جەكسەنبى كۇنى كۇرەس دەسە ىشكەن اسىن جەرگە قوياتىن جانكۇيەرلەر «بارىس ارەنا» سپورت كەشەنىن بەتكە الدى. مۇندا پرەزيدەنت جۇلدەسىنە ارنالعان, وسىمەن سەگىزىنشى جىل ۇيىمداستىرىلعان «قازاقستان بارىسى-2018» رەسپۋبليكالىق ءتۋرنيرى ءوتتى.
بايراقتى باسەكەدە بەلدەسكەننىڭ بەلىن ۇزەتىن 37 ءاپايتوس بالۋان باق سىناستى. ولاردىڭ اراسىندا وسىعان دەيىن بارىس اتانعان ۇلان رىسقۇل, ايبەك نۇعماروۆ, مۇحيت تۇرسىنوۆ, ەلامان ەرعاليەۆ سىندى قازاق كۇرەسىنىڭ تىسقاققان سايىپقىراندارىمەن قاتار, اتالمىش جارىستىڭ تابالدىرىعىن ەندى عانا اتتاعان جاستار دا بولدى. مىسالى, تۋرنيرگە بيىل ءبىرىنشى رەت قاتىسقان 24 جاسار اسكەر بارىسى ەراسىل قاجىباەۆ تىڭنان تۇرەن سالدى. ول رۋسلان ابدىرازاقوۆ پەن بىلتىرعى بارىس ەلامان ەرعاليەۆتى جەڭەدى دەپ ەشكىم كۇتپەگەن دە ەدى.
وسىدان كەيىن-اق ەراسىل ءوزىنىڭ الىسقا شاباتىنىن بىردەن بايقاتتى. كىل مىقتىلاردى مويىنداتقان ول شيرەك فينالدا تۇركىستان وبلىسىنىڭ بالۋانى ەرسۇلتان مۇزاپپاروۆپەن جولىقتى. بۇل جارىستاعى ەڭ جەڭىل سالماق (90 كگ) پەن ەڭ اۋىر سالماق (151 كگ) يەلەرىنىڭ بەلدەسۋى ەدى. سالماق ايىرماسى 60 كەلى بولسا دا, ەرسۇلتان بارىن سالىپ, قارسىلاسىن ساستىرىپ باقتى. بىراق قانشا شابۋىل جاساعانىمەن, تۇركىستاندىق بالۋاننىڭ ادىستەرى ناتيجەسىز بولدى. ازداعان ۇپاي ساندارىمەن عانا باسىم تۇسكەن ەراسىل بەلدەسۋ كەزىندە يىعىنان جاراقاتتانىپ, دارىگەرلەردىڭ كومەگىنە جۇگىندى.
سول سياقتى شيرەك فينالدا جۇزدەسكەن تاجىريبەلى بالۋاندار سەمەيلىك ايبەك نۇعماروۆ پەن قاراعاندىلىق ەرجان شىنكەەۆتىڭ بىلدەسۋى دە تارتىستى ءوتتى. الما-كەزەك بۇك, جامباس ۇپايلارىن ەنشىلەپ جۇرگەن قوس بالۋاننىڭ كەزدەسۋى سوڭعى سەكۋندتاردا ەرجاننىڭ جارتىلاي جەڭىسىمەن اياقتالدى.
ال ءۇشىنشى ورىن ءۇشىن باق سىناسقان ەرسۇلتان مۇزاپپاروۆتان باسىم تۇسكەن ايبەك نۇعماروۆ قولا بەلبەۋگە يە بولدى.
ءتۋرنيردى تۇيىندەگەن ەرجان شىنكەەۆ پەن ەراسىل قاجىباەۆ اتوي سالىپ, قيقۋلاعان جانكۇيەردىڭ دەلەبەسىن قوزدىردى. ەراسىلعا جاراقاتى اسەر بەردى مە, الدىنداعىداي ەمەس, باسەڭدەپ قالدى. ال اتالمىش جارىستا تالاي جىلدان بەرى باعى جانباي جۇرگەن ەرجاننىڭ بۇل جولى تاسى ورگە دومالاپ, جەڭىس تۇعىرىنان كورىندى.
سونىمەن, ۇلتتىق سپورت ۇلىقتالعان باسەكەدە التىن بەلبەۋدى ەرجان شىنكەەۆ قانجىعالاسا, كۇمىس بەلبەۋدى اسكەر بارىسى ەراسىل قاجىباەۆ, قولا بەلبەۋدى ايبەك نۇعماروۆ يەلەندى. ال تۇركىستاندىق ەرسۇلتان مۇزاپپاروۆ ءتورتىنشى ورىندى قاناعات تۇتتى.
جەڭىمپازداردى ماراپاتتاعان «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ, سپورت ارداگەرى, قازاقتان شىققان تۇڭعىش وليمپيادا چەمپيونى جاقسىلىق ۇشكەمپىروۆ, پارلامەنت ءماجىلىسىنىڭ دەپۋتاتى بەكبولات تىلەۋحان, «قازاقستان بارىسى» جوباسىنىڭ اۆتورى ارمان شوراەۆ سىندى تۇلعالار بالۋاندار مەن ولاردىڭ باپكەرلەرىنە قوماقتى قارجى سەرتيفيكاتىن سالتاناتتى تۇردە تابىستادى.
