كەشە «اقمولا ۆاگون جوندەۋ زاۋىتى» كاسىپورنىندا مەملەكەت باسشىسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىن ءتۇسىندىرۋ جونىندەگى رەسپۋبليكالىق اقپاراتتىق توپتىڭ مۇشەلەرى جۇمىسشىلارمەن كەزدەستى. ۇلتتىق ەكونوميكا ءمينيسترىنىڭ ءبىرىنشى ورىنباسارى رۋسلان دالەنوۆ, استانا قالاسى ستراتەگيالىق جانە بيۋدجەتتىك جوسپارلاۋ باسقارماسىنىڭ باسشىسى راسۋل ورازعۇلوۆتار ءسوز سويلەپ, جولداۋدىڭ نەگىزگى باعىتتارىن ءتۇسىندىردى.
جولداۋدا جاريا ەتىلگەن باسىمدىقتاردىڭ ءبىرى قازاقستاندىقتاردىڭ ءال-اۋقاتى مەن ءومىر ءسۇرۋ ساپاسىن جاقسارتۋ بولىپ تابىلاتىنىن اتاپ ايتتى. وسىعان وراي, 2019 جىلدىڭ 1 قاڭتارىنان باستاپ ەڭ تومەنگى جالاقىنىڭ كولەمى 28 280 تەڭگەدەن 42 426 تەڭگەگە كوبەيەدى. بيۋدجەتتىك مەكەمەلەر جۇمىسشىلارىنىڭ ەڭبەكاقىسى شامامەن 35 پايىزعا وسەدى, بۇل ماقساتقا رەسپۋبليكالىق بيۋدجەتتەن قاراجات بولىنەدى» دەپ ءتۇسىندىردى باسقارما باسشىسى. ول سونداي-اق ءومىر سۇرۋگە جايلى ورتا قالىپتاستىرۋ بيىلعى جولداۋدىڭ نەگىزگى باسىمدىقتارىنىڭ ءبىرى ەكەنىنە توقتالدى. «مەملەكەت باسشىسى ءار ادام ءۇشىن جايلىلىق دەگەنىمىز, ەڭ الدىمەن, تۇرعىن ءۇيدىڭ قولجەتىمدىلىگى ەكەنىن ايتتى. وسى ماقساتتا اعىمداعى جىلدىڭ ناۋرىز ايىندا «7-20-25» باعدارلاماسى ىسكە قوسىلدى. باعدارلاما شەڭبەرىندە الداعى 5 جىلدا 100 مىڭنان اسا ازاماتتار باسپاناعا قول جەتكىزەدى. بۇگىنگە دەيىن ەكىنشى دەڭگەيدەگى بانكتەر جالپى قۇنى 10,6 ملرد تەڭگەنى قۇرايتىن نەسيەلەردى ماقۇلدادى. سونىڭ ناتيجەسىندە 703 وتباسى باسپانامەن قامتاماسىز ەتىلەدى» دەدى راسۋل ورازعۇلوۆ.
ونىڭ ايتۋىنشا, باعدارلامانى ودان ءارى قولجەتىمدى ەتۋ ءۇشىن, حالىقتىڭ الەۋمەتتىك احۋالى تومەن ساناتتارىنا العاشقى جارناعا جاردەماقشا ءبولۋدىڭ قوسىمشا تەتىكتەرى قاراستىرىلىپ جاتىر. استانادا جىل سوڭىنا دەيىن «7-20-25» باعدارلاماسى بويىنشا 1 ملن تەڭگەدەن بەرىلەتىن 100 سەرتيفيكاتتى نەگىزىنەن, مۇعالىمدەر, دارىگەرلەر, پوليتسيا قىزمەتكەرلەرى يەلەنەدى.
كەزدەسۋ بارىسىندا وڭىرلىك دەڭگەيدە بيزنەس احۋالدى جاقسارتۋعا ەرەكشە كوڭىل بولىنەتىنى تىلگە تيەك ەتىلدى. جالپى العاندا, 2018 جىلدىڭ باسىنان بەرى ەلورداداعى جۇمىس ىستەپ تۇرعان شاعىن جانە ورتا بيزنەس (شوب) سۋبەكتىلەرىنىڭ سانى 9,8 پايىزعا, 107,4 مىڭ بىرلىككە ۇلعايعان. شوب سۋبەكتىلەرىنەن بيۋدجەتكە تۇسكەن سالىق تۇسىمدەرىنىڭ كولەمى شامامەن 321,2 ملرد تەڭگەنى (بارلىق سالىقتار مەن تولەمدەردىڭ 45 پايىزى) قۇراعان.
وسى كۇنى ەلورداداعى «الاي» بازارىندا دا جولداۋدىڭ باعىتتارىن تۇسىندىرۋگە ارنالعان كەزدەسۋ ءوتتى.
