استانادا «ەۋروپا كۇنى» اياسىندا ەۋروپا مەملەكەتتەرىنىڭ 15 ۇزدىك كينوسىن ەلوردالىق كورەرمەندەر تاماشالاۋدا.
بۇگىنگى تاڭدا ەۋروپا كينوسى الەمدەگى وزىق ونەردىڭ ۇلگىلەرى قاتارىنان سانالادى. اۋزىمەن قۇس تىستەگەن تالانتتى تۇلعالارى دا جەتەرلىك. ادام پسيحولوگياسىنا تەرەڭ بويلاي بىلەتىن دۇنيەلەردى ەرەكشە ايتۋعا بولادى. ماسەلەن, ۇزدىكتەر قاتارىنداعى «وسكار-2016» جۇلدەسىنىڭ لاۋرەاتى اتانعان «ەمي» ءفيلمى, «ۇزدىك رەجيسسۋرا» ءۇشىن 2015 جىلى ۆارشاۆا كينوفەستيۆالىندە جەڭىمپاز بولعان ەستونيا مەن گرۋزيانىڭ بىرلەسىپ تۇسىرگەن «ماندارينى» اسكەري دراماسى سەكىلدى سالماعى اۋىر كينولاردىڭ كوركەمدىك الەمى قىزىقتىرماي قويمايدى.
ەلورداداعى ايتۋلى ونەر فەستيۆالى «مىسىقتاردىڭ باسى اينالمايدى» اتتى پورتۋگاليالىق كينوكومەدياسىمەن اشىلدى. بۇل فيلم 2014 جىلى پورتۋگاليانىڭ ۇلتتىق كينوپروكاتىندا كوش باستاپ, كوپتەگەن حالىقارالىق فەستيۆالدەرگە ۇسىنىلعان.
قازاقستانداعى ەۋرووداق وكىلدىگىنىڭ باسشىسى ترايان حيستەانىڭ ايتۋىنشا, ەۋروپانىڭ كينوسى ءبىزدىڭ ەلىمىزدە مول سۇرانىسقا يە ەكەن. سوندىقتان يگى شاراعا ەۋروپا ەلدەرىنىڭ تەك ۇزدىك تۋىندىلارى تاڭدالعان.
– جالپى, فەستيۆال اياسىندا قازاقستاننىڭ ۇلكەن ەكرانىنا شىعارامىز دەگەن كينولار ىرىكتەلدى. باستى تالاپ, كينو – ەۋرووداق قۇرامىنداعى ەلدەردىڭ كورەرمەندەرىنە تانىمال, رەيتينگىسى جوعارى, سيۋجەتى ساپالى بولۋ كەرەك. فەستيۆالگە ءارتۇرلى جانردى, ءتۇرلى اۋديتورياعا ارنالعان كينولار الىندى, – دەيدى ەلشى.
شارا شىمىلدىعى بۇگىن چەحيا ەلى تۇسىرگەن «جولى بولعىش بەيباق» كينوسىمەن جابىلادى.
ازامات ەسەنجول
