەحنيكالىق, ال, 8 پايىزى مەديتسينالىق ءبىلىم الدى. اتاپ وتەتىن ءبىر جايت, بۇگىنگى كۇندە مىڭعا تارتا مۇشەسى بار «بولاشاق» باعدارلاماسى ستيپەندياتتارىنىڭ اسسوتسياتسياسى دا جۇمىس ىستەپ تۇر.
زامان سۇرانىسىنا قاراي قولعا الىنعان باعدارلامانىڭ العاشقى جىلدارى تاۋەلسىزدىگىمىزدى باياندى ەتۋ ءۇشىن جەتى جۇزدەي ادام ەلىمىزگە اسا قاجەت مەملەكەتتىك باسقارۋ, حالىقارالىق قاتىناستار سالالارى بويىنشا شەتەلدەردە دايىندالدى. ودان كەيىن مەملەكەت باسشىسى جاريا ەتكەن «قازاقستان-2030» ستراتەگياسىنىڭ تالاپتارىنا سايكەس باسىمدىق تەحنيكا جانە مەديتسينا كادرلارىن دايارلاۋعا بەرىلە باستادى. 2005 جىلى ستيپەنديالار سانى 3 مىڭعا دەيىن ءوسىپ, «بولاشاق» – حالىقتىق باعدارلاماعا اينالدى. بۇل كەزەڭدە تەحنيكالىق, بيولوگيالىق, عارىشتىق باعىتتار بويىنشا كوپتەگەن ادام باكالاۆر دەڭگەيى بويىنشا شەتەلدەرگە جىبەرىلدى. وبەكتيۆتى جاعدايلارعا جانە نازارباەۆ
ۋنيۆەرسيتەتىنىڭ اشىلۋىنا بايلانىستى 2011 جىلى باكالاۆرياتتا وقۋ توقتاتىلدى. ەكپىن ماگيستراتۋرا مەن دوكتورانتۋراعا بەرىلىپ, كاسىبي تاعىلىمداما باعدارلاماسى ەنگىزىلدى.
دەگەنمەن, باعدارلامانى جەتىلدىرۋ جۇمىسى ءالى دە جۇرگىزىلۋدە. ماسەلەن, قازىردە 2500 جاس الەمنىڭ 33 مەملەكەتىنىڭ 200 ۋنيۆەرسيتەتىندە ءالى دە وقۋلارىن جالعاستىرىپ جاتىر.
ع. نىعمەتوۆتىڭ ايتۋىنشا, بۇدان بىلاي ەندى ەكپىن سانعا ەمەس, ساپاعا قويىلاتىن بولادى. باعدارلاما بويىنشا شەتەلدەردە ءبىلىم الۋ تالاپتارىنا ساي ۇمىتكەر اعىلشىن ءتىلىن نەمەسە وقۋعا باراتىن ەلدىڭ تىلىمەن قاتار, مىندەتتى تۇردە قازاق ءتىلىن ءبىلۋى شارت. پسيحولوگيالىق تەستىلەۋدەن ءوتۋى جانە تاۋەلسىز ساراپشىلار كوميسسياسىنىڭ دا ماقۇلداۋىن الۋى قاجەت. ودان كەيىن بارلىق قۇجاتتار مەملەكەتتىك حاتشى مارات ءتاجين باسقاراتىن شەتەلدەردە كادرلاردى دايىنداۋ كوميسسياسىنا جىبەرىلەدى.
امانعالي قالجانوۆ