وقۋشىلار سارايىندا قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى نۇرجان التاەۆ پەن قالا اكىمىنىڭ ورىنباسارى ماليكا بەكتۇروۆا تۇلەكتەرمەن كەزدەسىپ, ءبىلىم گرانتتارىنا كىمدەر ىلىگە الاتىنىن, ەڭبەك نارىعىندا قانداي ماماندار سۇرانىسقا ساي ەكەنىن ايتىپ بەردى.
ۆيتسە-مينيستر اقش-تىڭ بوستون قالاسىندا تولىقتاي روبوتتالعان مەيرامحانانى مىسالعا كەلتىرىپ, ەڭبەك نارىعى ايتۋلى وزگەرىستەرگە ۇشىراعانىن العا تارتتى. «بۇرىندارى تانىمال بولعان ماماندىقتارعا سۇرانىس ازايىپ, كەيبىرەۋلەرى مۇلدەم جويىلىپ كەتتى. ونىڭ ورنىن امبەباپ ماماندار باستى. ماسەلەن, مۇرجا تازالاۋشى دەگەن ماماندىقتى تەك ەرتەگىلەردە كەزدەستىرەسىز» دەگەن نۇرجان التاەۆ تەحنولوگيانىڭ قارىشتاپ دامىپ كەلە جاتقانىن ءسوز ەتتى. «بىرنەشە جىل بويى كوبىسى زاڭگەر بولۋعا ۇمتىلاتىن. ال قازىر ونىڭ قاجەتتىلىگى تومەندەدى. ايتالىق, رەسەيدىڭ «سبەربانكى» تولىعىمەن كورپوراتيۆتىك زاڭگەرلەردەن باس تارتتى. سەبەبى بانكتە زاڭگەر سياقتى كەز كەلگەن نورماتيۆتى-قۇقىقتىق قۇجاتتى تەز تاۋىپ بەرەتىن كومپيۋتەرلىك باعدارلاما ورناتىلعان» دەدى ول.
بۇل پىكىردى اكىم ورىنباسارى ماليكا بەكتۇروۆا قوستادى. ونىڭ ايتۋىنشا, كەز كەلگەن ماماندىققا «web» دەگەن قوسىمشانى جالعاساق, زاماناۋي تالاپقا ساي مامان يەسى اتانۋعا بولادى. ول «كارتوگرافتىڭ جۇمىسىن مىسالعا الايىقشى. بۇگىندە بارلىق كارتالار Digital-فورماتىندا جاسالادى. Yandex-كارتالار, Google-كارتالار سوزىمە دالەل. كارتوگراف بولعىسى كەلەتىندەر ۆەب-كارتوگراف بولۋعا ۇمتىلۋى ءتيىس. ۋاقىت تالابىن ەسكەرىپ, اكىمدىك مەملەكەتتىك تاپسىرىسقا وسىنداي وزگەرىستەر ەنگىزدى» دەپ جاڭالىقپەن ءبولىستى.
بيىلعى وقۋ جىلىنان باستاپ قالا اكىمدىگى ەلوردالىق جوعارى وقۋ ورىندارى مەن تەحنيكۋمدارعا بەرىلەتىن گرانتتار ءتىزىمىن وزگەرتكەنى راس.
– اكىمدىك ازىرلەگەن قولجەتىمدى ءبىلىم باعدارلاماسى تۋرالى بايانداپ بەرگىم كەلەدى. بۇل جايلى 31 مامىر كۇنى شاھار باسشىسى اسەت يسەكەشەۆ «رۋحاني جاڭعىرۋ» باعدارلاماسى اياسىندا وتەتىن جيىندا كەڭىرەك ايتىپ بەرەدى. اكىمدىكتە ەڭبەك جانە الەۋمەتتىك قورعاۋ مينيسترلىگىندەگىدەي ەڭبەك نارىعىن زەرتتەيتىن
ينستيتۋت جوق. دەگەنمەن تەندەنتسيالاردى اۋقىمدى ءمالىمەتتەردى سۇرىپتاي الاتىن «BIG DATA» جوباسى ارقىلى انىقتاۋعا مۇمكىندىگىمىز بار. تالداۋ ناتيجەسى جوعارى وقۋ ورىندارى مەن وزگە ءبىلىم وردالارىن ءبىتىرىپ شىققان ماماندار ەڭبەك نارىعىنىڭ سۇرانىسىنا ساي كەلمەيتىنىن كورسەتتى, – دەدى ماليكا بەكتۇروۆا.
«نەگىزىندە, OLX پەن hh.kz سايتتارىندا ۇسىنىلاتىن بوس جۇمىس ورىندارىن قاراپ وتىرساق, ماماندارعا بۇل زاماندا ەسكىرگەن تالاپتار قويىلادى. سول سەبەپتى مەملەكەتتىك تاپسىرىستار ءتىزىمى تۇزەتىلىپ, بيىل جەرگىلىكتى بيۋدجەتتىڭ ەسەبىنەن كەڭەيتىلدى. قوسىمشا 1102 گرانت زاماناۋي ماماندىقتارعا بولىنەدى» دەپ جاريا ەتكەن اكىم ورىنباسارى قاي كاسىپكە باسىمدىلىق بەرىلەتىنىنە توقتالدى. – تەحنيكۋمدار مەن تجكب ۇيىمدارىندا گرانتتاردىڭ سانى 4547-گە كوبەيدى. تەحنيكۋمعا تۇسكىسى كەلەتىن, بولماسا 9-سىنىپتان كەيىن مامان يەسى اتانعىسى كەلەتىندەر ءبىزدىڭ مەملەكەتتىك تاپسىرىستار بويىنشا گرانت جەڭىپ الا الادى. تالداۋ ناتيجەسىندە تىزىمنەن كاسسير جۇمىسىن الىپ تاستادىق. ويتكەنى كەز كەلگەن سۋپەرماركەتكە جۇمىسقا ورنالاسساڭىز, كاسسيرگە قاجەتتى داعدىنى 20 مينۋتتىڭ ىشىندە ۇيرەنۋگە بولادى, – دەيدى ول.
جيىنعا كەلگەن جەتكىنشەكتەر ءىت-تەحنولوگيالارعا بايلانىستى جاڭا جۇمىس ورىندارى پايدا بولىپ جاتقانىن ۇعىندى. 2025 جىلعا قاراي تۋريزم, ءبىلىم بەرۋ, ساۋدا-ساتتىق, كولىك جانە لوگيستيكا سالالارىندا اۆتوماتتاندىرىلعان جۇيە ەنگىزىلىپ, 900 مىڭنان استام جۇمىس ورنى اشىلادى دەگەن بولجام بار. سەبەبى ەلىمىزدە «تسيفرلى قازاقستان» باعدارلاماسى اسا قارقىنمەن جۇزەگە اسىرىلۋدا.
