استانادا 6 مىڭنان اسا بەلسەندى ۆولونتەر بار. 2020 جىلى پاندەميا كەزىندە ەلوردادا ەرىكتىلەر قاتارى كۇرت كوبەيدى. كومەككە مۇقتاج ادامدارعا جاردەم بەرۋگە, قوعامدىق-الەۋمەتتىك ءىس-شارالارعا قولداۋ كورسەتۋگە, اسىرەسە, جاستار جاعى بەلسەندىلىك تانىتىپ كەلەدى.
استانا قالاسىنىڭ كوممۋنيكاتسيالار قىزمەتىندە «يگى ىستەر مارافونى» جوباسىنداعى ەرىكتىلەردىڭ ءرولى تۋرالى استانا قالاسىنىڭ جاستار ساياساتى ماسەلەلەرى باسقارماسىنىڭ باسشىسى سامات ىبىراەۆ ايتىپ بەردى.
2014 جىلدان بەرى «استانا جاستارى» جاستار-رەسۋرستىق ورتالىعىنىڭ ۆولونتەرلىك قوزعالىستى دامىتۋ ءبولىمى ۆولونتەرلىك قىزمەتتى دامىتۋ جانە ناسيحاتتاۋ, ولاردى وقىتۋمەن اينالىسادى, ۆولونتەرلىك ۇيىمدار مەن قوزعالىستارعا اكىمشىلىك جانە رەسۋرستىق كومەك كورسەتەدى.
2020 جىلدان بەرى «استانا جاستارى» بازاسىندا قالالىق ۆولونتەرلەر شتابى قىزمەت اتقارۋدا. شتابتا 6 مىڭنان استام بەلسەندى ۆولونتەر بار. جىل سايىن «استانا جاستارى» ورتالىعى ۆولونتەرلىك باعىتتارىن كەڭەيتۋدە. وسىلايشا, 2023 جىلى «قاۋىپسىز قالا» جوباسى اياسىندا ۆولونتەرلەر ءتۇرلى باعىتتا اقپاراتتىق ءتۇسىندىرۋ جۇمىستارىنا جۇمىلدىرىلدى.
«Taza Alem» جوباسى اياسىندا ۆولونتەرلەردىڭ قاتىسۋىمەن 45 ەكو-سەنبىلىك ۇيىمداستىرىلدى. سونىمەن قاتار, ۆولونتەرلەر قالالىق جانە حالىقارالىق ءىس-شارالارعا دا تارتىلادى. ماسەلەن, 2023 جىلى حالىقارالىق جانە رەسپۋبليكا دەڭگەيىندە وتكەن 150 شاراعا اتسالىستى. «يگى ىستەر مارافونى» جانە «قامقورلىق مەكەنجايى» جوباسى اياسىندا «استانا جاستارى» ۆولونتەرلەرىمەن 40 جالعىزباستى زەينەتكەرلەردىڭ اۋلاسى قاردان جانە قوقىستان تازارتىلىپ, رەتكە كەلتىرىلدى. اتالعان اكتسيالار تۇراقتى جانە جۇيەلى تۇردە وتكىزىلەدى.
استانا قالاسىنىڭ جاستار ساياساتى ماسەلەلەرى باسقارماسى باسشىسىنىڭ ايتۋىنشا ۆولونتەرلىك – ەرىكتى جۇمىس, ادامدار اينالاسىنداعىلاردىڭ يگىلىگى ءۇشىن ەڭبەك ەتىپ, كومەكتەسەدى. جاستار دا ۋاقىتتارىن ءتيىمدى وتكىزۋگە, جاڭا دوستار تابۋعا, قوعامدىق ومىرگە قاتىسۋعا ۇمتىلادى.
